darkfarmfireathlete

[darkfarmfireathlete]

انت ممكن أمك البيولوجية تخلفك وترميك جنب جامع او فى كوم زبالة .. وممكن واحدة ست لا تعرفك ولا تعرفها تاخدك وتتكفل بيك وتربيك وتعلمك !!

هكذا حال الأوطان يا سادة .. وطنك ليس المكان الذى ولدت فيه ولكن هو المكان الذى يحفظ آدميتك وكرامتك وتعيش فيه آمنا مطمئنا !!🤔

[darkfarmfireathlete]

الشرير البريء!

فاكر ف المدرسة زميل التختة لما كان متخاصم معاك، وكنتم قاعدين ف الحصة والمدرس بيملّي الواجب، وانت ما سمعتش جزء من كلام المدرس فسألته (هو قال إيه؟) فزميلك رد يقول لك (لا والله ما سمعتش)! فاكره الواد دا؟

طيب فاكر أبوك اللي كان ما بيحبش صاحب معين ليك، وصاحبك دا عدى عليك وانت مش موجود ف البيت، وقال لأبوك يعرفك إنه عدى عليك، بس أبوك "نسي" يقول لك؟

طيب فاكر زميلك ف الشغل اللي بلغك تفاصيل الميتنج اللي ما حضرتوش، بس "سهوا" ما قالكش إن فيه deadline؟

طيب فاكرة جوزك لما كنتم رايحين عزومة مامتك اللي ما بتنزلوش من زور ع الغدا، وكنتي لابسة وجاهزة وهو فجأة قرر إنه محتاج يحلق وياخد دش لأنه حاسس إن جسمه عرقان؟

طيب فاكر مراتك لما نسيت وحطت غسلة القمصان البيضا كلها ف نهار اليوم اللي معزوم فيه على فرح هاتروحه لوحدك؟

طيب فاكر سواق الميكروباص اللي فضلت تنادي عليه قبل نزلة الكوبري بشوية حلوين (آخر الكوبري معاك يا اسطى) وفضل مش سامعك لحد ما عدى ميت متر بعد نزلة الكوبري، ففجأة وقف وقال (ياللا اللي نازل آخر الكوبري)؟

طيب فاكر مامتك لما طلبتم منها تعمل لكم بطاطس محمرة مقرمشة، فقطعتها صوابع كبيرة وطلعتها م الزيت قبل ما تقرمش؟

طيب فاكرة عمتك لما جت تبارك لك على طلوعك الأولى ف ثانوية عامة وقالت لك (ألف مبروك يا حبيبتي ياللا عقبال ما نشوفك ف بيت جوزك.. أصل البنت مسيرها للجواز)؟

طيب فاكر صاحبك لما قال لك عن البنت اللي بصت لك ف الكافيه (هي بتبص عليك باهتمام، بس ما اعتقدش إنها معجبة بيك)؟

أكيد فاكر أو فاكرة مواقف زي دي كتير

ف المواقف اللي زي دي ممكن تقول إن (عادي بتحصل.. مجرد صدفة غير مقصودة)

لكن لما تتكرر السلوكيات اللي زي دي من حد بعينه، بشكل أشبه بنمط، يبقى مش عادي

ولا مجرد صدفة

دا بيبقى اسمه "العنف السلبي - passive aggression"

العنف السلبي ما يقلش خطورة عن العنف المدمر المتفجر.. قد يفوقه خطورة كمان.. لأنه عنف ف المقام الأول، وكمان خبيث، متخفي.. يخرب صاحب سلوك العنف السلبي عواطف الآخرين ومشاعرهم بدون أثر يتمسك عليه، وبسهولة يقدر يقلب عليك الترابيزة لو عبرت عن استيائك بإنك سيئ النية، وبتفهم غلط، ودماغك بتسبق بسوء الظن عشان انت وحش!

يا للبراءة!

