elzomorjourney

[elzomorjourney]

- نصيحة مني يا إيمان ما تصاحبيش 

= منا مصاحبة 

- إيه ده بجد؟ 

= اه ما هو قدامك أهو

الحمد لله صاحبها كان قاعد بعيد وما أخدش باله :"D

[elzomorjourney]

مواسير وصرف وما إلى ذلك

الشقة بتاعتنا اللي في الهرم حاصل فيها مشكلة (المشكلة في السباكة بتاعة العمارة كلها) وجارتنا اللي تحت كلمتني علشان نحل وبتاع، واتفقت في الآخر أنا وبابا إننا مش هنحل لوحدنا، وإن الحل الوحيد إن العمارة كلها تشترك وإحنا أول ناس مستعدين ندفع

وأنا في دهب جارتنا اللي تحت كلمتني، والسقف عندها بينقط وبتاع ومش عارف إيه، المهم كلمت بابا واتفقنا، وكان المفروض أكلمها أقول لها الكلمتين دول كلمتها وفضلت المكالمة تلت ساعة.. تلت ساعة مناهدة وصوتي يعلى واتنرفز وأشد وأرخي وأضحك

خلصت المكالمة من هنا وحسيت بضغط ابن وسخة على أعصابي.. قعدت ع الرملة وفضلت أعيط، كلمت هند أختي وفضلت أعيط لها في التليفون وهي بتحاول تهدينيي خلصت التليفون وهديت شوية فروخت داخل للشباب جوه.. وقعدت وأنا متنح ف الترابيزة وعيني مرغرغة دموع.. كيشو شافني فقام يقعد جنبي

وده قعد من هنا وروحت أنا مرمي على كتفه واتفتحت عياط وهو عمال يطبطب عليا ويقول لي معلش وأنا منهار من العياط الموقف اللي خدته مع الست دي كانت أتقل بكتير من قدرتي ساعتها بس كان لازم يتاخد، حرق فيا كتير فشخ وكان لازم يحصل لي الانهيار ده بعدها

المهم بقى إن اليوم ده كان غريب جدا، حصلت حالة وفاة لحد صديق سماح، وكانوا بيحاولوا ما يعرفوش صاحبتها علشان ما تنهارش، فصاحبتها عرفت وانهارت وفضلت رضوى وسارة وسماح معاها، ولما سارة شافتني بأنهار راحت خرجت بره وفضلت تعيط

اه حابب أقول إن نفس اليوم ابن الوسخة ده قعدت جنب صبارة من اللي هي بترمي كسم شوكها ع الناس دي وفشختلي السويت شيرت وايدي فضلت فيها شوك لمدة ييجي 3-4 أيام بعدها

[elzomorjourney]

الاستقلال التام أو الموت الزؤام

أون أ سايد نوت تاني كلام المجتمع ودايرته مش ثوابت الدين اللي المجتمع متمسك بيه بيعارض فكرة هذا ما وجدنا عليه آباءنا

كانت البنت بتاعة الاسبتالية عاملة بوست عن تطور تعامل الأزهر مع الختان من الموافقة للتحريم للتجريم.. هل فيه حاجة اتغيرت؟ لأ.. نفس البنات ونفس الأزهر ونفس الأدلة ونفس المجتمع ليه بقى ماسكين في حاجات معينة في المجتمع ولازم ما نحيدش عنها

يعني كنت بأتناقش مع بابا في فكرة محورية جدا، إزاي أنا كولد هأتحول من طفل مدلل في بيت مسئول من أب وراعي، إلى زوج ومسئول عن بيت وزوجة وأطفال وراعي؟! فجأة كده؟! صحيت م النوم لقيت نفسك برعي؟ لازم تحصل مرحلة انتقالية في النص، الطفل ده يتحول لشاب علشان يتحول لراجل

إنما من الدار للنار ده بيعمل مشاكل من وجهة نظري خصوصا لو كان الطفل مدلل جدا ف البيت، بيروح بيت الزوجية عايز يفضل على نفس مقدار التدليل إن ماكانش إزيد كمان والبيت بالنسبة له بيبقى استراحة، مش مكانه أنا محتاج أستقل جدا الفترة دي

كل ما أعوز أجيب حاجة مش بأعرف علشان مالهاش مكان، مش طايق المطبخ ولا الحمام ولا منظر أوضتي عايز يبقى ليا حاجتي أنا بتاعتي أنا أغير زي منا عايز، أعمل أكل، أغسل مواعين يبقى ليا ملكيتي الخاصة

