graenavik-blog

[graenavik-blog]

Borgarsýn fréttablað

18. október 2017

Borgarsýn, 19. tölublað fréttarits umhverfis- og skipulagssviðs Reykjavíkurborgar er komð út. Þar koma fram helstu fréttir af framkvæmdum og verkefnum sviðsins, t.d. Heklureitur, Samgönguvika og Hlemmur Mathöll. Hvetjum alla að kynna sér hér.

[graenavik-blog]

Þétting við Snorrabraut, Perlan og Öskjuhlíð, deilibílar og hjólastæði

202. fundur umhverfis- og skipulagsráðs Reykjavíkur

Miðvikudaginn 6. september, 2017

Ný bygging með verslun, þjónustu og hóteli mun rísa næst gömlu Mjólkurstöðinni við Snorrabraut ef áætlanir ganga eftir. Ráðið samþykkti að auglýsa tillögu þess efnis. Mikilvægt er að nýbyggingin styrki götumynd Snorrabrautar sem borgargötu ásamt því að aðlaga sig að byggingum sem fyrir eru á svæðinu.

Tillaga að deiliskipulagi Plús arkitekta á vegna nýbyggingar við Snorrabraut

Mjólkurstöðin nýtur ákvæðis um "Verndun 20 aldar byggingar" og skal taka sértakt tillit til sérstöðu byggingarinnar við hönnun breytinga og viðbygginga. Samkvæmt skipulaginu verður einnig haldið í myndarlegan álm sem er á lóðinni.

Bílastæðakjallari verður undir byggingunni en engin yfirborðsstæði verða á lóðinni. Við útfærslu tillögunnar var einnig sérstaklega tekið tillit til þess að ekki félli skuggi af byggðinni á Sundhöllina og nýtt útisundlaugasvæði.

Skýringamynd með deiliskipulagstilögu. Myndin sýnir ekki endanlegt útlit.

_______________________________________________________________________

Til stendur að ráðast í tímabærar endurbætur á húsinu við Hafnarstræti 18. Sótt er um lyfta húsinu um 90cm, byggja kjallara, rífa skúra sem standa fyrir aftan húsið og byggja þar við á tveimur hæðum. Upphaflega voru tvö hús flutt frá Keflavík á reitinn í við Hafnarstræti á árunum 1795 og 1799 af Jacobæusi kaupmanni en húsin hafa farið í gegnum miklar breytingar í gegnum árin. Ætlunin er að endurbyggja húsið í þeirri mynd sem það var teiknað árið 1924. Húsið mun hýsa verslun í kjallara og 1.hæð en skrifstofur á efri hæð.

Ásýnd sýnir framhlið hússin fyrir og eftir breytingar skv. tillögum P ARK teiknistofu.

_______________________________________________________________________

Nýtt mannvirki við Perluna, hitaveitutankur og stígar í Öskjuhlíðinni var auglýst í skipulagi í sumar og endanlega samþykkt af ráðinu í dag. Deiliskipulag og greinagerð eru aðgengileg á síðu Reykjavíkurborgar.

Í sumar opnaði metnaðarfull náttúrusýning í Perlunni en rekstraraðilar undirbúa nú opnun stjörnuvers í nýrri viðbyggingu. Mannvirkið verður staðsett norðanmegin við Perluna. Það verður að mestu neðanjarðar og tengist núverandi byggingu.

Skýringaruppdrættir af staðsetningu Stjörnuvers (grænblár) og nýjum tanki (appelsínugulur) Landmótunar

Í dag eru tveir af sex tönkum Perlunnar fullir af 35-40 gráðu heitu vatni og er það mat allra hlutaðeigandi aðila að það þyki óásættanlegt miðað við þann mikla fólksfjölda sem sækir Perluna daglega. Skoðaðar hafa verið staðsetningar fyrir nýjan tank í nágrenni Perlunnar sem á að sjá vesturhluta borgarinnar fyrir heitu vatni. Með tilliti til gróðurs, jarðmyndunum, öryggi og ásýnd var niðurstaða athugana að ákjósanlegasti staðurinn væri norðaustan við núverandi tanka eða í átt að Bústaðavegi. Um er að ræða einn tank sem er um 33 m að þvermáli og allt að 10 m að hæð. Gert er ráð fyrir að mögulega verði tankurinn að hlut til neðanjarðar. Möguleiki er á að nýta tankinn sem áningarstað fyrir útivist svo sem útsýnispalla eða til klifurs.

Í breyttu deiliskipulagi er einnig gert ráð fyrir nýjum stígum í Öskjuhlíðinni. Stígarnir eru í samræmi við vinningstillögu Landslags úr samkeppni sem var haldin árið 2013. Hugmyndin byggir á svokallaðri “Perlufesti” sem er greiðfær, nánast lárétt hringleið sem þræðir saman áhugaverða staði, ásamt því að auðvelda aðgengi fyrir alla. Í tillögunni er lagt til að söguminjar verði verndaðar og gert hærra undir höfði með merkingum og fróðleiksskiltum.

_______________________________________________________________________

Fyrirtækið Zipcar stefnir á að opna deilibílaþjónustu fyrir íslenskan markað síðar í mánuðinum. Þjónustan snýst um að stuðla að bíllausum lífsstíl þar sem einstaklingar geta deilt sín á milli bílum Zipcar. Aðgengi að þjónustunni er allan sólarhringinn og alla daga vikunnar. Slík þjónusta er algeng í helstu borgum erlendis og gefur góða raun. Fyrirtækið hefur óskað eftir samstarfi við Reykjavíkurborg og óskar eftir að  leigja bílastæði miðsvæðis í borginni. Deilibílar verða einnig staðsettir á bílastæðum fyrirtækja í borginni.

Mynd fengin að láni af facebook síðu Zipcar á Íslandi

Ráðið samþykkti tillögu sviðsins um verklagsreglur og gjaldskrá vegna leigu stæðanna.

_______________________________________________________________________

Á næstunni verða hjólastæðum í miðborginni fjölgað um 14 í samræmi við Hjólreiðaáætlun Reykjavíkur. 

Staðsetningar á nýjum stæðum má sjá á korti en þær eru eftirfarandi:

Austurstræti 17 - 2 stæði, Austurstræti 12, Hafnarstræti/Veltusund, Bankastræti, Vestan við Kolaport 2 stæði, Hverfisgata/Arnarhóll, Laugavegur 10, Óðinstorg, Laugavegur við Kjörgarð, Káratorg, Laugavegur 77 og Esjuskáli Kjalarnesi.

[graenavik-blog]

Borgarsýn fréttablað

Borgarsýn, nýtt tölublað fréttarits umhverfis- og skipulagssviðs Reykjavíkurborgar er komð út. Þar koma fram helstu fréttir af framkvæmdum og verkefnum sviðsins. Hvetjum alla að kynna sér hér.

[graenavik-blog]

Fuglar, gróður og grænar tengingar í borginni

184. fundur umhverfis- og skipulagsráðs Reykjavíkur

Þema fundar ráðsins að þessu sinni voru græn svæði og umhverfismál. Ýmsar kynningar og umræða fór fram á málum því tengdu.

