angadhikain

[angadhikain]

Ano nga ba ang adhika ng Adhikain? | Prologo

Ang salitang adhikain, na galing sa salitang adhikâ, ay patungkol sa pakay o layunin na may kahabaanang panahon na nasasaklawan.

Kasingkahulugan nito ang mga salitang pakay, tungo, at layon. Alinsunod nito, ang pangunahing adhika ng blog na ito ay maibahagi sa iba ang mga naisulat na literatura ng mga may-akda, partikular na ang kanilang mga akdang tula, maikling kwento, at iskrip ng dula.

Sa pamamagitan nito, maaari makapagbigay ng motibasyon at inspirasyon ang mga may-akda para sa iba pang mga manunulat upang ibahagi rin ang kanilang mga akda at maaari ay magtulungan sa kaparaanang pagbibigay ng puna at pagpugay sa isa’t-isa.

Bukod dito, nais ring ibahagi ng mga may-akda ang mensahe na ang malikhaing pagsulat ay nakatutulong sa paglinang, hindi lamang ng kakayahan, kundi pati na rin ang paraan ng pamumuhay. kung saan nararapat na malayang naipapahiwatig ang mga emosyong nadarama.

Inaasahan ng mga may-akda na sa paraang ito, patuloy nilang mabubuhay ang sining at kultura ng malikhaing pagsulat sa Filipino.

[angadhikain]

Masterlist

Maligayang pagbati!

Aming nabatid na ang mga permalink sa aming navigation bar sa itaas ay minsan nakakaranas ng error na URL not found. Kung ito ay mangyayari sa iyo, bumalik lamang sa URL na angadhikain.tumblr.com at i-click muli ang nais puntahan na link. 

Upang maiwasan ang error na ito, ugaliing i-right click na lamang ang link at i-click ang ‘open link in new tab’. 

Kasabay nito, upang mas madaling mahanap at mabasa ang aming mga akda, narito ang masterlist ng lahat ng post ng pampanitikang blog na ito. I-click lamang ang salita ng naturang akdang iyong gustong basahin. Nawa ay pagpalain kayo ng Diyos!

Prologo

Mga Akda

Mga Tula

Haiku

Dalit

Tanaga

Diona

Kumbensyunal na Tula

Malayang Taludturan

Maikling Kwento

Iskrip ng Dula

Epilogo

Bionote

[angadhikain]

Bionote

Ang Adhikain ay binubuo nina Ysabella Ynna Abejo, Koreen Angeli Abrigo, Samantha Ysabella Austria, Dione Roch Bacal, at Justin Benes Bacorro ng Grade 12 - Fr. Alenio A galing sa Humanities and Social Sciences na strand ng Xavier University - Ateneo de Cagayan Senior High School.

Ysabella Ynna Abejo

Tula ang pinakagustong isinusulat ng may-akda na ito dahil makulay ito na paraan upang maipahiwatig ng isang tao ang kaniyang mga damdamin. Pinahahalagahan niya ang malikhaing pagsulat dahil importante itong bahagi ng panitikan, partikular na sa kaparaanan nitong gumamit ng imahinatibong pag-iisip.

Koreen Angeli Abrigo

Ang pinag-uukulan ng oras ng manunulat na ito ay ang pagsulat ng iskrip ng dula. Para sa kanya, sa pamamagitan ng mga diyalogo at emosyon ng karakter, mga direksyong pang-entablado, musika, at iba pang mga elemento nito, maganda itong paraan sa pagpapahayag ng isang kwento. Mahalaga para sa kanya ang malikhaing pagsulat dahil binibigyan tayo nito ng angkop na pamamaraan sa pagpapahayag ng ating opinyon at damdamin.

Samantha Ysabella Austria

Malikling kwento ang kadalasang sinusulat ng awtor na ito. Dahil sa kaniyang pagtangkilik sa mga nobela at iba pang di-piksyon na aklat, natural nang malapit sa kaniyang puso ang malikhaing pagsulat. Pinapagaan nito ang kaniyang damdamin at nagbibisa itong kaniyang plataporma upang ipahayag ang kaniyang mga emosyon sa makabuluhang pamamaraan at inililinang nito ang kaniyang imahinasyon sa mabuting pamamaraan.

Dione Roch Bacal

Mahilig magsulat ng mga tula ang may-akda na ito sa kadahilanang sa maikling sukat ay naipapahiwatig na niya ang kaniyang damdamin. Para sa kanya, importante ang malikhaing pagsulat sa pagpapagana ng kaniyang pagkamalikhain sa pamamagitan ng pagpapairal ng kaniyang imahinasyon. 