[elzomorjourney]

أون أ سايد نوت كس أم المصطلحات بتاعكم اللي حبستوا بيها الشعور في الناس، وخليتوا الناس ما تواسيش بعض بمعلش، والناس تكتم في نفسها علشان ما تبقاش دراما كوين، وما تحكيش حاجة علشان ما تبقاش أتنشن هور

[elzomorjourney]

ما يقع إلا الشاطر

عمر صابر لفت نظري لحوار وقعة العجلة فأنا حابب أشارككم وقعات العجلة في دهب 

1- أول وقعة كنت راجع من Adam's بالليل وكنت متضايق جدا وحاسس إني لوحدي بلا أنيس ولا جليس، وما حدش مهتم بيا ولا بيسأل عليا، فالمهم ركنت قدام محل أكل (وكان العود على ضهري) وجيت أنزل، الكرسي كان مرفوع فشخ لفوق  وأنا بأسحب رجلي، علقت في الكرسي ووقعت وقعة وحشة أوي ماحدش جه غير وأنا بأقوم، واللي كان واجعني أكتر من الوقعة إحساس إني مش هألاقي حد يطبطب عليا ويقول لي معلش وسلامتك قمت وأنا عمال بأتمتم.. الحمد لله الحمد لله

2- الوقعة التانية دي كانت غريبة جدا، كنت راجع من اللاجونا بالليل فقابلت ناس ووقفت معاهم شوية، بعد كده جيت أتحرك، تقريبا (تقريبا علشان أنا لحد دلوقتي ما أعرفش وقعت إزاي بالظبط) سلك السماعة شبك في الجدون فرحت واقع وقعة بنت وسخة  ونفس الإحساس بالوحدة والوجع اللي مش لاقي حد أشاركه معاه فضل مسيطر عليا، وبعد ما قمت لقيت اتنين جايين من بعيد بيطمنوا عليا، قلت لهم أنا تمام الحمد لله، وشديت العجلة واتحركت

3- آخر وقعة دي تقريبا كانت أتقلهم وما زالت معلمة فيا لحد دلوقتي في رجلي وفي إيدي، كنت ماشي في طريق آخره رصيف، فبأنزل الحتة العالية بتاعة الرصيف دي، وكان معايا حاجات ف إيدي فكنت ماسك الجدون بإيد واحدة، وهوب نزلت من ع الرصيف لقيت نفسي في الأرض  المرة دي بقى حتى ماحدش بص عليا.. نفس المشاعر، ونفس التمتمة بحمد الله، ونفس العدلة بتاعة للعجلة ومشيت ودي كانت وقعاتي بالعجلة في دهب.. نشوفكم مع موضوع أكثر إثارة

[elzomorjourney]

Jinn - Lemon mint 10%

طول عمري كنت بأخاف أشرب خمرة، علشان ما أسكرش ولساني يفلت، وعلشان ما أدمنهاش، وعلشان ما أأفورش وأرجع، وبعد كده علشان حرام الخوف الأول.. دايما كان الخوف الأول وفي دهب كانت محاولات كسر الخوف، وبتشجيع من الثيرابيست بتاعي

على مدار أسبوعين (جلستين) بيحاول فيهم الثيرابيست يزحزح جبل الخوف ده علشان أجرب، علشان ما أخافش، علشان أعرف ولمدة أسبوعين عمال بأقاوم، ومع الوقت المقاومة بتضعف بتضعف لحد ما منى مجدي جت، واتفقنا نشرب سوا

يلا نشرب بكرة؟ خلاص تمام، هأجيب Jinn لمون نعناع وأشرب معاكي بكرة.. وأنا مروح يومها لقيت واحد على ناصية الشارع مأفور وعمال يرجع... نمت وصحيت والفكرة كانت تراجعت في دماغي وحتى قابلت منى قلت لها أصل كلام الليل مدهون بزبدة يطلع عليه النهار يسيح

وفعلا كنت خلاص قلت مش هأشرب، وجه بالليل وروحنا البار مع الناس كلها وكنت حاسس إني مش كويس، القعدة كلها بتشرب وأنا لأ، ومنى كانت قامت بعيد لوحدها، فروحت لها وق��ت لها إني ماشي، ماكنتش كويس بس ماكنتش عايز أضغط عليها.. سبتها وقمت علشان أروح

