c-bambi

[c-bambi]

Hugong ng Alon sa Lawang

Sa tabi ng dagat, isang biyahe ang hinaharap ko. Sa bawat yapak sa buhangin, sa bawat simoy ng hangin, ang alon ay may kakaibang kwento sa aking damdamin. Sa aking paglalakbay, ako'y naghimlay sa ilalim ng mga bituin, nakikinig sa musika ng karagatan, at bumabalik sa saya na dulot ng dagat.

Ito ang aking kuwento - isang saglit mula sa ingay ng mundo, isang mahimbing na sandali na tanging ang dagat lang ang nagbibigay.

Mula Quezon City, naglakbay ako patungo sa Batangas upang makarating sa La Luz Beach Resort. Dumating ako doon matapos ang halos dalawang oras at limampu't tatlong minuto na biyahe gamit ang kotse. Sa kabila ng layo ng aking nilakbay, tunay na sulit ang pagpunta sa magandang destinasyon na ito.

Sa La Luz Beach Resort, maraming magagandang aktibidad na puwedeng gawin kasama ang iyong mga mahal sa buhay. Hayaan niyo akong isa-isahin ang mga aktibidad o serbisyo na magbibigay ng kulay sa inyong bakasyon.

Napakaganda at maayos ang sistema ng pagtanggap sa La Luz Beach Resort. Ang kanilang pag-aasikaso at pagkakaroon ng mga pasilidad tulad ng elevator para sa mga taong may kahirapan sa pag-akyat ng hagdan ay tunay na malaking tulong at nagpapakita ng kanilang pag-aalaga sa kanilang mga bisita. Ang pagbibigay ng security card para sa privacy at seguridad ay isa ring mahusay na hakbang upang tiyakin na ang mga bisita ay komportable at ligtas sa kanilang paglagi.

Pagpasok ko pa lamang sa kwarto, agad kong napansin ang kahanga-hangang lamig at kagandahan nito.

Sa unang palapag, nakita ko agad ang dalawang queen size bed. Kaharap nito ang isang magarbong vanity area kung saan maaari kang mag-ayos.

Meron din silang dalawang banyo; ang isa para sa pagligo at ang isa para sa pangangailangan sa kubeta. Tunay ngang maganda ang disenyo ng kanilang vanity area at banyo, ngunit hindi maitatanggi na mayroong problema sa pagbaba ng tubig sa kanal, na nagdudulot ng abala sa paggamit ng paliguan.

Sa pangalawang palapag, matatagpuan ang tatlong kama na abot-kaya para sa isa hanggang dalawang tao bawat isa. Ang disenyo ng kwarto ay kamangha-mangha, sa dahilang ang mga kahoy ay naayon sa modernong disenyo.

Matapos kong masilayan ang kwarto, dumeretso ako sa kainan ng resort. Sinalubong ako ng napakaraming mesa at upuan na kayang-kayang umupak ng maraming tao. Bahagi ng kanilang serbisyo ang libreng almusal para sa mga mamamalagi ng ilang araw. Aking masasabi na tunay ngang sulit ang inyong babayaran sapagkat ang mga pagkain ay talagang tumpak para sa akin.

Pagkatapos kong kumain, syempre diretso agad ako sa pag-langoy!

Ang La Luz Beach Resort ay may dalawang lugar para sa paglangoy. Una, ang infinity pool na may dalawang bahagi: ang mababaw para sa mga bata at ang katamtamang lalim para sa mga matatanda.

Pangalawa, ang mismong dagat kung saan matatagpuan ang magandang rock formation. Ang kanilang Rock Formation ay madalas na pinupuntahan bilang"'picture spot" ng mga bumibisita dahil tunay itong maganda sa personal. Nakakamangha na kayang likhain ito ng ating kalikasan. Sa malapit, makikita rin ang iba't ibang mga coral reef, na nagbibigay-daan sa iba't ibang aktibidad sa La Luz Beach Resort.