Justin Benes Bacorro

Ang paborito isulat ng awtor na ito ay ang tula dahil ang estruktura ay maikli, at nakakagamit siya rito ng mga simbolismo na maaaring magpahiwatig ng karanasan ng isang tao sa kaniyang buhay. Pinahahalagahan niya ang malikhaing pagsulat dahil ito ay nagpupukaw sa emosyon ng mambabasa. 

[angadhikain]

Pagtupad ng Adhikain | Epilogo

Hindi man naging madali ang pagsulat ng mga akda, sigurado namang ito ay isang karanasan na hindi malilimutan at may tiyak na mayroong matututunan ang mga manunulat galing dito.

Ang karanasan ng mga manunulat ay hindi magkapareho sa pagbuo nila ng mga akdang nakapaloob sa blog na ito. Mayroong mga manunulat na nahirapan sa pagbuo ng kanilang mga talata, samantalang mayroon din namang mga manunulat na tila sisiw lamang sa kanila ang pagsulat. Hindi lahat ng mga manunulat ay bihasa sa Filipino, may sapat na karanasan sa pagsulat, o di kaya’y mahilig sumulat. Ngunit, habang maraming pagkakaiba ang mga manunulat, mayroon silang iisang magkaparehas na katangian — iisa ang kanilang adhikain, ang kanilang layunin, ang kanilang hangarin.

Hangad ng mga manunulat na maibahagi ang kanilang pagkamalikhain sa iba’t-ibang mga tao sa pamamagitan ng paggawa ng pampanitikang blog na ito, at tiyak na natupad ang kanilang adhikain.

Kahit na tapos na ang pag-aaral ng mga manunulat sa asignaturang Malikhaing Pagsulat, hindi ibig sabihin nito na ito na ang wakas ng pagmamahal nila sa kagdandahang dala ng malikhaing pagsulat. Patuloy pa rin ang kanilang adhikain. 

[angadhikain]

Isang Daang Maling Akala {Malayang Taludturan}

Isinulat ni Samantha Ysabella Austria

Sa unang tingin ay hindi maipagtanto, 

na aabot tayo sa puntong kasinglayo nito. 

Ang nagsimula noong tatlumpung minuto matapos ang alas kwatro, 

ay matatapos lamang sa isang pagkabigo.

Ang iyong unang ngiti ay walang bahid ng deslikado, 

ngunit nang umabot ng ikalawa at ikatatlo; 

Hindi mapigilang tanungin ang sarili ko, 

ito na nga ba ang hinihintay o nalilito lang ako?

Ang unang tagpuang dalang-dala ang misteryo,

ng lalaking nakita sa loob ng simbahan nakaupo.

Hindi akalaing saking mga tula, siya ang magiging simuno,

hindi akalaing saking mga panaginip, siya ang mamumuno.

Langkap rin ng isang daang maling akala ang hindi pagsuko, 

kahit na umabot ng isang libo ang mga tanong na “bakit” at sagot na “pero” 

Tila ang mga pangakong sa daliri isinangkot ay biglang gumuho, 

tila ang damdaming saksi ng isang milyong bituin ay naglaho.

Kaya’t pasensya at sinubukan kong buksan ang iyong puso, 

Pasensya at naniwala ako sa iyong mababaw na pangako. 

Ngunit huwag mag-alala dahil pagkatapos ng araw na ika-otso, 

ako na’y aalis at isasarado ang hindi na dapat binuksang pinto.

[angadhikain]

Hija Ako {Malayang Taludturan}

Isinulat ni Koreen Angeli Abrigo

Oo, Hija ako 

Hijang kinakailangang sumubok sa bakbakan 

Hindi man duguan 

Ngunit nadudungisan ang buong katauhan

Oo, Hija ako 

Hijang araw-araw pinagpyepyestahan 

O di kaya’y pinagsasaluhan 

Di’ bale na ang anyo’t kasuotan

Oo, Hija ako 

Sinentensya at pinatili sa kadiliman 

Pilit pinapaisip na ito’y okay lang 

Na mali ang aking mga dinadamdam

Ilang milyong boses, unti-unting nagkakaisa 

Naririnig niyo ba ang lumalakas na kanta?