في الطريق فكرت.. بكل الدوشة اللي في دماغي دي، طب ما أجيب إزازة وأقعد أشربها ع البحر فاكس، لأ مش فاكس.. وهكذا لحد ما لقيت نفسي وقفت قدام المحل ونزلت أجيب الإزازة.. جبتها ومشيت قابلت أشرف خدت مفتاح البيت، وقلت أنا هأرجع أشربها ف البيت لوحدي

طول الطريق كان فيه حرب بنت وسخة في دماغي.. مقاومة رهيبة من الطرف الخايف، هتخسر كل اللي عملته ف حياتك، هتسكر، هتأفور، هتغضب ربنا أكتر منتا بتغضبه، بتخسر نفسك والناحية التانية فيه طرف بيدافع عن كل ده، وفضول بينمو من تخت طبقات كثيفة من الكبت

تفكير وخناقة جوه دماغي وأنا سايق العجلة لدرجة إني كان نفسي أرزع دماغي في أي حاجة علشان تسكت لحد ما وصلت البيت طلعت الازازة وشغلت أم كلثوم هذه ليلتي وقعدت ع السرير وفضلت أبص ع الإزازة عمال أبص عليها ونفس الخناقة شغالة ف دماغي طب دوقها بس، ما تشربهاش كلها، دوقها وادلق الباقي

طيب ارميها، ما تشربش، ما ينفعش تشرب، محمد الزمر ما ينفعش يشرب، هتسكر ولسانك هيتفك، هتدمنها وتبقى ماشي بتلهث على خمرة، أهلك هيعملوا إيه لما يعرفوا إنك شربت وسكرت، بقيت من بتوع الكاس خلاص، الخمرة والقمار والنسوان .. علشان أسكّت الدوشة دي رحت فاتح الإزازة.. لحظة وبدأت أشرب

طبعا اللي جي ده تجربة شخصية بحتة علشان أنا شخص عنده حموضة، فطبعا الكحوليات ناكتني حموضة :'D بعد أول بق الحرب اللي في دماغي وقفت.. بدأت أشرب وحقيقي كانت تجربة سيئة جدا علشان ما عجبتنيش خالص :"D بس الأهم، إني كسرت خوفي منها.. ودي من أهم التجارب اللي أنا عملتها في دهب

[elzomorjourney]

ليزا

بعد فترة في دهب عملت أكونت على تندر الناس هناك قليلة المهم كنت عامل لايك لبنت لطيفة اسمها ليزا، وعملت لي لايك باك قلت بس بقى يا زمر الحظ ابتسم لك وخلاص بقى اتفقت معاها هأروح لها مكان ما ع البحر، وروحت هناك يا مؤمن وأفضل مستني، ما بتبعتش، أبعت، ما تردش هل أنا كنت ضحية اشتغالة؟؟

وقعدت ع البحر وفضلت أعيط (طبعا واضح إن دي فقرة ثابتة في كل الحواديت) المهم لقيت البنت بعدها بربع ساعة باعتة لي، إنها آسفة اتأخرت وبتاع وإنها جاية ف الطريق المهم جت وبتاع، وفضلنا نتمشى وأكلنا وشربنا وفي وسط الكلام، بتقول لي إنها عملت تندر علشان تتعرف على ناس جديدة من هنا

يا بنتي ده Dating app بقى ما تدخلوش الاختصاصات في بعض كده تكسري قلب الولد اللي فرح إن حد عبر أمه وعمل له لايك؟ طبعا لا داعي للذكر إن ده كان وما زال اللايك الوحيد على تندر

قابلت ليزا تاني، روحنا أكلنا كشري، وشفتها مع ناس صحابي من المسرح هناك بالصدفة، وشفتهم وهما بيرقصوا سوا (لما روحت لصحابي في الحكاية اللي فاتت وكان فيه صحابي بيرقصوا وأنا مش عارف أرقص معاهم) ودي حكاية ليزا

[elzomorjourney]

آلاء ودولا ومينا وأشياء أخرى

في مرة كيشو ورضوى كانوا رايحين يقعدوا في مكان معين، وبعدين رضوى تعبت فقعدوا في أول مكان صادفهم، فأنا رحت لهم هناك وقاعد بأشتغل في أمان الله، وألاقي بنت جاية تقول لي إنت مش فاكرني؟ إحنا اتقابلنا عند كيرو في إسكندرية كنت قابلتها مرة في إسكندرية وحقيقي بأحسدها على قوة ذاكرتها :D