Ngunit nais ko munang ipaalala na hindi ako nakasubok ng anumang aktibidad dahil sa mahigpit na pagpigil ng aking Lolang kabado!

Gayunpaman, ibabahagi ko pa rin sa inyo ang nakakatuwang aktibidad upang maibahagi sa inyo ang kasiyahang maaaring ninyong maranasan.

Una, tuklasin ang ilalim ng tubig gamit ang isang Diving Helmet na may suplay ng gas para sa paglaot. Ang paglalakbay ay magsisimula sa malawak na parungaw sa gitna ng dagat para sa briefing at mga tagubilin. Ito ay nagkakahalaga ng P1,200.00 para sa labing-limang minuto.

DIVING HELMET

Ang paglalakbay ay magsisimula sa malawak na parungaw sa gitna ng dagat para sa briefing at mga tagubilin. Ito ay nagkakahalaga ng P1,200.00 para sa labing-limang minuto.

DISCO BOAT

Sumunod ang Disco Boat, nagkakahalaga ng P2,500.00 para sa limang tao, at may karagdagang P350.00 bawat kasama.

KAYAKING

Ang Kayaking ay nagkakahalaga ng P300.00 kada oras. Ito ay isang aktibidad sa tubig gamit ang maliit na bangka na tinatawag na kayak, kadalasang ginagamit sa paglangoy sa ilog, dagat, o lawa.

BANANA BOAT

Ang Banana Boat ay isang watercraft na hugis saging na hinihila ng motorboat. Nagkakahalaga ito ng P3,000.00 kada sampung tao sa loob lamang ng labing-limang minuto. Samantalang ang jetski naman ay nagkakahalaga ng P4,500.00 kada oras at isang personal na watercraft na inaandar gamit ang jet propulsion system.

BONFIRE

Hindi rin mawawala ang Separate Bonfire na may presyong P750.00, kung saan maaari mong gawin kasama ang iyong mga mahal sa buhay upang magkaroon ng bonding moment.

SNORKELING

At huli, ang Snorkeling. Sa halagang P150.00 lamang, magkakaroon ka ng pagkakataon na masilayan ang ganda ng ilalim ng dagat at makita ang iba't ibang uri ng isda at kanilang tirahan.

Ngayong naipadama ko na ang mga aktibidad, pagtuunan naman natin ng pansin ang kanilang mga magagandang pasilidad. Una, ang kanilang massage center. Napakasarap nito sa pakiramdam dahil talagang mahusay ang mga nagmamasahe doon. Talagang sulit ang bayad dahil nakakaaliw talaga ang kanilang hilot, at nagawa ko pang makatulog sa sobrang ginhawa!

Mayroon din silang bar area na malapit sa dagat. Ito ay perpektong gawin tuwing gabi, lalo na kung nais mong makipag-bonding sa iyong mga mahal sa buhay.

Mayroon din silang mga nakahilera na mga upuan para sa magkasintahang nagmamahalan, na tunay na nakalalambot sa puso na titigan sapagkat sila ay nagpapatuloy sa pagsasama sa tabi ng dagat habang may nagpapatugtog pa ring musika mula sa paligid.

Ang pagbabakasyon sa La Luz Beach Resort ay isang karanasan na puno ng mga alaala at kasiyahan. Sa bawat sandali, naranasan ko ang kagandahan ng kalikasan at ang pagkakaroon ng mga espesyal na sandali kasama ang aking mga mahal sa buhay. Sa pag-alala sa mga ito, inaasahan ko na babalik ako sa lugar na ito upang muling magsaya at mag-relaks. Ngunit, kahit gaano pa kaganda ang pasilidad at tanawin, ang tunay na kaligayahan ay matatagpuan sa pagiging kasama at pagmamahal ng pamilya at mga kaibigan. Ito'y isang paalala na ang tunay na kasiyahan ay hindi nasusukat sa mararangyang lugar, kundi sa mga espesyal na sandali na ibinabahagi natin kasama ang mga taong mahalaga sa atin.