emanbahaa

[emanbahaa]

كان يو سبيك ارابيك؟!!

تاني قلم بينزل يصفر ودن كل ام جديدة ، انها بتكتشف ان البيبي بتعاها من قبيلة ( جاميكا) بتاع محمد هنيدي فى فيلم يانا يا خالتي، لغته كلها عبارة عن كلمة واحدة " اعاااااااااااااااا" و المشكلة الاكبر و الاشمل و الاعم، انك بتبقى ام جديدة نوڤى بالسوليفانة مش عارفة اصلا هوا ايه اللي حصلك ف المستشفى من شوية و مين الواد ده و ماله مش شبهي ليه، و ليه ماماتك و خالتك و حماتك مصرين انك جعان و عايز يرضع مع انه لو عنده اي مشكلة تانية هيقول نفس ال " اعااااااا" مع اختلاف حده الصوت مثلا، مش هيشاور على بقه لو جعان، مفيش اي وسيلة مساعدة، و تحسي فجأة ان كل كبار السن ف العيلة بيتمثلو ف جورج قرداحى فى طريقته ف الضغط على الضحية .. آآ اقصد المتسابق و هما بيسألوكي " هوا بيعيط ليه؟!" و الاختيارات هيا " ١- جعان، ٢- جعان ٣- جعان، ٤- جعان" طبعا حكايات و اساطير لبن السرسوب لا تفني ولا تسحدث من العدم و من ضمن الاساطير ان لبن السرسوب ده بيبقى اول ربع ساعة رضاعة و بعد كدة السرسوب بيخلص، فاللى هوا الحقى بسرعة جدا رضعى ، يلا رضعي ، رضعي يا بنتي قبل ما باب السرسوب يقفل، و بعدين نعدي مرحلة السرسوب و اللي مسرسوبش، و بقيت تعرفي ترضعى الحمد لله، هتلاقيه برضه بيعيط، هتغيري له، هتلاقيه بيعيط هتحميه هتنيميه هتغطيه هعتريه هيعيط برضة، و اي واحده ست كبيره هتشوفه/ا هتقولك بعد مصمصة شفايف عديده، " ياعيني شكله جعان" يعني انا احمل فيه تسع شهور و ازلطه و بقاله فتره بحاول افهمه و قاعده جمبه ليل نهار و مش عارفه هوا عايز ايه و حضرتك جيتي بالخبره و الحنكة فى النظرة الخاطفة دي فهمتي انه جعان، طب ولو لسة واكل ؟!، " يبقى اكيد مشبعش، يبقى لبنك خفيف زي الميا و مبيشبعش" حضرتك ايش عرفك؟! كنت رئيس مجلس الهيئة المسؤلة عن افراز اللبن فى جسمي عشان تحددي ؟! المهم انه بيبيقى برضة مش بينصفك يعني ميجيش مره ف صفك كدة و يكبس الناس دي، لا يقعد يعيط، و الناس كلها كلها بلا استثناء، هتلاقيهم اول ما يشوفوه بيعيط يقولولك " هوا بيعيط ليه؟!" يا جماعه انا لو عارفة اولا مش هخبي عليكم، اكيد مش عارفة ماله و خايفة اقولكم لا يتحسد و يبطل عياط، تاني حاجة اهو عندكم اسألوه انتو بتتشطروا عليا انا؟! حد قالكم انى نازلى كتالوج معاه ؟! و طبعا لو قارنا المصريين بغيرهم من الاجناس هنلاقى المصريين اكتر شعب يحب الفتى