المهم، آلاء كانت رفيقة لطيفة جدا لمدة أسبوع وشوية تقريبا لحد ما رجعت، كانت شخصية ظريفة جدا، وهي اللي شجعتني إني أنزل البحر في آخر ليلة ليها قبل ما تسافر وقد كان، نزلنا الميه، ويا مؤمن لسه بأعوم عومتين لقيت رجلي نزلت على حاجة (إزاز أو صخر) واتفتحت :D

المهم خرحت من الميه وكان فيه جروب لطيف قاعد جنبنا (3 ولاد وبنت) فبسألهم لو معاهم حاجة للجرح أو كده فجابوا ��ي وايبس وبلاستر، وقعدنا ندردش شوية فاكتشفنا إنهم من إسكندرية،والبنت ساكنة جنب آلاء، وفضلنا قاعدين نتكلم مع الجروب ده وحقيقي من الحاجات الجميلة فشخ اللي طلعت بيها

اليوم اللي قابلت فيه Jordan في البار، الشباب دول كلموني واتفقنا نروح ع اللاجونا، وأنا رايح عديت على صحابي في مكان تاني، وقابلت ناس أعرفهم وكانوا عمالين يغنوا ويرقصوا وأنا بأتحرق من جوايا وأنا مش قادر أعمل زيهم، المهم رحت للشباب ع البحر في أللاجونا بالليل وولعنا نار

عرفوني على واحد صاحبهم بيلعب جيتار اسمه مينا، قعدنا نعزف بالليل ونغني ع البحر حوالين النار وكانت قعدة جميلة خالص، واتعزم عليا بهايدرو وبيرة وويسكي شيكولاتة وأنا رفضت المهم بعدها قمت أروح ووقعت بالعجلة وقعة وحشة أوي والعود كان على ضهري

روحت لقيت الشباب قاعدين وقعدنا نغني شوية وبعدين روحنا..

ليلة قبل ما أمشي لقيت تليفوني بيرن أيوة يا زمر أنا مينا صاحب دولا وأسرف اللي كنت معاكمزفي اللاجونا، فيه قعدة لطيفة هنا هات العود وتعالى لو فاضي خدت العود ورحت على هناك وكانت قعدة لطيفة فعلا

مينا شاب إسكندراني لطيف، دكتور سنان، مستقر في دهب حاليا، ومصاحب واحدة ألمانية وعايشين سوا وكان فيه مصطفى وفرح تقريبا إدغالبا متصاحبين وقاعدين سوا برضه وكان فيه جوزفين :')

جوزفين دي كانت بنت ألمانية برضه جميلة فشخ، من ساعة ما قعدت وهي باصة لي أوي ففضلت باصص لها أوي أنا كمان وقلت بس يا واد يا زمر، دهب بتكافأك في آخر ليلة أهي ببنوتة ألمانية زي القمر وأبص لها تبص لي وأضحك لها وتضحك لي والدنيا لطيفة خالص لحد ما قالوا إنهم قايمين يروحوا

فروحت مميل عليها وقلت لها متخليكي قاعدة شوية قالت إنها تعبانة وعايزة تنام، قلت لها طيب بكرة الصبح إيه قالت لي طالعة هايكنج ف الجبل قلت لها تمام فالمهم قمنا وبأحضنها فرحت قايل لها كان نفسي أشوفك تاني ومشيوا قعدنا شوية وبعدين قمنا نمشي إحنا كمان

فماشي أنا ومينا فبأقول له إن كان نفسي أشوف جوزفين تاني وبتاع، فراح قايل لي عموما جوزفين حامل وهتتجوز قريب.. وهي ذكية وخدت بالها عموما يعني

ممممممممممممممممممم يلا الحمد لله :D

[elzomorjourney]

Trial I?

