abdallah98

[abdallah98]

گاعد بغرفتك بأمان الله .. دتكرّز حَب بأيد وبطل البيبسي بالإيد اللخ ودتتفرج على مسلسل لگيته بالصدفة على ايجي بيست ومطفي الاضاءة ومستمتع بالأجواء فول ،

.

.

فجأة تحس بالهزاز المزعج مال تلفونك ، تباوع عالتليفون تلكه صاحبك الحقنه الحاچي وياه قبل 12 دقيقه ديتصل بيك عالواتساب:

- ها؟

+ نسيت اسألك , قريت الامتحان مال باچر لا؟

- ها! (ودي كانت الصدمة) صدگ تحچي؟ مادري عدنا امتحان ، نسيت ، شلون ، شحنسوي؟! (إنسد التلفون)

.

.

من وره هذا الخبر خربت الاجواء عليك وتنغصت السهرة بعد .. بس رغم هذا بعدك دتكرّز بالحَب لأن توّترت ولازم تفكر شتسوي.

.

مبدئياً .. انت مفاتح المادة ومتعرف شنو البيها ومتكدر تغش لان الامتحان شفهي ، فراح تعتمد على الله وعلى عمو گوگل لعلا وعسى تلگى فد طريقة تفيدك تحشر بيها المادة بمخك بهالكم ساعة الباقية گبل الامتحان.

.

وچان يطلعلك بأول نتيجة بحث ، فيديو اسمه إتعلم شلون تتعلم (بس بالانگليزي) والاستاذه الي دتشرح اسمها "باربرا أوكلي Barbara Oakley

.

.

المهم ..

.

جيبلك ورقة وقلم وإنتبه للنقاط لأن حتشرحلك شلون تهكر مخك وتخلي أي معلومة تشوفها تلطش بي:

.

1- إربط أي معلومة تقراها بفد صورة تضحكك او فد ميمز ، لأن دماغنا العزيز يتذكر الصور اكثر من الحچي اللي يسمعه.

.

مثلاً ، حضرتك گاعد ويه جماعتك ودتريد تفيّك عليهم بأن شلون عندك ذاكرة تشگ شگ وحتتذكر كل الگالوه وبالترتيب فتسألهم يگلولك أي شي وأنت حتتذكرة الهم ورة ساعة ،

صديقك حمودي گلّك دُب ، فأنت اللي حتسوي إنك تتخيل صورة لحمودي گاعد يركض ووراه الدُب , هالشي مراح تنساه.

صديقك فراس گلّك كرسي ، هنا تتخيل لقطه لفراس گاعد على كرسي مكسورة رجله وحيوگع بالگاع .. وكمل على هالنحو

.

.

2- بالنقطة هايه لازم تطلع "علي صابر" اللي بداخلك و حاول تخلي الحان عالجُمل اللي تشوفها. لأن الالحان يعتبرون اسهل طريقة تهكر بيها مخك العزيز وتخلي يحفظ بيها المعلومة ،

مثل من اگولك "طارش .. رحت للبصرة" حضرتك تلقائيا لحنتها من گد ما سمعت الاغنية وإنعادت عليك.

.

.

3- اذا تريد فد معلومة تبقى لازگة بمخك ومتطلع لو شميصير .. كل التسوي هو إنك تضل تراجعها على فترات طويلة واللي يسموه بـ "التعليم المتباعد".

مثلاً سمعتلك كلمة بالانكليزي مسامعها من قبل ، اللي تسوي هو إنك تبقى تقراها مرة باليوم ولمدة اسبوعين وراها الف مبروك ، حتبات براسك.

.

4- الاستاذه باربرا العزيزة تگولك اكو طريقة رابعة تكدر تسويها حتى تبقي المعلومة بمخك .. هي إنك تكتب النقاط اللي تريد تحفظها بقصاصات ورق صغيرة وتخليهم بأماكن مختلفه بالبيت.

.

مثلا دتريد تحفظ اشهر السنه بالانكليزي .. تعلك ورقة January بالمراية مال غرفة ، وراها من حتنزل تفتح الثلاجة حتلكى ورقة February عليها ، ومن تبدل حتفتح الكنتور الي بي ورقة March .. وإلخ

.

بس الاستاذ دزلكم بأن الامتحان تأجل لأسباب لوجسيته فأنت حتكمل سهرتك وترجع تكرّز حَب عادي.

وهاهيه ،