من نوع " ده جعان، ده عنده غازات، ده تلاقيه حران، ده تلاقيه سقعان" و كمية ال"ده تلاقيه...." غير مبرره، انما الاجانب و بالاخص الالمان، من زينة شعوب الارض، عندهم تحليل منطقى للأمور، مرة كنت فى الغردقة و بتغدي ف مطعم و معايا انس، و كان كل الموجودين اجانب ألمان، فأنس قرر كاعاده انى مينفعش اكل من غير يا يمسي عليا بسرينة متصله منفصله، و كنت ساعتها لوحدي و كان انس حوالي شهرين، احتست بيه و مبقتش عارفة اسكته و خفت الناس تضايق و السياحة تضرب و احنا مش ناقصين ضرب سياحة، و ��كرت لو ان السواح الالمان دول قاموا مشيوا او اشتكوني لصاحب المكان و هيطرودني شر طرده لأنه صحيح انا مصريه لكن كما قال هنيدي ، لما سألته لبلبة " امك ولا رحاب يا طه؟!" " رحااااب طبعا" فإلاجابه هتبقى اليورو طبعا، المهم حاولت استعمل معاه كل الوسائل الممكنة و الغير ممكنه عشان يسكت و ده ابدا، فى النهاية فضلت واقفه بيه و بمرجحه كدة يمكن يسكت، و لقيت الناس بتلف تبصلي قلت بااااس هيبصولى بقرف ، ويقولو بالالماني لبعض، " امهات اخر زمن مش عارفة تسكت حتة عيل امال اللي معاها اتنين و تلاتة تعمل ايه؟!" لكن لقيتهم مش بيبصولى اصلا و بيبصوا لأنس و يبتسمو ابتسامة حلوة كدة، و بعدين بدأوا يشاوروا لبعض عليه و بدأت انا اخاف بقى كمصرية اصيله عليه من الحسد و بدأت اغطي وشه، ( مع ان هما اللى ملونين يعني) و ف النهاية اقتربت مني سيدة المانيه مش اقل من ستين سنة و لكنها ف صحة و عافيه فيفي عبده كدة 😁، و كان انس لسه بيبتدي سرينة جديدة، انا هقولكم الحوار مع الترجمة التعبيرية بالمصري، قالتلى ( بعد ما لاحظت اني ملمستش الاكل لسه): " you can not enjoy your meal” " مش عارفة تاكلي ياختي؟!" انا : " not even for once” “ اعدمك يا حبيبتشى ولا مرة هناني على لقمة" هيا: " it’s always better for men” “ يابخت الرجالة مبيشوفوش اللي بينشوفو" انا: " yes totally” “ اه والله يا حبيبتي" استأذنت مني انها تقرب شويه و تشوف البيبي من قريب و انها تلمس راسه، فلما شافته لاحظت ان عينه مقفله و شكله واضح انه عايز ينام، واضح اوي يعني، قالتلي، " he looks so tired, his eyes look so tired” “ ده عينيه مقفلين خالص" انا: " yes maybe he wants to sleep” " يارب ينام ياختي" و فعلا بعد شويه نام، منغير ما تقولي ده عايز ينام متنيميه او تسألني اشهر سؤال " هوا بيعيط ليه؟؟" و اللطيف انهم