لما كنت بأروح أعزف في Adam's house الدنيا كانت بتبقى ضلمة إلا من نور النار، فالواحد ماكانش بيبقى مجمع أوي برضه المهم، في مرة كنت قاعد بأعزف ف الشارع، فجت واحدة معدية شكلها لطيف خالص، بصت لي وابتسمت فأنا ابتسمت لها بعدها بشوية قمت من مكاني ورحت على سفنكس أعزف هناك

لقيتها معدية برضه، فابتسمنا لبعض ابتسام�� أكبر فقلت بس بقى، أنا لازم أروح أفتح معاها حديث، فرحت وراها وقلت لها أنا بأعزف في المكان الفلاني وبتاع وابقي تعالي وأنا هأتبسط لو جيتي ومشيت وهي ما جتش :((

تمر الأيام (4 أيام تقريبا) وأبقى قاعد في بار لطيف هناك، فأشوفها من بعيد، شوية ولقيتها مشيت فقلت لحسام رضا أنا هأروح أكلمها المهم قمت وراها وبتاع، وازيك ومش عارف ايه وانتي ماجيتيش ليه وكده، طيب هأستناكي، أنا محمد، أنا عليا وخلاص، سبتها ورجعت على Adam's ومبسوط فشخ بقى

المهم قاعد بأعزف في أمان الله وألاقي مين داخل يا مؤمن، عليا :"D ودخلت دخلة صاحب مكان يعني وسلمت ع الناس وحضنتهم وقعدت :D وأنا قاعد محرج فااااشخ أتاريها كانت بتبتسم لي ابتسامة معرفة علشان كانت حاضرة معانا في Adam's قبل كده كذا مرة :D

واه، هي شكلها كاسرة التلاتين، وكان شكلي حقيقي وحش أوي ساعتها :D

[elzomorjourney]

Jordan - The Canadian guy

كنت فاتح couch surfing ولقيت شاب لطيف من كندا اسمه Jordan فبعتله وكده، فقال لي أنا لسه واصل دهب قلت له يلا نتقابل روحت قابلته وأخدته روحنا جبنا له شريحة وسحبنا فلوس وفطرنا هو مهندس كهربا، اشتغل في كذا حتة، منهم العراق وخاليا بيحضر ماسترز وبتاع

المهم هو اتعرف على صاحبته (بريطانية) في أذربيجان تقريبا، وسافروا سوا تركيا ودهب، وبعدين قعدنا نتكلم في مرة ف بيقول لي إنه كان زي dating coach كده (زي ويل سميث في فيلم Hitch) وقعد يديني نصايح عن الدايتس وكده

يحضرني دلوقتي مشهد شيكو وشريف رمزي في فيلم سمير وشهير وبهير 

- أعرف إيه عن الست؟ الست دي كائن ملائكي 

=طيب خدي دي، سيب البنت تحبك حب البنت تسيبك 

- صح!! صح! 

= البنت يا منير زي طابع البوسطة كل ما تتف عليه تلزق أكتر 

- مش ممكن! أنت من النهارده صديقي

المهم :"D فيه حاجات كتيرة جدا اتعلمتها منه إيه يعني لما تترفض؟ مش مشكلة، عادي يعني مش نهاية العالم، ومش آخر الدنيا البنات دي كائنات عادية، مش وحوش ومش هيعضوك، ممكن تطلب بأدب عادي، ولو اترفضت ما تلحش خد شوية جرأة بس وما تدخلش عليها زي النطع HEY SEXY GIRL I WANNA SLEEP WITH YOU

كان جاب بنت من Couch Surfing برضه على المكان اللي قاعدين فيه، هي أسترالية، بس تقيلة فشخ وكنت بأحس إنها مش طايقة نفسها أصلا.. كان بيحاول يجرأني شوية :D الشاب ده كان مسافر المفروض وراح شرم وبعدين قرر إنه يرجع تاني على دهب، وقلت له تعالى سيب شنطك عندي ف الاستوديو لحد ما تلاقي مكان

هو وصاحبته اتبسطوا فشخ من اللقطة دي، وفضلوا مبسوطين بيها أوي المهم راحوا مكان تاني وجم أخدوا شنطهم، وبعدها بفترة كلمني قال لي إنه مسافر بكرة وعايز يشوفني روحت له ع البار سلمت علهي وعلى صاحبته، وقعدت ف ركن على جنب وفضلت أعيط

كان عياطي ساعتها علشان كنت حاسس إني متكتف، عايز أروح بار وأرقص ومش عارف، عايز أشرب خمرة ومش قادر، عايز أعمل حاجات كتيرة جدا ومش قادر فجأة لقيته سايب الناس اللي كان قاعد معاهم وجه قعد معايا، قال لي are you high? قلت له لأ كنت بأعيط xD