Fuglalíf á Tjörninni er árleg skýrsla sem kemur út en að þessu sinni eru höfundar Ólafur K. Nielsen og Jóhann Óli Hilmarsson. Hnignun fuglastofnsins hefur átt sér stað síðustu 10-12 árin en spyrnt var við fótum vorið 2014 meðal annars með ungaeldi. Aðgerðirnar virðast skila sér í betri afkomu andanna.

Helstu fréttir ársins 2016 er að gróðurframvinda í friðlandinu í Vatnsmýri er hröð og nokkrar ágengar plöntutegundir sækja á. Hætta er að annars öflugt kríuvarp muni hverfa vegna þessa. Æðarstofninn stendur sérstaklega höllum fæti við Tjörnina enda er vatnið ekki salt lengur sem er ákjósanlegra fyrir æðarfuglinn. Andavarpið gengur almennt betur núna en á síðustu árum en sjö andategundir urpu við Tjörnina sumarið 2016.

Miklar breytingar hafa orðið á vatnagróðurfari í Norður- og Suðurtjörn á síðustu fimm árum en stórar nykrubreiður hafa sést frá 2012 og vaxið mikið síðan. Hugsanlegt er að þetta megi rekja til aðgerða á vatnsflæði í Vatnsmýri og tiltekta í skólpmálum. Vatnið er tærara og betri skilyrði eru fyrir minni lífverur og fæðu en það er helst álftin sem sækir í gróðurinn sem æti. Mikilvægt er þó að vakta ástandið áfram.

Úr skýrslunni Fuglalíf á Tjörnninni 2016

Ítarlegri frétt og tengil á skýrsluna má finna hér.

_______________________________________________________________________

Metnaðarfull stefna Reykjavíkurborgar um líffræðilega fjölbreytni var samþykkt á síðasta ári en aðgerðaráætlun var kynnt fyrir ráðinu í dag. Áætlunin skiptist upp í fjóra flokka -grunnaðgerðir, innleiðingaraðgerðir, sérstakar aðgerðir og framkvæmdir. Sumar aðgerðir eru tíðar og reglulegar en aðrar innan langtímaramma til 10 ára. Til grunnaðgerða teljast til dæmis rannsóknir og kortlagning en í aðgerðaráætlun eru einnig tilgreindir ábyrgðaraðilar innan borgarkerfisins. Aðgerðaráætlunin var samþykkt í ráðinu og send til borgarráðs til frekari samþykktar.

Mynd úr stefnu Reykjavíkurborgar um líffræðilegan fjölbreytileika

_______________________________________________________________________

Reykjavík -Iðandi af lífi er fræðsluvettvangur um fjölskrúðugt lífríki í Reykjavík. Borgarbúar eru hvattir til að fylgjast með dagskrá og ýmsum fræðsluviðburðum sem er boðið upp á. Ráðið fékk m.a. kynningu á skemmtilegu verkefni Hverfisfuglinn sem leikskólar borgarinnar hafa tekið þátt í og má sjá sýnishorn af hér á myndinni.

Hér má nálgast bækling og kort um fuglaskoðun í Reykjavík.

Gott er að fylgjast með viðburðum og fréttum af lífríkinu á facebook síðu Reykjavík -Iðandi af lífi hér.

________________________________________________

Ráðgjafafyrirtækið Alta hefur verið fengið til að kortleggja og greina svokallaðar grænar tengingar í Reykjavík. Græna netið spilar mikilvægt hlutverk í stefnu borgarinnar sem kemur fram í aðalskipulagi. Markmiðið er að tengja saman græn svæði í borginni til útivistar, sem samgöngukerfi en líka til að auka og halda við líffræðilegum fjölbreytileika. Fram kemur í skýrslu Alta að mjög góðar tengingar eru um útivistarsvæði í austurhluta borgarinnar en í vesturhluta er netið meira slitrótt og hefur annan karakter. Næsta skref verður að skilgreina og móta aðgerðaráætlun byggð á frekari greiningum Alta.

Kort úr drögum á skýrslu Alta  þar sem tengsl grænna svæða eru kortlögð.

_______________________________________________________________________

Samkvæmt talningum í vetur hefur orðið töluverð aukning á notkun nagladekkja í borginni. Sýnt hefur verið fram á að þau valda alvarlegri mengun við helstu umferðaræðar vegna svifryks sem verður við slit á malbiki. Þorsteinn Jóhannsson frá Umhverfisstofnun mætti á fund ráðsins og fór yfir áhrif og lausnir við vandanum. Hann kom inn á áhrifaþætti svifryksins en bílar með nagladekk slíta allt að 100 sinnum meira en bílar á ónegldum dekkjum. Slitþol malbiks, frost- og þýðusveiflur og salt- og sandnotkun hafa líka áhrif. Slitþol aðalumferðaræða í borginni hefur verið bætt undanfarin ár og rykbinding dregur úr svifryki. 

Ráðið hefur áður fjallað um málið hér og falið umhverfis og skipulagssviði að koma með tillögur hvernig megi snúa þessari þróun við með aukinni fræðslu og hugsanlegu sérstöku gjaldi sem lagt yrði á notkun nagladekkja í takt við mengunarbótaregluna.

Magnea

[graenavik-blog]

Betri samgöngur -betri borg

177. fundur umhverfis- og skipulagsráðs Reykjavíkur

Þema fundar ráðsins í dag voru samgöngumál og fóru fram kynningar á ýmsum málum því tengdu.

Fulltrúar Strætó kynntu ýmis mál eins og forgangsreinar sem munu koma til framkvæmda á næstu misserum. Verið er að undirbúa m.a. forgangsreinar á Miklubraut og forgangsstýringar umferðaljósa. Forgangsreinar eru fyrst og fremst til að stytta ferðatíma og gera strætó samkeppnishæfari.

Fulltrúi frá Strætó kynnti einnig ýmsar tækninýjungar sem eru í farvatninu og snúa að betri upplýsingagjöf til notenda. Stoppistöðvar við Ártúnshöfða, Hlemm og Mjódd voru ræddar og hvernig mætti útfæra þær betur með aðgengi og skiptingar milli strætóa í huga.

______________________________________________________________________

Árið 2015 samþykkti borgarstjórn stefnumörkun Reykjavíkurborgar í almenningssamgöngum en hana má nálgast hér.

______________________________________________________________________

Hverfisgata hefur undanfarið verið lokuð fyrir umferð vegna framkvæmda, en nú búið að endurnýja um 75% af lengd götunnar milli Snorrabrautar og Smiðjustígs. 6 strætóstoppistöðvum var komið fyrir við götuna þegar hún var endurnýjuð. Nú fara leiðir 1, 3, 6, 11, 12 og 13 milli Lækjargötu og Hlemms um Sæbraut, þar sem stoppað er á 2 stoppistöðvum í hvora átt.

Strætó undirbýr nú færslu leiða aftur á Hverfisgötu þar sem stoppistöðvarnar yrðu betur hluti af miðbænum, nær fjölda vinnustaða, verslana og um 1000 fleiri íbúa. Hverfisgatan er einnig skjólsælli fyrir farþega og mun þessi breyting vonandi fjölga farþegum.

Enn er til skoðunar hvort hluti leiðir 1,3 og 6 haldi áfram að keyra Sæbrautina til að þjónusta Hörpu og bara leiðir 11,12 og 13 færist til að byrja með. Verið er að skoða að takmarka akstur rúta um miðbæinn en nauðsynlegt er að koma í veg fyrir tafir vegna þeirra á leið strætó.