دايما بيستأذنوا قبل ما يقربوا منك او من البيبي عشان متخافيش ،، و ده يا جماعه فكرني بنفس السلوك الحضاري بتاعنا لما بيبي يقع وسط شوية امهات كل واحدة تفضل تبوسه و تفعصه من غير اي مراعاه ليكي و لو اعترضتي تأيير منك و تقول " هيا فاكرة محدش خلف غيرها ولا ايه هوا احنا هنحسده ولا هناكله!!!" غير النصايح الغير طبية اللى عفا عليها الزمن اللى بتسمعها الام المسكينة المتلخبطة اللي مش عارفة لسه تفهم طبيعية البيبي بتاعها ولا عارفة ايه الصح ليه، و الله لو قلتي لواحده من دول اصل الدكتور قال، يبصولك شذرا كدة و يقولولك ، " الدكتووووررر!!!!" و تبدأ سلسلة من الاعتراضات بداية من " اسأل مجرب ولا تسأل طبيب" " وهوا الدكتور حمل ولا ولد ولا ��ال عيال زيينا؟!" " مااحنا ربينا عشره بتلطريقة دي و طلعوا كلهم زي الفل اهو قدامك" و يوصلوا لمرحلة الحرب، " انتي هتكدبينا و تصدقى الدكتور؟! " " انتي عنيده جدا و مش بتسمعى غير كلام الدكتور" ايوة يا فندم حضرتك الدكتور ده ممكن يبقى جوزك او اخوكي او ابنك او جوز بنتك او جوز خالتك يعني مننا فينا مش جايين من تل ابيب، و عادي ده راجل عنده علم و مضيع عمره عشان يفهم الاطفال و يعالجهم حضرتك بتقارني نفسك بيه ليه و خاصة و حضرتك ممكن تبقى خريجة تجارة او اداب و عمرك ما قريتي بوست حتى عن اى حاجة تخص الاطفال، فليه نحط نفسنا ف مقارانات غريبة و مدهشة ف نفس ذات اللحظة ؟؟ و ف يوم و انا ف حيرة من امري ف موضوع العياط اللي عمال على بطال ده قررت استشير الدكتورة اللى كنت متابعة معاها، فقالتلى بالراحة كدة، ان فيه اسباب كتير جدا جدا لعياط البيبي و ممكن يكون منهم انه كان ف مكان ضيق و محتويه و خرج للدنيا الواسعة فلسه متكيفش و متظبطش غير انه دايما عايز يبقى حاسس بوجود امه و بيبقى عايز انها تحسسه بوجودها، و طبعا انا سبت الاسباب الكتيرة ومسكت ف دي، فقلت خلاص انا هحضن ابني و اغنيله كتير فيحس اني موجودة و يحس بالونس و يهدا و يبقى جميل، و فعلا مع الوقت بدأ يهدا عن الاول ،،، و بدأت احس ان الله ايه ده انا بقيت بعرف اتعامل شويه، و ف يوم كنت ف مصلحة حكومية حزينة بخلص ورق حزين و كان في صف طويل حزين و راجل احزن من الحزن معطلنا كلنا و المصلحة فيهاش غير الراجل وًالصف بتاعه، انس بدأ يعيط و ينهار، و اذ فجأة طلعتلى واحدة غريبة مريبة عمري ما شوفتها قبل كدة قالتلى: " شكلة جعان، اغطيكي بالخمار و ترضعية؟!"

