jwapaot

[jwapaot]

على ضوّ القمر وانا أتامل ليل تكلمته

سرح قلبي ورا حلمً رهين حظوظ مجهوله

هذاك القلبِ لولا اني احبه ماتجاهلته

يمر البال واردد ، عسى زولي قبل زوله

مع غيره السهل يصعب معاه الصعب سهلته

مشاعر ما تراضيني عشان رضاه مقبوله

على كثر الكلام اللي على صدري تغافلته

اخاف من العمر لو غابت من فصولي فصوله

من اول ما تلاقينا و قابلني و قابلته

بديت ازل بأسراري واجيب العيد بْسهوله

سوالف بيني و بيني ، و سرً بـ الخفا شلته

لـ قرايب دميِ و قلبي ابد ماهي بمقيوله

عليم الله تمنيته و عمري ما تمللته

ولا ودي اقضيها الحياه الا و انا حوله

مقولني كلامً من غلاته قبل ما قلته

و لا أظني بعد بقدر بعد هالمره أقوله.

[jwapaot]

كان يتهادى مثل فرحه خجوله

حبك بدون اسباب لله من الله

ضيعت قلبي لينِ شفتك تنوله

و حسيت كن القلب رد لمحله

كنه يعْرفك قبل ما تصير حوله

يمكن بـ دنيا ثانيه كنت خله

كلام واجدِ ما توقعت أقوله

معاك كنت أستقصده ما أزله

اللي بكوا له بالهوى و اضحكو له

قلبي ، ما غيرك بينهم مستحله

عكس السنين اللي بدونك ملوله

الوقت معك يطول ماكنت أمله

حلمً .. تمنيته ولا طلت أنوله

حاولت لكن واقعي ما حصله

مثل القمر يا ما تخيلت أطوله

والمس بكفي هالنجوم المطله

حلو المطرِ لكن زيادة هطوله

تغرقك لو كان فوقك مظله

و الله ما كان الفراق بسهوله

دمعي عليك مزود الطين بله

كان العزيز و كان ما اصعب نزوله

وراك ليه بلا شعوري أهله

يا مرحله كانت بعمري عجوله

لكن عن اللي فات والجاي والله

أشبهه حُبك بـ " سن الطفوله"

قصير و يأثر على العمر كله.

[jwapaot]

روْح مراح العمر و العمر ساري

اللي بقى لك في حناياي دعوه

ما عاد ابي لك في حياتي طواري

من بعد ما كانت طواريك سهوه

انا اعتبرتك لين ضاع اعتباري

على كثر ليني معك شفت قسوه

لاخر دقيقه بالوصل كنت شاري

ما ودي الدنيا تسميك نزوه

غالي الين تمس هيبه وقا��ي

هنا ، تروح لـ عزة النفس فدوه

صحيح " ماكان الفراق اختياري"

لكن أكيد ان " خيره الله حلوه"

‏« كبرت عن حُب و جروح و عباري

وشريت راحة راسي بكوب قهوه »

[jwapaot]

اشتقت أسولف معاك و اخذ اخبارك

أسامر بالهوى لين تغفى عينك

اشتقت احس إني اقرب و اجمل اسرارك

تذكرني كل ما رفعت بدعوة يدينك

قبل اتمنى لو إني من نسل جارك

وارافق اللي يورث جينهم جينك

قبل احَسد من عظيم الشوق من زارك

من عقب ماصار بُعدي عنك روتينك

يوم إني اقرب لقلبك من اهل دارك

ما بينكم كثر ما بيني و ما بينك

وما ينبض لغيري اللي ساكن يسارك

وان غبت عني دقيقه قلتلي وينك

تشرعت ليّ القلوب و جيت مختارك

ما دل قلبي سوى سكة عناوينك

يا كنت عن جنه احبابي أبي نارك

وافدي سنيني جميعاً فدوة سنينك

حليّتها من غلاك مروره أمرارك

ومشيت جمر المشاعر بين نارينك

حتى و لو ما اقنعتني حجه أعذارك

أسامحك و اعذر جروحك ولا أدينك

لكن بعد ما الفراق بدربه أختارك

ما بيننا غير - أميني و امينك -

بدعي لك الله " عسى الله يسعد اقدارك "

وانت أدع لي " يا عسى الله عقبي يعينك "

[jwapaot]

مرفوع راسي فوق غالب و مغلوب

ما فوقي الا رب الارباب - ربي -

أموت ناقص عمر ما اعيش مغصوب

شرقيه طبوعي لو الذوق غربي

انا المطر روح و أحاسيس و أسلوب

حرام في جرد الصحاري مصبي

احب نفسي بالمحاسن و العيوب

من غيري الـ يستاهل شعور حبي

و ان شب نار الهجر غالي و محبوب

اضحك لها و اقول يا نار شبي

مردود مدي اخر الوقت مقلوب

أزرع ورود و يملي الشوك دربي

« يا ما خذيت بخاطر قلوب و قلوب

ولا قدرت أخذ بإيدين قلبي »

[jwapaot]