Breytinging mun eiga sér stað á næstu mánuðum en ekki er komin nákvæm dagsetning.

_______________________________________________________________________

Farið var yfir helstu gatnaframkvæmdir á næstunni. Mörgum þéttingaverkefnum fylgja miklar gatnaframkvæmdir og má nefna dæmi um ný hverfi eins og Vogabyggð og Kirkjusand.

Einnig fer mikið fyrir uppbyggingu við Austurhöfn og nú standa yfir framkvæmdir við Geirsgötu. Gatnamótin verða færð til vegna nýrra bygginga á lóðum milli Tryggvagötu og Hörpu og í stað hraðbrautarmódels koma svokölluð T-gatnamót sem falla betur að miðbænum og þeirri uppbyggingu sem er í gangi. Sjá má frekar upplýsingar um útfærslu á götunni hér en framkvæmdum ætti að ljúka í árslok 2017

Á árinu verður malbikað fyrir 1,5 milljarð en á næstu árum verður miklum fjármunum varið til viðgerða og endurbóta á götum borgarinnar. Áætlað er að endurnýjunin nái um 32 km í lengd gatna víðsvegar um borgina.

_______________________________________________________________________

Ráðið fól samgöngudeild borgarinnar að undirbúa tillögur að kvöld- og næturakstri strætisvagna í samráði við Strætó. Það fyrirkomulag, að almenningssamgöngur borgarinnar loki áður en opnunartíma meginatvinnu- og menningarsvæði borgarinnar lýkur, er úr sér gengið og beinlínis hvetur til óþarfa einkabílaeignar og -notkunar. Þá verður ekki litið framhjá því hversu mikil bót á öryggismálum í borginni næturakstur væri og hvaða kynjuðu áhrif það myndi hafa, enda má leiða líkur að því að konur taki frekar dýra leigubíla heim en karlar.

Strætó barst einnig beiðni frá Landspítalanum um að lengja akstur á kvöldin en á Landspítalanum starfa yfir 5000 manns og margir þeirra vinna vaktavinnu. Starfsmenn í vaktavinnu hafa nefnt að þeir geti margir hverjir ekki nýtt sér strætó þar sem strætó hættir að ganga áður en vöktum lýkur á kvöldin.

_______________________________________________________________________

Tilkynnt var að umsókn borgarinnar til Orkusjóðs hefði verið samþykkt og full fjármögnun hefði fengist fyrir áætlunum borgarinnar um uppbyggingu á innviðum fyrir rafbíla miðsvæðis í borginni. Farið verður í framhaldinu í þá uppbyggingu og hleðslustöðvum fyrir rafbíla verður komið fyrir á komandi misserum.

______________________________________________________________________

Skýrsla starfshóps um umferðarhraða í Reykjavík var lögð fram. Megintillögur starfshópsins eru að hraðamörk vestan Kringlumýrarbrautar verði almennt lækkuð í tveimur áföngum í 40 km/klst og 30 km/klst svæðum fjölgað og þau stækkuð. Tillögurnar verða teknar til umræðu og afgreiðslu á næsta fundi.

_______________________________________________________________________

Talningar á vegum Reykjavíkurborgar hafa sýnt að mikil aukning á notkun nagladekkja hefur átt sér stað á síðustu árum. Fjallað var um málið á Grænuvík hér. 

Í kjölfar kynningu á könnun Gallup á notkun nagladekkja bókaði ráðið eftirfarandi:

Ítarlegar kannanir Eflu og Gallup sýna að bílum á nagladekkjum hefur fjölgað mikið á götum Reykjavíkur veturinn 2016/2017 miðað við fyrri ár, þrátt fyrir óvenju snjólétta tíð. Þetta er slæm þróun því sýnt hefur verið fram á að nagladekkin valda alvarlegri mengun við helstu umferðaræðar. Auk þess er beinn kostnaður sem hlýst af þessu sliti gatnanna talinn nema milli 150 til 300 milljónum króna. Þessi kostnaður leggst á alla borgarbúa, líka þá sem nota ekki nagladekk. Í ljósi þess að nýir bílaleigubílar eru nokkuð stór hluti í fjölgun bíla í umferðinni er líklegt að þeir eigi sinn þátt í stóraukinni nagladekkjanotkun. Kostnaðurinn sem af því hlýst leggst ekki á ferðamennina eða bílaleigurnar, heldur borgarbúa. Umhverfis og skipulagssviði er falið að koma með tillögur hvernig megi snúa þessari þróun við með aukinni fræðslu og hugsanlegu sérstöku gjaldi sem lagt yrði á notkun nagladekkja í takt við mengunarbótaregluna.

Magnea / Gísli

[graenavik-blog]

Frumkvöðlar í Gufunesi og gróðurhvelfing við Stekkjarbakka

174. fundur umhverfis- og skipulagsráðs Reykjavíkur

Verðlaunatillaga úr hugmyndasamkeppni um framtíðarskipulag Gufunessvæðis Í Grafarvogi var kynnt fyrir ráðinu á fundinum. Sex tillögur bárust í hugmyndasamkeppnina frá arkitektastofum sem valdar voru til þátttöku að undangengnu forvali. Í áliti dómnefndar segir m.a. að allar tillögurnar sex séu vandaðar og vel unnar. Arkitektastofan jvantspikjer+Felixx hlaut fyrstu verðlaun fyrir tillögu sína “Fríríki frumkvöðla”.

Hægt er að lesa sér betur til um niðurstöður dómnefndar á síðu Reykjavíkurborgar og um vinningstillögu í greinargerð höfundanna.

Vinningstillaga arkitektanna jvantspikjer+Felixx um framtíðarskipulag Gufunessvæðis

_______________________________________________________________________

Fulltrúi Heilbrigðiseftirlits Reykjavíkur kynnti niðurstöður úr mælingum á styrk svifryks í borginni í mánuðinum. Í kynningu fulltrúans kom fram að þann tíunda desember síðastliðinn hefði svifryksmengun farið margtugfalt yfir leyfileg mörk. Ætti þetta sér margþættar skýringar, m.a. umferðarhraða og -þunga, veðurfar og þá stóraukningu á notkun nagladekka sem fjallað var um hér á Grænuvík í síðustu viku. Ráðið bókaði um að alvarlegt ástand í loftgæðamálum í Reykjavík væri mikið áhyggjuefni. Geta sveitarfélaga til að bregðast við ástandinu væri takmörkuð af lögum og það ætti að vera forgangsmál löggjafans að gera sveitarfélögum kleift að gera viðeigandi ráðstafanir.

Samkvæmt talningu sem fór fram um miðjan nóvember hefur hlutfall negldra hjólbarða á bifreiðum í Reykjavík rokið upp í 37% sem er ríflega tvöföldun frá því fyrir fimm árum þegar hlutfallið mældist um 17%.

_______________________________________________________________________

Ráðið synjaði í annað sinn tillögum um niðurrif tveggja húsa við horn Freyjugötu og Baldursgötu og uppbyggingu stærri húsa. Áður hafði meirihluti ráðsins bókað að húsverndarsjónarmið og varðstaða um byggðamynstur gömlu Reykjavíkur verði að vera í forgangi þegar þess er kostur. Bragagata 35 og Freyjugata 16 taka þátt í að skapa það byggðamynstur sem þau standa í og þarf uppbygging á lóðunum að vera á forsendum þeirra. Þær tillögur sem sýndar eru með fyrirspurninni taka ekki mið af því og því er þeim synjað.