[emanbahaa]

بتعرفى تعدي لحد كام ؟؟!!

كل واحدة متجوزة عارفة ان كل راجل فيه حاجة مميزة، كطبع او ميزة، و كل راجل له لقطة كوميديا، حتى و هوا معندوش فكره انها كوميديه، بس بتبقى دمها خفيف و ان كانت ف بعض الاحيان مستفزة بس الست بتسلم امرها لله فى النهاية و بتاخدها على انها خفة دم و دعابة، و بتبطل اڤورة، انا اكتشفت لقطة جوزي بعد شوية من الجواز، فى فترة الحمل ،و كان حملي صعب شوية و تعبت جامد فإضطريت فى فترة ما اروح اقعد عند ماما بتاع اسبوعين تلاتة، و كانت الفترة دي فترة ضغط جامد فى شغل أمير و كان بيرجع البيت ساعتين ينام و يقوم ينزل الشغل، المهم قبل ما اكمل اقولكم الأول انا و امير عندنا عادتين غريبتين، انا من الناس المريبة اللي بتمم على المطبقية كل يوم بعد تشطيب المطبخ، اللي هوا بتمم على عدد المعلاق و الشوك و السكاكين و الاطباق و الحلل و الكوبايات و الفناجين وكله و لما بلاقي حاجة ناقصة بدور عليها ف التلاجة ولو ملقتهاش ببدأ اعلن حالة الطوارئ و الم كل المشتبه فيهم فى اختفاء مطبقيتي، و أمير بيحب دايما يشرب شاي او قهوة قبل ما ينزل من البيت مباشرة، و دي مش اللقطة، دي عادة عنده كنت بستغربها فى الاول و بعدين خدت عليها و بعدين عجبتني فبقيت اعملها انا كمان 😁، المهم رجعت بعد غياب عن البيت، رجعت اشوف ايه اللي حصل لمطبقيتي و الحق ما يمكن الحاقه، أمير كان حريص اني ارجع الاقى البيت شكله نضيف و مترتب، حرصا منه اني منهارش لما اشوف البيت مكركب و انا كنت بتلكك ساعتها عشان انهار الصراحة 😁، المهم جاب بلالين و علقها و عملي جو استقبال بقى مهيب كده خلاني مخدش بالى من الشقة اصلا و كنت متفجأة و مبسوطة اليوم عدى على خير، تاني يوم و انا بشطب المطبخ، و بتمم على المطبقية، اطباق تمام، حلل تمام، معالق تمام، شوك، سكاكين، كله تمام، الفناجين ،،،!!! ايه ده ؟! حوالى فوق العشر كوباية و فنجان ناقصين من المطبقية، ايه ده فيه ايه؟ احنا اتسرقنا ولا ايه، جريت على اوضة النوم اشوف الكومديونهات، ملقتش حاجة، بصيت ف التلاجة، ملقتش حاجة، لا ده انا اروح فيكم ف داهية، دي المطبقية دي اغلى من حياتي ، و بدأت اشك فى امير، هل كسر الفناجين؟ هل اتبرع بيهم للأمن؟! ولا حد من الجيران اتزنق فيهم؟! هل اخدهم الشغل و سابهم هناك؟! الشك هيجنني،،، طلعت الريسيبشن و بدأت ادرك الحقيقة، الجزامة عليها مثلا تلات اربع كوبايات، تربيزة الانترية عليها زيهم، جمب و تحت الكنب، البوفية، السفرة ، كان ناقص الاقيهم فوق النجف، الحمد لله جمعتهم كلهم سالمين، و بعد ما غسلتهم و رصيتهم و ارتحت نفسيا، قعدت افكر، و استنيت امير لما جه من الشغل، و اول ما وصل استقبلته بفرحه و انا بقوله الخبر السعيد، " أمير ، انا جمعتهم كلهم" امير باستغراب غريب " جمعتي ايه ؟؟" "جمعت الكوبايات و الفناجين، هوا انت مش كنت م��بيهم عشان الاقيهم و تجيبلى حاجة حلوة ؟؟!! مش دي مسابقة جمع و اكسب ولا ايه 😂😂!!" سكت كدة و هوا مش فاهم اصلا انا بتكلم ف ايه، قلتله " ما اصل مافيش تفسير منطقى او علمي انك تبقى قاعد ف امان الله و تحط فنجان القهوة تحت الكنبة الا لو مكسور او انت عاملى مسابقة" ضحك كدة و هوا مش فاهم اوي لسه بس حاسس بالمشكلة، و قالى تجنبا لهرمونات الحمل " اه يا قردة لقتيهم كلهم؟! طب تحبي اجيبلك ايه حاجة حلوة؟!" " هاتلى فرد أمن يقف على المطبقية و يتمم عليها اخر اليوم "

[emanbahaa]