فضل قاعد معايا وعمال يقنعني إن الدنيا لطيفة، وإني شخص كويس وما أتضايقش، وقال لي إن الفترة دي عموما صعبة ع الناس كلها وإني شجاع إني بأروح لثيرابيست وفضل قاعد معايا وسايب الناس حوالي نص ساعة أنا مبسوط بمعرفته وأتمنى أشوفه تاني قريب

[elzomorjourney]

New-Sphinx hotel

كنت معدي بالعجلة وعلى ضهري العود في مرة، فواحد قدام كافيه قال لي ما تيجي تعزف عندنا وكده، أنا ماندو شاب لطيف جدا، الكافيه اسمه سفنكس وفعلا بقيت بأعزف هناك كذا مرة وبعدين بقيت بأروح هناك والولد ما بيرضاش يخليني أدفع، فبقيت بأروح بمشروباتي وأخليه بس يسخن لي ميه

بعد كده، بقيت بأروح هناك أشتغل الصبح، وهو اشترى مايك بقينا نوصله على السماعة عنده ونفضل نعزف بعد العشا، لحد ما أزهق.. طبعا ماكانش حد بييجي ولا بيسمع.. كنت بأعزف للا شيء :D فيه فترة ماكنتش بأروح هناك فماندو كلمني يسأل عليا ما بأجيش ليه

المكان بيعمل فطار الصبح أوبن بوفيه ب 40 جنيه بس ودي من الحاجات العظيمة، بالإضافة لإن الشاي هناك ب 10 جنيه بس، وفيه مراجيح هناك وكذا قعدة لطيفة فشخ

[elzomorjourney]

Adam’s house

أول يوم ليا ف دهب كنت ماشي فلقيت واحدة واقفة بجيتار بتتكلم مع اتنين تانيين، في العادي ماكنتش بأتفاعل، بس قررت إني أروح أسألها بتلعب فين وأروح ألعب معاهم، وقابلت Lee ودي كانت أعظم حاجة حصلت في دهب

Lee عرفتني على الجروب بتاع Adam's house اللي معاهم كسرت خوفي من المزيكا الجديدة، وخوفي من إني أنضم لمجتمع جديد بالمزيكا التقليدية بتاعتي وانتهى الشهر بإني بقيت بأعزف معاهم مزيكتهم، وجزء منها بقى ملازمني لحد دلوقتي

واحد من اللي بيعزف معانا، بيحكي إنه لما قابل Lee من سبع سنين أول مرة حياته كلها اتغيرت، ولما قابلها تاني دلوقتي كانت حياته بتتغير تاني أعتقد إنها غيرت حياتي أنا كمان رغم إني ما شفتهاش غير 4-5 مرات مثلا في السفرية

سمعت أغاني كتيرة جميلة زي 

- وهران 

- على بالي 

- I'm with you 

- I started a joke 

- leaving on a jet plane 

- my life as a duck 

- let the good times roll 

- brown eyed girl

عرفت من هناك Lina، بنت روسية لطيفة جدا نزلت معاها اشترينا عود وقعدت اديت لها حصة، بتلعب جيتار اتعلمت منها إني ما أتدلقش على حد ما أعرفوش، وأتقبل الرفض عادي علشان مش لازم كل الناس تقبل عروضك وده لا يعيبك في شيء

وعرفت من هناك سامح، الشاب الإسكندراني اللي بيلعب جيتار وبيفكرني بفيصل فشخ، أنا حبيته فشخ عرفني على مزيكا جديدة ومختلفة واتعلمت منه إن عادي تبدأ متأخر، وإن دلوقتي ده هو الوقت اللي هتكتشف فيه نفسك فاكتشف نفسك ما تضيعش حاجة وما تضيعش وقت

عرفت هناك عطا الله، عواد فشيخ وأنا كنت منبهر بيه فشخ لحد ما كان بيقدم نفسه فبيقول إنه من إسرائيل الموضوع كان صعب فشخ عليا علشان كره إسرائل وما ينتمي ليها ده من المسلمات، فجأة لقيت موسيقي شاطر فشخ ومجتهد قدامك بس إسرائيلي الدرس؟ مش عارف لسه لحد دلوقتي

عرفت هناك بنوتة روسية، نسيت اسمها.. جت مرة قعدت تسمعنا وكنت بأحاول أ develop eye contact معاها، وبعدين لما قامت روحت أحاول أتكلم معاها فقالت لي إنها مسافرة بكرة :)) اتعلمت إن عادي تبقى ف إيدك وتقسم لغيرك xD لأ بجد اتعلمت إن لازم تسعى وليس عليك إدراك النجاح