Ang lilang diwa’y dumadaloy at nananalaytay 

Kaya oo, Hija ako

[angadhikain]

Rosas, Pag-ibig, Para Sa’yo {Malayang Taludturan}

Isinulat ni Justin Benes Bacorro

Kay pula ng iyong kagandahan 

Matinik, masakit, maganda 

Iyana ng diskriba sa iyo ng iba 

Ngunit sa akin ay mas higit ka pa

Simbolo ka ng pagmamahalan 

Simbolo ka ng kalikasan 

Ikaw ay nagbabaga ng sobra 

Pulang pula at nakakapaso

Napaka payapa ng aking pakiramdam pag ika’y pinagmamasdan ko 

Inaalay ka kapag akoy nagtatapat ng pag-ibig 

Inaalay ka kapag ako’y nagpapasalamat 

Ibinibigay ka sa mga taong mahal ko

[angadhikain]

Sandugo {Kumbensyunal na Tula}

Isinulat ni Samantha Ysabella Austria

Labing-walo pa lamang ang munting bilang, 

ng taong ako’y nakayapak sa kayumangging lupa; 

At ibininabad sa ilalim ng init ang kayumangging balat, 

habang kumikinang ang sidlak ng kayumangging mga mata.

Parang kailan lang noong ako’y isinilang, 

dito sa mayuming perlas ng silanganan. 

Dito sa ating pinanggalingan, 

ang ating pinakamamahal na lupang hinirang.

Tila kahapon lamang nang siya’y isinilang, 

ang bayan kung saan ang demokrasya’y mayaman. 

Ngunit hindi labis at lalo na’t hindi kulang, 

ang labing-walong taon upang malaman;

Na syangang kahapon lamang na sinaksak itong tuluyan,

at ngayo’y siyang nagdurugo ang likod ng Pilipinong sambayanan.

[angadhikain]

Ang Ulan {Kumbensyunal na Tula}

Isinulat ni Ysabella Ynna Abejo

Parati na sa labas ng mga bahay, 

Bahagi ng pang-araw-araw na buhay; 

Salamin ng mga kulay o karimlan, 

Ang nagsisilbing hiyas ng kalangitan;

Ang mga ulap ay dumukwang sa langit; 

Ang awit ng ibon ay kaakit-akit; 

Huwag ipikit ang iyong mga mata, 

Pumapatak na ang ulan sa bintana;

Ang lupa ay kumikinang ng pag-asa; 

Ang bahaghari’y para sa nagdurusa; 

Ang mga alaala ng paaralan, 

Ay masayang isipin kung minsan-minsan.

[angadhikain]

Pinatahimik {Diona}

Isinulat ni Koreen Angeli Abrigo

Bumabahang mabaya 

Ginagawa tuwina 

Hindi na nagsasawa

Saan kaya nagmula? 

Walang puso at awa 

Ang mata’y nagluluksa 

[angadhikain]

Nawasak na Mundo {Diona}

Isinulat ni Justin Benes Bacorro

Oh kay ganda ng mundo 

Na tayo ay saludo 

At walang apektado

Pero ito’y nawasak 

Na kagyat na bumagsak

At tayo’y napahamak

Tignan mo ang paligid

Parang isang makitid

Na walang tumatawid

Ang mundo’y alagaan

Dahil ito’y kailangan

Para sa kaligtasan

[angadhikain]

Ordinaryong Buhay {Tanaga}

Isinulat ni Ysabella Ynna Abejo

Malamig pa ang hangin; 

May hawak siyang asin; 

Nagluluto sa labas, 

Gamit ng buong lakas;

O, kape at pandesal, 

Ang perpektong almusal! 

Kanin, itlog, at hotdog, 

Lahat ay mabubusog;

Sa liit na tahanan, 

Maraming kakwentuhan; 

O, mapayapang araw, 

Ika’y napakasilaw!

[angadhikain]

Kathang Isip {Dalit}

Isinulat ni Samantha Ysabella Austria

O, Ulan, sa’yong pagbuhos, 

tila huminto ang mundo. 

Ang tangi lang nanatili, 

ako’t aking kathang isip.

[angadhikain]

Tula {Tanaga}

Isinulat ni Dione Roch Bacal

Sumusulat ng tula 

Ako’y napatulala 

Salita’y tila bala 

Napakahirap pala

[angadhikain]

Tapos {Diona}

Isinulat ni Dione Roch Bacal

Sarili ko’y tinapos 

Tila ba’y nauubos 

Tinali at ginapos

[angadhikain]

Buhok {Dalit}

Isinulat ni Ysabella Ynna Abejo

Noong tayo ay bata pa, 

Ang buhok ay parang sumpa; 

Sa tingin ko’y maganda ka; 

Marilag, parang manika; 

Mga sinulid mo’y itim, 

Pero ‘di sila kulimlim; 

Mga tirintas at ribon, 

Sinuot mo buong hapon;

Kulay kape na balikat,

Hinalikan ng maingat; 

Maikli na ang buhok mo, 

Imaheng bago at presko.

[angadhikain]

Nandito {Haiku}

Isinulat ni Koreen Angeli Abrigo

Ikaw at ako 

Walang dapat susuko 

Hanggang sa dulo