يا نوم يا نووووم

طبعا قطعا مما لا شك فيه، أول قلم بتاخده كل أم جديدة بعد الولاده ، ( غير الولاده و صعوبة الحركة ما بعد الولادة و كل الحاجات اللي بنفتكرها نعيط دي) هوا ازاي فيه كائن بالحجم ده يمنع عني النوم بالشكل ده، اعتقد اصغر كائن حي منع عنى النوم كان القطة اللى على السلم و هيا بتصوت عشان بتولد ( برضه 😁) و ساعتها حطيت مخدة على ودني و نمت برضه عادي جدا، انما يجي المخلوق ذو الجرامات المعدودة بعد ما طلع عيني ٩ شهور عشان يطلع و طلع كل حاجة و هوا بيطلع، يمنع عني انا النوم !! ليه ؟! ده كنت بنام كما الملاك فى سابع نومه ولا حد كان يقدر يصيحني، و كنت انام براحتى، يا سلام ! كانت تيجي على ايام انام بال٨ ساعات، ايام ما كان النوم ببلاش كدة و الواحد كان بينام من غير ما حد يجروء يصحيه، لا و ايام كنا نتبطر على النوم و نسهر بقى و ننام قليل و نطبق و مروح الشغل مطبقين و كنا مبسوطين، طبعا الكلام للأمهات اللي عندهم طفل واحد، اما اللى عندنا اتنين و تلاتة ماشاء الله اللهم بارك، دي نسيت المعنى اللغوي للنوم، دي تلاقيها اقرب للزومبي من الانسان، و دي بدل ما تضيع وقت ف قرايه هذا البوست السطحى، تخش تشدلها ٥ دقايق قبل المعركة ما تحتدم تاني ، لكن من اول يوم امومة، و انتي بتنامي على مزاج البيه او الهانم الصغننين، و ياريت بتكملى ساعتين على بعض، لأ ازاي، ده انتي هتصحى كل ساعة ولا ساعتين ترضعي او تحضري الرضعة لو بترضعى رضاعة خارجية و تغيري و تشطفى و لما النوم يروح من عينيك و متعرفيش تنامي تاني ، و الموضوع يكبر و وشك يبقى شبه العيال اللي بتشم كُله، تلاقى كبار السن و مهيبين الركن فى عيلتك او عيلة جوزك يقولولك " انتي اللي غلطانة، لما ينام انتي تنامي على طول" فانتي تبقى حاسة اللي هوا " حاضر يا جماعة هصلح الزرار و و اشغله على طول " طبعا ماهما فاهمين ا�� النوم ده زرار هتدوسي عليه هتنامي، هتدوسي عليه و هتنيمي البيبي، هتدوسي عليه تلاقى نفسك ف جزر المالديفز ، و كدة يعني، انا شخصيا ابني من ساعة ما اتولد و هوا عنده طريقة مبتكره فى تنبيهي انه صحي ، مبدأيا هوا بيصحى بطريقة بوليس الآداب وهوا بيقتحم احدي بيوتش التشدعارة، بيصحى بسرينة و هجوم مفاجئ على ايا ما كان جمبه، غير انه كل نص ساعة تقريبا لازم يفتح عينه و يأمن عليا اني هنا اني مسهتهوش و هربت بالبامبرز بتاعة برة مصر مثلا! و مع ذلك بعد فتره غير وجيزة من الزمن بدأت اتأقلم و بدأت اعمل حاجات غريبة و مريبة و بدون ادني وعي او ترتيب منى، يعني مثلا، انا صحيت ف يوم جمعة جميل ( و ده يوافق يوم اجازة جوزي اليتيمة) و دخلت المطبخ احضر الفطار، لقيت أمير جاي يبصلى بإستغراب كدة و يقولى بحذر: " صباح الخير ، انتي كويسة؟! " بصيتله بضحكة بلهاء اللي هوا ايه ده انت بتطمن عليا من غير سبب يا حب عمري ، قلتله " ايه ده الله انت بتطمن عليا؟! انا كويسة يا قلبي طول منتا كويس" و بعدين قالى بنفس نبرة الصوت: " هوا انتي مش فاكره اي حوار دار بينا قبل اللحظة دي انهاردة ؟!" بصيتله كده بعمق، اللى هوا بدأت اركز احنا مين و فين وازاي، و انهاردة كام و ابننا