_______________________________________________________________________

Lýsing fyrir nýtt deiliskipulag við Stekkjarbakka við Elliðaárdalinn var samþykkt á fundinum. Skipulagssvæðið er innan afmörkunar fyrir deiliskipulag Elliðaárdals en forsendur varðandi landnotkun hafa breyst með tilkomu Aðalskipulags Reykjavíkur svo ástæða þykir að skoða svæðið sérstaklega. Fyrirtækið Spor í sandinn hefur m.a. óskað eftir 5.000 fm lóð undir byggingu svokallaða BioDome starfsemi. Skipulagslýsingunni var vísað til samþykktar hjá Borgarr��ði en verður eftir það aðgengileg á síðu Reykjavíkurborgar.

_______________________________________________________________________

Tekið var jákvætt í fyrirspurn um mastur á Úlfarsfelli til að tryggja öruggar útvarpssendingar fyrir höfuðborgarsvæðið. Ljóst er að núverandi aðstæður eru ekki ásættanlegar fyrir útvarpssendingar og að staðsetning masturs á Úlfarsfelli koma áberandi best út hvað varðar drægni og áreiðanleika. Þá er um 99,9% íbúa höfuðborgarsvæðisins í öruggu sambandi, auk þess er nú þegar búið að leggja ljósleiðara og rafmagnsheimtaugar upp fjallið. Fjallað var um málið hér á Grænuvík. Ákveðið var að svæðið færi í deiliskipulagsferli til að tryggja samráð við íbúa og hagsmunaaðila.

Gísli/Magnea/Sigurborg

[graenavik-blog]

Borgarsýn komin út

Ný Borgarsýn,  fréttabréf umhverfis- og skipulagssviðs Reykjavíkur er komin út. Borgarlínan, Austurhöfn og fleiri spennandi mál koma fyrir. Blaðið má nálgast hér.

[graenavik-blog]

Mastur á Úlfarsfell, verndun timburhúsa og mengun frá nagladekkjum

173. fundur umhverfis- og skipulagsráðs Reykjavíkur

Fjarskipti hf. og Ríkisútvarpið óska eftir að reisa um 40 metra hátt mastur á Úlfarsfelli fyrir útvarpssendingar. Gömlu FM sendarnir eru á Rjúpnahæð og Vatnsenda en síðan þeir voru settir upp hefur byggðin dreifst og þróast þannig að þeir staðir henta ekki lengur. Í sumum tilfellum eru mannvirki farin að skyggja á útsendingar.

FM útvarpssendingar flokkast sem almannaþjónusta sem veitt er án endurgjalds og sem flestir íbúar nýta sér á hverjum degi. Geislun frá útvarpssendum liggja langt undir alþjóðlegu viðmiðunarmörkum sem Alþjóðaráð um varnir gegn ójónandi geislun en þó er æskilegt að staðsetja útvarpssenda eins fjarri byggð og mögulegt er.

Nokkrir staðir voru skoðaðir til samanburðar, t.d. 100m hátt mastur í Öskjuhlíð, en útbreiðsla frá mastri á Úlfarsfelli myndi ná bestu útbreiðslu eða til 99,99% höfuðborgarsvæðisins. Aðrar leiðir en Úlfarsfell myndi þýða skerðingu á útvarpsþjónustu fyrir fjölda íbúa og færri útvarpsrásir.

Úr skýrslu Mannvits um staðarvalsathugun vegna fjarskiptamasturs

_______________________________________________________________________

Lóðarhafi sótti um að auka byggingamagn á lóð á horni Veghúsastígs og Klapparstígs og rífa gamalt timburhús við Veghúsastíg 1. Tillagan var auglýst í ágúst á þessu ári en þó nokkrar athugasemdir bárust og þá sérstaklega vegna niðurrif timburhússins. Erindinu var nú synjað af ráðinu með tilliti til athugasemda og umsagnar skipulagsfulltrúa á fundinum.

Málið á sér langan aðdraganda en samkvæmt deiliskipulagi frá 2004 var gert ráð fyrir að rífa mætti síðasta steinbæinn í Skuggahverfi að Klapparstíg 19. Árið 2010 synjaði skipulagsráð tillögu um nýbyggingu með 7 íbúðum og niðurrifi bæði steinbæjarins og timburhússins.

Árið 2014 affriðaði Minjastofnun timburhúsið vegna bágs ástands þess og gerði ekki athugasemdir við niðurrif. Í því ljósi ákvað skipulagsráð að taka jákvætt í að auglýsa framlagða tillögu. Ráðið ákvað þó að synja erindinu eftir auglýsingartíma og framkomnar athugasemdir. Timburhúsið við Veghúsastíg fær þannig að standa.

Skipulagsráð hefur hug á því að vinna að því með lóðarhöfum að varðveita húsið á Veghúsastíg 1 og gera það upp eða endurbyggja það á sínum stað ásamt því að auka byggingamagn á lóðinni.

Mynd af umræddri lóð á horni Veghúsastígs og Klapparstígs (af ja.is)

Skýringamynd af tillögu Arkís sem var synjað á fundinum

_______________________________________________________________________

Samþykkt var að auglýsa tillögu að deiliskipulagi fyrir Vigdísarlund í Fossvogi. Fyrr á árinu var auglýst tillaga að staðsetning grunnskóla á svæðinu sem var mikið mótmælt af íbúum og var hætt við þau áform. Tillagan sem er samþykkt að auglýsa núna er allt annars eðlis og gerir ráð fyrir 15 íbúðum nyrst á svæðinu. Húsin eru rað-og parhús sem standa við götuna í halla og og eru brotin upp með góðu bili á milli húsa á efri hæðum til þess að hafa sem minnst áhrif á útsýni. Einnig er gert ráð fyrir að reisa einnar hæðar byggingu syðst á lóðinni sem búsetuúrræði fyrir fatlaða. Opið grænt svæði milli íbúðarbyggðar norðan megin og búsetuúrræði sunnan megin er rúmlega 7000m2. Lagt er til að því græna svæði sé haldið óbreyttu.

Deiliskipulagstillaga KRADS arkitekta við Fossvogsveg

_______________________________________________________________________

Samkvæmt talningu sem fór fram um miðjan nóvember hefur hlutfall negldra hjólbarða á bifreiðum í Reykjavík rokið upp í 37%. Þetta er ríflega tvöföldun frá því fyrir fimm árum þegar hlutfallið mældist um 17% í sömu viku og umtalsverð hækkun frá því í fyrravetur þegar hlutfallið var 29% í sömu viku. Þetta hefur komið til þrátt fyrir að enn sé milt og hlýtt þó komið sé vel fram í desember og ekkert bendi til þess að veðurfar fari harðnandi á næstu vikum. 