عرفت هناك سامح وشريف وعبدالله وميرفت وعليا.. الجروب اللي كان بيتجمع كل ليلة تقريبا حوالين النار ع البحر.. يلعبوا/يسمعوا مزيكا ويغنوا سوا أنا مبسوط حقيقي بالناس دي والتجربة دي جدا

عرفت هناك مصطفى حشيشة، انتربرينير، كان شغال ف P&G وسابها بعد شهرين وفتح زي مكان بيدي كورسات وحاليا ليه كذا فرع في مصر وبراها بقاله حوالي خمس سنين وقاعد في دهب وصوته جميل جداً

تقريبا كنت بأسهر كل ليلة في المكان ده أقعد ألعب مزيكا لحد ما أتعب وأروح أنام رغم إننا كنا بنلعب تقريبا نفس المزيكا كل يوم، بس كل يوم كان حالة جديدة شكرا حقيقي لكل الجروب ده بكل الحاجات اللي اتعلمتها منه والمزيكا اللي عزفتها نعاهم وسمعتها منهم

[elzomorjourney]

دهب 1

رحلة صعبة جدا حقيقي.. الموضوع ماكانش سهل إطلاقا من أول يوم إنك تق مع نفسك لوحدك كل الفترة دي.. وزي ما كنت بأقول للثيرابيست، أنا حاسس إني واقف في أرض كلها ألغام وأنا عمال أتطوح زي السكران وكل شوية لغم يضرب تحت رجلي

كل الألغام دي كانت عبارة عن مخاوف مخاوف كتيرة جظا أنا كنت مخبيها اكتشفت في السفرية دي قد إيه أنا كنت بأخاف من كل حاجة في الحياة 

ما بأعملش الحرام علشان خايف منه 

ما بأكلش علشان خايف أرجع 

ما بأكلمش بنات عشان بأخاف أتحرج 

ما بألعبش مزيكا جديدة علشان يأخاف ما أعرفش أندمج

ما بأتعرفش على ناس مختلفة علشان بأخاف من التهميش 

ما بأتكلمش علشان بأخاف يتقال عليا أتنشن هور

كنت بأخاف أسيب صاحبتي علشان مش هألاقي حد تاني يقبلني 

كنت بأخاف أقول لصحابي حاجة عني علشان ما يسيبونيش 

كنت بأخاف ألبس سلسلة وحظاظات علشان ميتقالش عليا خول 

كنت بأخاف أطلب من أي بنت ارتبطت بيها أي فيزيكال كونتاكت علشان ميتقالش عليا قليل الأدب  

بأخاف بأخاف بأخاف.. ومع كل ده بقى، كنت شايف إني متصالح مع نفسي جدا إني ما بأخافش من حاجة وإني صريح مع نفسي ففكرة الكشف المفاجئ دي كانت صعبة جدا

كل المخاوف دي حرفيا ضربت في وشي ف دهب، وأطلع من دي أدخل في دي لدرجة إني قعدت ليلة عيد ميلادي ع البحر عمال أعيط.. مش قادر، مش عايز، تعبت..

[elzomorjourney]

دهب؟

رحلة دهب اللي قعدت فيها شهر كانت من أهم الأسباب اللي خلتني أعمل المدونة دي، ومنها وفيها اتعلمت كتير أوي عن نفسي وعن حاجات كتيرة أنا عايشها وحاجات أكتر أنا عايزها.. رحلة طويلة ومش هتخلص غير بالموت، بس الأكيد إن حياتي قبل سفرية دهب غير حياتي بعدها تماماً

[elzomorjourney]

أنا مين؟

مساء الخير، أتمنى إنك تكون بخير يا من تقرأ كلامي هذا

أما بعد، فمن أنا؟ هذا سؤال الآخرين ولا جواب له، زي ما قال محمود درويش.. أنا شخص، عدى بتجربة علاج نفسي (ما زلت فيها) واتغيرت كتير، وبأتغير أكتر.. رحلة بحث عن الذات مستمرة بقاالها حوالي 6 شهور لحد دلوقتي ما بين الحرب مع نفسي، وما بين أدوية مضادات الاكتئاب وما بين السند والدعم الغير مشروط من كل الناس اللي حواليا..

أنا محمد الزمر، من القاهرة، 27 سنة.. أظن دي معلومات كافية للبدء، يلا بينا؟