العنف السلبي بينتشر بكثرة في تعاملاتنا، أحيانا نكون بنقصد�� وواعين بإننا بنمارسه، وأحيانا يطلع مننا بشكل غير واعي

ف كلا الحالين هو مؤذي، وبيعبر عن ضعف ف نضج الشخص عاطفيا ونفسيا، وعن عجزه عن المواجهة، وعلامة على تهربه من مسؤولية أفعاله

لما بتحتمل أوضاع سيئة لفترات طويلة، وتعجز عن الخروج منها أو حلها بشجاعة، بتلجأ للعنف السلبي للتعبير عن غضبك مع عجزك

تكون مثلا ف علاقة سيئة ومش عايز تتحمل مسؤولية إنهائها أو مخاطرة التخلي عنها، فتفضل مستمر فيها وقابل أذاها، فتتحول شخصيتك لنمط العنف السلبي الخبيث المتلاعب.. وتؤثر شخصيتك الجديدة السيئة دي على كل علاقاتك التانية حتى الكويسة منها!

جوزك يقرفك ف البيت، فتروحي تقابلي صاحبتك وتطلعي عليها عنف سلبي (الله لون الفستان دا حلو قوي، بس الألوان الفاتحة بتبرز الوزن)!

مديرك ف البنك مطلع عينك، فتقعد قدام العميل اللي جاي يسحب فلوس، وتتباطئ ف إتمام الإجراءات وتزهقه!

بتوع الكارتة والموقف والمرور مش سايبينك ف حالك، فتقعد ترازي ف الركاب، دا ما تبعتلوش الربع جنيه الباقي بتاعه غير لما يطلبه بدل المرة ألف، ودا تنزله بعد ما يطلب منك بمية متر وتخليه يرجعهم مشي، ودي تتحرك بالعربية قبل ما تقعد على كرسيها فتخبط دماغها ف سقف العربية، وهكذا

على صعيد أكبر وجماعي ممكن نطور كمجتمعات نمط العنف السلبي:

مخنوق من البلد ومش عارف تسيبها ولا تغير أوضاعها السيئة، فتتحول لشخصية بتمارس عنف سلبي وهي سايبة إيديها

منظومتك الدينية تبقى مقيدة نزعاتك ورغباتك، ولا قادر تلتزم ولا تتمرد، فتتحول لنمط العنف السلبي (لاحظ مثلا تحجج الموظف الحكومي المتدين بطبعه بالصيام لتبرير خموله وتراخيه عن إنجاز مصالح الناس)!

الفعل الإيجابي حين تكون في وضع سيئ لا يناسبك، إنك تحاول جاهدا تغييره، أو التعبير بوضوح عن استيائك

اللجوء للعنف السلبي يحولك لشخص سيئ بدورك.. لا تصبح بعدها ضحية أوضاع سيئة، وإنما تتحول إلى دور الجاني، الذي يوقع الظلم والأذى على الآخرين بشكل تلقائي ومتكرر!

أما لو بيتمارس عليك عنف سلبي ف علا��اتك الشخصية، فحاول تراقب النمط: لو ظهر لك النمط دا بشكل متكرر من حد، يبقى هاتحتاج ترسم حدود قوية قصاده.. ما تشكش ف نفسك.. أكد لنفسك على مشاعرك وما تتهمش نفسك بسوء الظن.. واجه اللي بيعمل عنف سلبي عليك بأسلوبه، وبلغه إنك مش هاتقبل دا منه تاني.

طبعا مش هانعرف نعمل المواجهات دي مع الشخصيات الغريبة أو اللي بنحتك بيها ف الشارع والمصالح الحكومية وسواقين الميكروباص.. لكن لو ظهرت لك وسيلة تقدر تاخد بيها حقك أو توقف مهزلة العنف السلبي دي ف أي موقف، انتهزها، وما تترددش ف الدفاع عن حقك

لا تكن عنيفا سلبيا، ولا تقبل العنف السلبي من أحد🤔