Þessi þróun er varhugaverð, þó hluftallið sé enn langt frá því að mælast eins og þegar verst lét veturinn 2001 - 2002 (51% í sömu viku). Negldir hjólbarðar fara illa með vegi með tilheyrandi kostnaði í viðhaldi og svifryksmengun. Í því samhengi má benda á að Umhverfisstofnun Evrópu áætlar að 100 manns hafi dáið ótímabært af völdum loftmengunar í fyrra á Íslandi og sérfræðingur hjá Umhverfisstofnun skýrir marktæka aukningu á milli ára í dauðsföllum með tilliti til aukinnar svifryksmengunar (sjá umfjöllun RÚV í febrúar hér: http://www.ruv.is/.../loftmengun-veldur-otimabaerum... ). Því er mikilvægt að brugðist verði við þessari þróun með einum eða öðrum hætti sem fyrst.

Mynd af vef Reykjavíkurborgar

_______________________________________________________________________

Ráðið synjaði breytingatillögu á deiliskipulagi fyrir Laugaveg 55. Heimild er fyrir að rífa timburhús sem stendur á lóðinni og var byggt árið 1902. Skipulagsyfirvöld telja mikilvægt að halda í gamla húsið þótt Minjastofnun gerir ekki kröfu um að húsið verði látið standa. 

Tillagan gerir ráð fyrir að húsinu verði lyft upp og leitast við að nýta sem mest af núverandi byggingu við endurgerð hússins. Útlitsbreytingar miðast við að færa húsið sem næst upprunalegri gerð þess. Samkvæmt tillögunni eykst einnig byggingarmagn um 414 m² og hámarksnýtingarhlutfall hækkar úr 4,0 í 4,8. Við það hækka byggingar talsvert og auka skuggavarp á nærliggjandi byggð. Teikningar áf útliti og sneiðingu hússins benda til þess að á lóðinni verði byggt nýtt hús með svipuðu útliti en efri hæðir bera ekki merki gamla hússins, hvorki á uppdætti né sneiðingu.

Ráðið féllst ekki á þessar tillögur.

Deiliskipulagstillögur Gunnars Bergmanns Stefánssonar arkitekts

Gísli/Magnea/Sigurborg

[graenavik-blog]

Hjólreiðaáætlun, skautasvell og brú yfir Fossvog

166. fundur umhverfis- og skipulagsráðs Reykjavíkur

Samkvæmt Hjólreiðaáætlun 2015-2020 er stefnt að uppbyggingu á um 30 km af sérstökum hjólaleiðum innan borgarinnar. 

Samgöngudeild sviðsins áætlar að fara í undirbúning (for- og verkhönnun) á þeim köflum sem merktir eru með svörtum lit á korti að neðan með það að markmiði að þessi kaflar komi til framkvæmda á árunum 2017 og 2018. 

_______________________________________________________________________

Vegna byggingaframkvæmda er mikil gatnaþrenging við Laugaveg 4-6. Samkvæmt afnotaleyfi, sem tók gildi 12. september 2016, er heimild fyrir þrengingunni til 30. nóvember.

Fólksfjöldi á svæðinu er mikill, enda um einn fjölfarnasta götukafla í borginni að ræða. Úttekt á staðnum bendir til að margfalt fleiri fari um þennan kafla fótgangandi en á bílum. Ráðið samþykkti tillögu um að loka götukaflanum frá gatnamótum Bergstaðastrætis að Skólavörðustíg til þess að tryggja öryggi gangandi vegfarenda og gildir lokunin til 30.nóvember.

_______________________________________________________________________

Nova fyrirhugar að opna skautasvell á Ingólfstorgi í kringum jólin með svipuðu sniði og í fyrra. Einnig verður aðstaða fyrir jólamarkað verður í kringum svellið og skautaleiga.

_______________________________________________________________________

Kópavogsbær vinnur nú að nýju skipulagi við Kársnes. Hluti þeirra tillagna í skipulaginu er brú yfir Foss­vog frá Kárs­nesi yfir í Vatns­mýri. Tillagan hefur m.a. verið rædd í sameiginlegum starfshópi Vegagerðar, Kópavogsbæjar og Reykjavíkurborgar. 

Markmið deiliskipulagsins er að tengja Kársnes með nýrri þverun brúar yfir Fossvog við aðliggjandi byggð og jafnframt efla vistvæna samgönguvalkosti á svæðinu ásamt því að stytta ferðalengdir, dreifa umferðarálagi á fleiri leiðir og á fjölbreyttar val á ferðamáta. Brúin yrði einungis fyrir gangandi, hjólandi og almenningssamgöngur.

Úr skýrslu starfshóps unnin af Eflu verkfræðistofu árið 2013

_______________________________________________________________________

Magnea

[graenavik-blog]

Ný Borgarsýn komin út!

Borgarsýn 16tbl, fréttabréf Umhverfis- og skipulagssviðs Reykjavíkurborgar er komið út. Það má nálgast hér.

[graenavik-blog]

Tillögur um frágang Hafnarstrætis og Tryggvagötu

165. fundur umhverfis- og skipulagsráðs Reykjavíkur

Miðvikudaginn 12. október, 2016

Tillögur að frágangi og skipulagi Hafnarstrætis og Tryggvagötu voru kynntar fyrir ráðinu. Nú rísa endurgerðar byggingar við Hafnarstræti og Hafnartorg með verslunum, skrifstofum og íbúðum við Tryggvagötu. Ljóst er að gjörbreytt landslag mun einkenna svæðið á næstu árum.

Hér má sjá uppdráttinn í stærri upplausn

Samkvæmt tillögunni verður einstefna í vesturátt um Tryggvagötu en hægt verður hjóla í báðar áttir. Gönguleið verður um Hafnartorgið sem tengir Hörpu við Lækjartorg en upphækkun á Tryggvagötu verður til að tryggja forgang gangandi vegfarenda. Einnig verður upphækkun götunnar við nýtt torg, þar sem Bæjarins bestu vagninn stendur, til að auðvelda umferð gangandi. Lagt er til að Hafnarstræti verði að hluta lokað akandi umferð en innakstur er aðeins leyfður um Kolasund að Hæstarétti og Hinu húsinu. Hafnarstrætið gæti þannig orðið spennandi göngugata með lágreista gamla byggð á suðurhlið og sólríkt göturými.

Ráðið samþykkti að haldið verði áfram með hönnun í samræmi við framlagða hugmynd Landmótunar.

______________________________________________________________________

Á fundinum voru eftirfarandi mál einnig til umfjöllunar:

Laugavegur verður göngugata frá 2.nóvember til 6.nóvember á meðan Icelandic Airwaves stendur yfir.

Ráðið tók neikvætt í fyrirspurn um að hækka hús við Laugaveg 28A.

Samþykkt var lítilsháttar breyting á deiliskipulagi við Krókháls 13 og Laxalón 2 og 4. Þar hyggst lóðarhafi byggja upp atvinnustarfsemi skv. gildandi skipulagi en á næstu lóðum eru íbúðir og fiskeldi.

Magnea

[graenavik-blog]

Íbúðir í Norðlingaholti, Bæjarins bestu nýtt torg og líf í gamla Naustinu

163. fundur umhverfis- og skipulagsráðs Reykjavíkur

Miðvikudaginn 28. september, 2016

Hluti athafnasvæðis í Norðlingaholti verður breytt og það skilgreint sem íbúðasvæði í aðalskipulagi samkvæmt samþykkt ráðsins. Ekki hefur verið mikil eftirspurn eftir lóðum undir atvinnuhúsnæði á þessu svæði en einnig þarf að bregðast við knýjandi þörf fyrir íbúðarhúsnæði.