اسمه ايه، و حاولت للحظة افتكر جوزي اسمه ايه اصلا ( حدث بالفعل) و بعدين رديت عليه بثقة متناهية لا تتماشى مع الامنيشيا المؤقته اللي عندي : " لا مفيش حوار قبل ده، انا لسه صاحية اصلا و مش فاكره اني شوفتك بعد الغدا امبارح اصلا " تخلى أمير عن نبرة الحذر و بدأ يضحك، و قالى :" الحمد لله يا إيمان انتي بقيتي تتكلمي و انتي نايمة" طبعا انا كل ده مش مدية ادنى خوانة و فكراه بيهزر و بعمل الفطار بسرعة قبل انس ما يصحى و يقعدنا جمبه، و بقوله : " يلا بكره همشى وانا نايمة كمان" ، لقيته بيقولى:" لا بجد والله انتي صحيتي من شوية و نديتى عليا و قعدتي تحكيلي عن واحده ست جاتلك و انتى واقفة من الشباك و سلمت عليكي و قالتلك تخلى بالك من حاجة و انتي كنت بتحاولى تقوليلي ايه هيا الحاجة دي و مفتكرتيش" طبعا انا سيبت اللى ف ايدي و برقتله، انا اصلا لا بقف ف شباك، ولا اعرف ستات، و انا اصلا مش فاكرة اني صحيت و فوقت و اتكلمت مع حد قبل اللحظة دي، و بدأت احس اني مش عارفني و اني تهت مني، " لا والله انا قلت كدة؟!" " اه والله انا كنت قلقان لتكون واحدة نصابه و عرفت البيت ولا حاجة" " لا والله الكلام ده محصلش اصلا ولا شفت حد ولا كلمت حد انت اول واحد اكلمه انهاردة اهو" ضحك و قالى: " خير خير انتي بس عشان مش بتنامي كويس " بعد كام يوم قررت اني اراقب تصرفاتي، و اركز اني لما اصحى اتأكد اني ف نفس الوضع اللى نمت فيه ( الفيل الازرق لفرز ويل ريليت) اكتشفت اني بعمل حاجات كتير وانا نايمة، زي اني مرة نمت ف جنب من السرير و انس جنبي، صحيت لقيتنا معكوسين اللي كان يمين بقى شمال و العكس و كان انس لسه لا بيتقلب ولا بيتحرك !، مرة صحيت لقيت نفسي قاعدة مربعه على السرير مش نايمة زي ما كنت، و كذا مرة حد يقولى انك كلمني و انا رديت و كنت نايمة و كنت بقول كلام مش مفهوم ! و كان ناقص اصحى من النوم ف يوم الاقيني طبخت و غسلت و نشرت او الاقى نفسي فعلا فى المالديفز، المهم استعوضت ربنا ف قواي العقلية و وصيت ايا من كان معايا ف البيت سواء كنت فى بيتنا ولا عند ماما انه لو لقاني بتكلم لو بتحرك وانا نايمة، يثبتني ف السرير و يقرا عليا آية الكرسي لحد ما ارجع انام زي الناس او اصحى اتكلم الكلام الطبيعي، و تحملت كل عدم التركيز بسبب عدم النوم و النوم المتقطع، و تعب الاعصاب و ضياع المستقبل و شكوك الناس ف قواي العقلية و فى النهاية ابني وصل لمرحلة انه بقى بعد ما بنيمه بيتقلب و يروح ينام بمنتهى الصفاقة ف حضن ابوه !!!!!

[emanbahaa]

استعنا على الشقا بالله

بناءا على طلب الجماهير و نظرا لفراغي الداخلى، و بعد الحاح مميت من صاحبتي اللي مش هقول اسمها عشان ربنا ستار حليم "ضحى عفيفي" قررت اكتب مذاكراتي و اشارك الجلوب الحزين مغامراتي السعيدة كأم و كزوجة و "عاجز عن العمل" بصوت سعيد صالح 😁 و طبعا عشان الحقوق الملكية و خراب البيوت اللي ممكن يحصل، فنحب ننوه انه: كل الاحداث المشار اليها فى هذا البلوج كن وحي خيال المؤلف و اى تشابه بينها و بين الواقع ف"والله ما انا دا اختشي منى" هذا و الله الموفق و المستعان 😁 ايمان بهاء الدين