Gert er ráð fyrir 200 íbúðum og nýr byggingareitur verður skilgreindur á svæðinu fyrir 3-5 hæða hús. Byggðin verður í samræmi við húsnæðisstefnu Reykjavíkurborgar. Rýna þarf uppbygginguna m.t.t. fyrirliggjandi nemendaspáa fyrir grunn- og leikskóla. Nýverið var gerður samningur um stækkun húsnæðis grunnskólans, sem ætti að geta mætt einhverri aukningu til lengri tíma litið.

_______________________________________________________________________

Útfærsla á torginu þar sem pylsustandur Bæjarins bestu stendur við Pósthússtræti var samþykkt á fundinum. Endurnýja þarf spennistöð sem er á torginu en henni verður fundin nýr staður á horni Tryggvagötu og Pósthússtrætis. Nýtt hús fyrir spennistöðina mun vera hannað með vísan í stíl Eimskipahússins sem stendur næst torginu. Einnig verða skoðaðar gönguleiðir meðfram Tryggvagötu og möguleika á upphækkaðri götu yfir Pósthússtræti.

Deiliskipulagsuppdráttur og skýringamynd frá Landmótun

Pylsuvagninn vantar inn á skýringamyndina en mun líklega standa á milli spennistöðvarinnar og Hafnarstrætis 15 (gula húsið) við Pósthússtræti.

_______________________________________________________________________

Ráðið synjaði umsóknum um gististaði við Skipholt 11-13 og Lindargötu 60. Borgin vill standa vörð um íbúabyggð þar sem kostur er.

_______________________________________________________________________

Meirihluti ráðsins tók neikvætt í fyrirspurn um að rífa Bragagötu 35 og Freyjugötu 16 og byggja ný fjölbýlishús í staðinn. Ástandsskoðun frá lóðarhafa hefur leitt í ljós að húsin eru bæði í slæmu ástandi en í aðalskipulagi Reykjavíkur er áhersla er lögð á að gamlar byggingar skuli varðveittar á sínum stað og ef hreyfa á við eldri byggingum skal færa fyrir því sterk rök í tillögu að deiliskipulagi.

Meirihluti ráðsins bókaði eftirfarandi:

„Fulltrúar Samfylkingar, Vinstri grænna, Bjartrar framtíðar og Pírata telja að húsverndarsjónarmið og varðstaða um byggðamynstur gömlu Reykjavíkur verði að vera í forgangi þegar þess er kostur. Bragagata 35 og Freyjugata 16 taka þátt í að skapa það byggðamynstur sem þau standa í og þarf uppbygging á lóðunum að vera á forsendum þeirra.”

_______________________________________________________________________

Óskað hefur verið eftir leyfi fyrir rekstur verslana, veitingastaða á jarðhæð/kjallara og gistirýma á efri hæðum húsanna við Vesturgötu 6-10a þar sem áður var veitingastaðurinn Naustið.

Ráðið hafði áður tekið neikvætt í fyrirspurn um gistirými á jarðhæð þar sem það samræmist ekki stefnu aðalskipulags um miðborgarnotkun né ákvæðum um virkar götuhliðar.

Nýtt erindi umsækjenda sýna á teikningum móttöku, verslun og veitingastað/ bistró á kjallara hæð og á 1.hæð – en gistiaðstöðu á 2. og 3ju hæð hússins og því ekki gerð athugasemd við erindið.

Áður var fjallað um málið á Grænuvík hér.

_______________________________________________________________________

Magnea

[graenavik-blog]

Sjálfbær gróðurhús og göngugatan Austurstræti

161. fundur umhverfis- og skipulagsráðs Reykjavíkur

Miðvikudaginn 14. september, 2016

Fyrirtækið Spor í sandinn hefur lagt fram fyrirspurn varðandi uppbyggingu norðan Stekkjarbakka á svæði Elliðaárdals. Hugmyndin "Sjálfbær gróðurhús í hjarta borgarinnar" byggir á þyrpingu þriggja til fjögurra gróðurhvelfinga sem samhverfast um stærri kjarna og mynda eina heild. Áhersla er lögð á vistvænt nærandi umhverfi, upplifun og sterkan staðaranda.

Hugmynd um svokallað BioDome í Laugardalnum (af vef Spors í sandinn)

Um er að ræða raskað svæði í jaðri Elliðaárdals og kemur fram í umsögn skipulagsfulltrúa að starfsemi af þessu tagi gæti farið vel við aðra græna starfsemi, ræktun og mögulega gróðrastöð. Vinna þarf lýsingu fyrir svæðið í samráði við hagsmunaaðila þar sem skoðaðir verða tengingar, aðkoma, gróður og hugsanleg starfsemi svæðisins t.a.m. 

_______________________________________________________________________

Lækjartorg og Austurstræti milli Lækjargötu og Póshússtrætis hefur verið skilgreind göngugata í nokkur ár en borið hefur á þó nokkurri umferð vegna vörulosunar um svæðið.

Með staðfestingu lögreglusamþykktar verður nú bann við almennri umferð og umferð vegna vörulosunar einungis heimiluð frá kl.7 til 11 virka daga. Þannig er hægt að leggja stöðubrotagjöld óháð skiltum um stöðubann og dregur vonandi úr óæskilegri umferð um svæðið.

Magnea

[graenavik-blog]

Ný fjölbýlishús við Framnesveg, Sogaveg og Keilugranda samþykkt

160. fundur umhverfis- og skipulagsráðs Reykjavíkur

Miðvikudaginn 7. september, 2016

Byggð verða tvö tveggja hæða fjölbýlishús með risi og kjallara við Framnesveg samkvæmt breytingu á deiliskipulagi sem ráðið fékk til umfjölllunar. Fyrir standa þrjú hús á reitunum en Minjastofnun Íslands leggst ekki gegn niðurrifi á núverandi mannvirkjum svo fremi sem þær byggingar sem kom í staðinn taki mið af nærliggjandi byggð. Breytingin gengur út á sameiningu tveggja lóða og aukið byggingarmagn. Ekki er heimilt að vera með gististarfsemi í húsunum.

Tillagan var samþykkt til auglýsingar í ráðinu.

Þrjú hús við Framnesveg sem munu víkja fyrir tveimur nýjum húsum (mynd af vef ja.is)

Hugsanlegt útlit nýrra húsa skv. skýringamynd Arkþings

_______________________________________________________________________

Áætlað er að byggja nýja fjölbreytta íbúðabyggð á lóð við Keilugranda þar sem nú stendur húsnæði þar sem rekið var þvottahúsið Grýta um tíma. Sú bygging verður fjarlægð til að koma fyrir allt að 78 íbúðum í 2-6 hæða húsum. Afstaða bygginga, hæð þeirra og form tekur mið af skjólmyndun og sólaráttum ásamt mótun ytra rýmis í góðum hlutföllum, jafnt að götum sem garðrými.

Í suðausturhluta lóðarinnar Keilugranda 1 er skilgreindur sérstakur lýðheilsureitur sem sameinaður verður núverandi leikvelli á borgarlandi og útfærður sem ein heild. Við mótun hans verði litið til tækifæra íbúa og nærsamfélags til hreyfingar og útivistar í samráði við KR.

Mynd tekin úr greinagerð Kanon arkitekta

Við samþykkt málsins bókaði meirihluti ráðsins eftirfarandi:

„Sú uppbygging sem fyrirhuguð er við Keilugranda 1 veitir fjölbreyttum hóp tækifæri til búsetu í nýju húsnæði í Vesturbænum. Fyrir er á lóðinni vöruskemma sem er umhverfi sínu til lítils sóma. Skólar og leikskólar í nágrenninu geta vel tekið við fjölgun íbúa. Áður hefur verið reynt að ná samkomulagi um uppbyggingu íþróttaaðstöðu á lóðinni en KR hefur gefið þann möguleika frá sér. KR hefur yfirlýsta stefnu um að byggja upp aðstöðu sína innan marka síns svæðis og víðar í hverfinu. Meðal annars verður lýðheilsugarður til almenningsnota settur upp á umræddri lóð. Nýtt íbúðarsvæði á lóðinni verður hverfinu til sóma og eykur gæði umhverfisins“

_______________________________________________________________________

Tillaga um deiliskipulag sem heimilar tvö ný fjölbýlishús við Sogaveg var samþykkt í ráðinu eftir auglýsingu. Gert er ráð fyrir bílageymslu í kjallara og þremur íbúðarhæðum með blönduðum íbúðargerðum á reit sem stendur milli Sogavegar og Miklubrautar. Þó nokkur hljóðmengun berst frá umferðaræðum en fyrirkomulag byggingar á lóðinni tekur tillit til þess.

Á lóðinni eru há grenitré sem er gert ráð fyrir að varðveita að norðan og austanverðu svæðinu. Einnig verða gróðursett ný tré við Sogaveg samhliða uppbyggingunni.

Deiliskipulagstillaga THG arkitekta ehf.

_______________________________________________________________________

Ráðiðnu barst fyrirspurn um að flytja núverandi timburhús, byggt 1905, af Klapparstíg og koma þar fyrir fimm hæða nýbyggingu. Tekið var neikvætt í fyrirspurnina.

_______________________________________________________________________

Á fundinum var skipaður starfshópur til að útfæra stefnu um akstur bifreiða og hópferðabifreiða um miðborgina og vinna aðgerðaráætlun til 2-5 ára.

Magnea

[graenavik-blog]

Örplast í hafi, fjölorkustöð á Granda og nýjar stúdentaíbúðir fyrirhugaðar

158. fundur umhverfis- og skipulagsráðs Reykjavíkur

Miðvikudaginn 17. ágúst, 2016

Deiliskipulag frá árinu 2007 heimilar þó nokkra aukningu á byggingarmagni á reit milli Njálsgötu og Grettisgötu.

Umsókn um breytingu á gildandi skipulagi fyrir Njálsgötu 37 felur í sér að skipta upp auknu byggingamagni í tvær byggingar frekar en eina sem stendur við götu.

Tillagan hefur nú verið auglýst og bárust þó nokkrar athugsemdir þ.á.m. frá nágrönnum. Það var niðurstaða skipulagssviðsins og samþykkt af ráðinu eftir nánari skoðun og með þær athugasemdir sem bárust eftir auglýsingu að synja breytingu á deiliskipulagi og halda sig við að byggingarmagn verði aukið út við götu í sem mestri sátt við nærliggjandi byggð frekar en í bakgarði.

_______________________________________________________________________

Ráðið fékk kynningu á niðurstöðum rannsóknar Matís um örplast í hafi. Matís hefur unnið rannsóknina í norrænu samstarfi með Svíum og Finnum. Niðurstaðan er vægast sagt ógnvekjandi en Íslendingar eru að losa út plastagnir í miklum og mun meiri mæli en Svíar og Finnar t.d. í gegnum skólpið okkar. Það sýnir að hreinsistöðvar ná ekki að hindra flæði plastagna í skólpi.

Taflan sýnir samanburð á losun örplasts í hafi á löndunum þremur (úr skýrslu rannsóknarinnar).

Plastagnir er t.d. að finna í snyrtivörum, tannkremum og flíspeysum sem svo berast í skólpið með þvotti eða notkun. Plast dregur líka í sig aðra mengun úr sjónum, agnirnar eru étnar af sjávardýrum og geta þannig borist í meltingarkerfi og jafnvel blóðrásir manna.

Sjá skýrslu um niðurstöður rannsóknanna hér.

Kynning Hrannar Jörundsdóttir frá Matís um örplast í sjó.

_______________________________________________________________________

Félagsstofnun stúdenta hefur áhuga á uppbyggingu á allt að 70 herbergja stúdentagarði við Gamla Garð sem stendur við Hringbraut. Ráðið tók vel í fyrirspurn um uppbygginguna á svæðinu enda samræmist tillagan vel rammaskipulagi Háskólasvæðisins og nauðsynlegt er að koma til móts við mikla vöntun á stúdentaíbúðum.

Skýringarmynd ASK arkitekta sýnir svæði sem um ræðir

_______________________________________________________________________

Ráðinu barst fyrirspurn um deiliskipulagsbreytingu á Fiskislóð 15-21 þar sem matvöruverslunin Krónan er til húsa. Tilgangurinn er vilji til að koma fyrir sjálfsafgreiðslustöð fyrir eldsneyti á bílastæðum á suð-austur enda lóðarinnar.

Neikvætt var tekið í fyrirspurnina af meirihluta ráðsins. Eftirfarandi bókun fylgdi afgreiðslu málsins:

„Tillagan samræmist hvorki stefnu Reykjavíkurborgar um fækkun bensínstöðva né nýsamþykktri loftslagsstefnu Reykjavíkurborgar þar sem segir m.a.: "Markmiðið verði að dælur fyrir jarðefnaeldsneyti innan borgarmarkanna verði 50% færri árið 2030 og verði að mestu horfnar árið 2040."

Stórmarkaðir með matvöru í jaðri íbúasvæðis eru jafnframt andstæðir gildandi aðalskipulagi Reykjavíkur þar sem er að finna stefnur um skipulag vistvænna hverfa og hverfisverslanir. Myndi sjálfsafgreiðslustöð á umræddum stað að öllum líkindum festa stórmarkaðina enn frekar í sessi“.

Magnea

[graenavik-blog]

Almenningsrými á Alþingisreit, EM torg á Ingólfstorgi og reiðhjól á göngustígum

152. fundur umhverfis- og skipulagsráðs Reykjavíkur

Miðvikudaginn 8. júní, 2016

Breyting á deiliskipulagi Alþingisreits var samþykkt til auglýsingar í ráðinu. Helstu breytingar eru að bílastæðum á lóðinni fækkar. Samkvæmt gildandi skipulagi eru heimiluð alls 128 stæði en í staðinn verða þau 87 stæði og engin á götuyfirborði. Svæðið á horni Templarasunds og Vonarstrætis verður að almenningssvæði. Einnig er óskað eftir því að hækka um eina hæð tengibyggingu milli Kirkjustrætis 8b og 10 og fornminjum verða gerð skil á svæðinu.

Á uppdrætti frá Batteríinu má sjá að bílastæði á yfirborði hverfa en í staðinn kemur nýtt almenningsrými á horni Vonarstrætis og Templarasunds.

Ráðið bókaði eftirfarandi með málinu:

„Umhverfis og skipulagsráð telur að fyrirhuguð breyting á deiliskipulagi Alþingisreits sé til bóta og fagnar því að verður efnt til opinnar hönnunarsamkeppni. Ráðið vekur athygli á því að undanfarin misseri hafa komið í ljós merkar fornminjar frá 9. og 10. öld á reitnum og öðrum nálægum reitum. Við teljum að Alþingi og Reykjavíkurborg eigi að sameinast um að skapa þessum minjum verðuga umgjörð.“

_______________________________________________________________________

KSÍ í samstarfi við Símann og fleiri aðila verða með dagskrá og sýningar á leikjum á svokölluðu EM torgi á Ingólfstorgi á meðan á Evrópumótinu stendur. Lagt verður gervigras á torgið og þar komið aðstöðu til að sitja við borð ásamt ýmsum viðburðum.

_______________________________________________________________________

Einar Magnús Magnússon hjá Samgöngustofu mætti á fund ráðsins og rifjaði upp reglur og leiðbeiningar um umferð hjólandi á gangstéttum og göngustígum í kjölfar þess að fulltrúar Sjálfstæðisflokksins lögðu til á fundi ráðsins að borgin gæfi út tilmæli um hvernig reglum á gangstéttum væri háttað vegna árekstra hjólreiðamanna og gangandi vegfarenda. 

Nú er í gangi vinna á vettvangi Samtaka sveitarfélaga á höfuðborgarsvæðinu samræma hönnun, merkingar og rekstur göngu- og hjólaleiða. Einnig á vinnuhópur að fara yfir hvernig best er haga umferð á blönduðum göngu- og hjólaleiðum og hvort eða hvernig setja eigi reglur þar um. 

Fulltrúi Samgöngustofu rifjaði upp lög og reglur varðandi þetta fyrir ráðinu. Reiðhjól eru lögum samkvæmt skilgreind sem ökutæki og gilda í grundvallar atriðum sömu reglur um akstur reiðhjóla og bíla. Þetta er annars útskýrt betur í fræðslumyndbandi frá Samgöngustofu:

_______________________________________________________________________

Lögð var fram fyrirspurn um að breyta notkun húsnæðis við Brautarholt (þar sem Baðhúsið var m.a. til húsa) úr atvinnuhúsnæði í blandaða notkun atvinnu og íbúðar. Fyrirspurnin vék einnig að því að hækka húsið um eina inndregna hæð.

Tekið er jákvætt í að breyta notkun húsnæðisins í íbúðir en þá án þess að leyfa svalaganga, með því skilyrði að huga vel að höfundareinkennum húsanna og ekki verði leyft að bæta við auka hæð á Brautarholt 18.

Tillaga Stáss arkitekta með fyrirspurn um breytingu á húsnæði við Brautarholt

Magnea

[graenavik-blog]

Landfylling í umhverfismat, stækkun Úlfarsárdals og skipulag í Skuggahverfi

151. fundur umhverfis- og skipulagsráðs Reykjavíkur

Miðvikudaginn 1. júní, 2016

Nú er unnið að þróun tillögu sem var valin til verðlauna um uppbyggingu á Ártúnshöfða. Sem hluti af tillögunni og í samræmi við aðalskipulag er fyrirhugað að gera landfyllingar útfrá athafnasvæði Björgunar á svæðinu. 

Vinningstillaga Arkís, Landslags og Verkís um rammaskipulag Elliðaárvogs og Ártúnshöfða frá 2015

Á fundi ráðsins var skýrsla Mannvits um umhverfisáhrif framkvæmdarinnar lögð fram ásamt umsögn skrifstofu umhverfisgæða Reykjavíkurborgar. 

Í skýrslunni kemur fram að áhrif umhverfisþátta vegna landfyllingarinnar séu talin óveruleg eða jákvæð nema áhrif á laxfiska í Elliðaánum. Ráðið tekur undir umsögn sviðsins þar sem farið er yfir þessa þætti og bókar eftirfarandi:

„Í frummatsskýrslu um landfyllingu í Elliðaárvogi kemur fram að umhverfisáhrif vegna framkvæmdarinnar eru að mestu leyti metin óveruleg eða jafnvel jákvæð. Eina undantekningin er áhrif á laxfiska og þá fyrst og fremst hugsanleg skerðing á mikilvægu búsvæði seiða og farlaxa á ósasvæði Elliðaánna. Líklegt er að búsvæðaskerðingin muni hafa neikvæð áhrif á laxastofn Elliðaánna en óvissa ríkir um hvernig og hversu mikið. Þá ríkir einnig óvissa um umhverfisáhrif þess að starfsemi Björgun ehf hættir, en þau gætu mögulega verið jákvæð og þar með vegið á móti neikvæðum áhrifum af landfyllingu. Í ljósi varúðarreglunnar, sem er meginregla í nýjum náttúruverndarlögum (9. grein, lög nr. 60, 2013), telur umhverfis- og skipulagsráð það afar mikilvægt að eyða óvissu með bættum upplýsingum og rannsóknum. Þær þurfa meðal annars að snúast um lykilbúsvæði laxfiska í Elliðaárvogi, þolmörk laxastofnsins fyrir raski á farleið og um áhrif starfsemi Björgunar ehf. á laxinn og afleiðingar þess að sú starfsemi víkur.  Áætluð íbúabyggð við Elliðaárvog er lykilhlekkur í þéttingu byggðar í borginni en ef nánari athugun á lífríki svæðisins leiðir í ljós að áhrif á laxafiska geti orðið veruleg, er mikilvægt að framkvæmdin verði endurskoðuð , til að mynda með minni landfyllingum, tilfærslu á byggingarmagni innan skipulagsreitsins sem og skilmálum um mótvægisaðgerðir í skipulagi. Fyrirhuguð uppbygging er mikilvæg en velferð laxastofnsins í Elliðaánum til framtíðar skiptir einnig mjög miklu máli. Að mati umhverfis- og skipulagsráðs er brýnt að allt sem gert er byggi á bestu vitneskju um áhrif á umhverfið“.

______________________________________________________________________

Ráðið samþykkti til auglýsingar drög að skipulagslýsingu fyrir stækkun Úlfarsársdalshverfis og heildarendurskoðun á deiliskipulagi hverfisins.

Í lýsingunni felst m.a. fjölgun íbúða og stækkun hverfisins til austurs og til norðurs í átt að Leirtjörn. Stefnt er að því að heildaríbúðafjöldi í Úlfarsárdal verði um 1.400 íbúðir. Megin markmið skipulagstillögunnar er að hún taka mið af stefnumörkun í aðalskipulags og áherslu á skjólmyndun fyrir ríkjandi vindáttum með nýrri byggð.

Möguleg útfærsla á stækkun hverfisins í Úlfarsárdal til austurs og norðurs.

______________________________________________________________________

Ráðið fékk kynningu á tillögu um breytingu á deiliskipulagi Skuggahverfis vegna lóðarinnar á horni Klapparstígs og Veghúsastígs. Í breytingunni felst að skilgreindir eru tveir nýjir byggingarreitir á lóð og byggingarreitur fyrir smáhýsi. Gert er ráð fyrir 6 íbúðum á lóð, en engum bílastæðum. Jafnframt verða byggingar á lóð nr. 1 við Veghúsastíg fjarlægðar. Málinu var frestað.

Skýringaruppdráttur Arkís arkitekta

_______________________________________________________________________

Magnea