تجي بالي وبس الا سكنت فـ بالي و دعواي

و يربكني غروري عن سؤالي لو أجي بالك

وانا الاثقل مع غيرك مجيي اجيلك من أقصاي

أدور من شفا درب الوصال اسباب لوصالك

علامي ماعرفت أنسى تفاصيلك و أنا نساي

تشبه فيك لزمات الكلام و تكثّر امثالك

كثر ماحنت هياف الصحاري من السحايب ماي

عليك الله ضما قلبي يحن لغيث همالك

اموتك بالعطش قبل ارتجي بيرك وأمد رشاي

مثل وردً تورد من غلاك و مات بـأهمالك

يزعلني زعل قلبك و أحس انه رضاك رضاي

انا اللي كانت أحواله مرايا تعكس احوالك

يا أبعد امنياتي و أصدق ابياتي و أعز أخطاي

ياشين الوقت من دونك بعد يا حَلوه قبالك

تجي مثل القصيدة لا طرقت مسامع الغواي

و أجيك الهايم اللي في هيامه واهنيالك

لو العالم يحبونك ، ولا حبك حدً شرواي

كثر ما كنت احبك كنت احن لعرقك و آلك

الا يا عمري الماضي نويتك عمري اللي جاي

بعد ما كنت حلّك يا حرام اكون ترحالك

على يمناك تلقاني و لو منك فضى يسراي

اذا ضيعتك الدنيا .. تعال القلب ملجأ لك

بتبقى ذكرياتك سكر أيامي و ملح صباي

على بالي العمر كله و لو ماني على بالك ..

[jwapaot]

لولا الهقاوي ولا طال الأسف صدري

ما تجرح جروحنا لولا هقاوينا

رفعت سقف التوقع وانكسر ظهري

طحنا و عيّت على الوقفه خطاوينا

شلون ابشرهه على العذّال وش عذري

و اللي ضحكنا من أسباب يبكينا ؟

تبعت قلبي و قلبي جازف بقدري

و أبحرت لا وجهه ولا ساحل و مينا

أثر المواليف ما عادوا على خبري

شتان ما بين حاضرهم و ماضينا

يوم ان الاوقات مهما طولّت بدري

يخَلص اليوم ما تخْلص حكاوينا

الشوق ما ينطرى و البُعد ما يطري

تحلى من لسان من نهوى أسامينا

الليل لولا القمر ما ظنتي يغري

من دون الاحباب ما تغري ليالينا

تبقى بقايا من الغالين في عمري

فـ صورنا فـ العطور و في اغانينا

يجبرني اللي كتبِ في قسمتي كسري

بكره عوضِ ربي ان جانا ينسينا

احيان نتبع ورا المقفين ما ندري

" يبعدهم الله عنّا رحمةً فينا "

لو يطرق الياس باب الشك ياصبري

لازم سواقي الدُعا تزهر أمانينا ..

[jwapaot]

طاحت غشاوة غلاك و شفتك بعيني

غلاك من عين قلبي اجمل صْوره

حسافة اللي مضى مابينك و بيني

والله ما ودي أشوفك بهالنظره

يا كنت سيد مزاجاتي و روتيني

يا كان لك حب ما ينقاس من كثره

لا اصبحت أشوفك مكان الشمس تضويني

و لا امسيت والليل ظلم شفتك القمره

اثرك مثل من رحل عني و بيجيني

أنا احسبك ماتجي الا بالعمر مره

عهدً خذيته على الباقي من سنيني

انت اخر انسان بـ أحبه على الفطره

و لو كان سكة فراقك ما تراضيني

مع السلامه فمان الملح والعشره .

[jwapaot]

أختار حربك لو ضلوعك مغاوير

من لا تنقى حربه يهان جيشه

وحاول تمهل لو تطول المشاوير

ما ضيّع القلب الشقي غير طيشه

و لا تجرح أحساسك جروح التفاسير

لـو السؤال يتـوه البـال ليشه

هذا أنا ، راضي و مرضي و لا ضير

اللي انكتب لي في جبيني بأعيشه

اطيح واقف لو تخون المقادير

و اقوم و براسي من الكبر ريشه

كم وجه رقعت لغلاه المعاذير

ولا قدرت أصون ملحه و عيشه

شرعت له بيبان فرقاي بالخير

لكنه المختار شـر الدريشه ..

[jwapaot]

لو نعرف الوجهه تهون المسافات

و البحر ما يغرق ِلو الغيم يمطر

اللي ربح نفسه زهد بـ الخسارات

رابح و لو تشوفه الناس يخسر

ماني بـ لا جاحد و لا اني بموات

لو ما تراضيني حظوظ المقدر

انا الاكيد شلون اكون احتمالات؟

انا الوحيد شلون اكون المكرر ؟

ما الله خلقني لجل سد الفراغا��

انا الفراغ اللي مع الوقت يكبر

يا مضيّع ظني بطول المتاهات

نادر شعوري لك و انا منه اندر

مع حبي الواجد لـ كل العلاقات

انتَ الوحيد اللي غيابه يأثْر

الجرح منك كان طب و علاجات

و الكير منك كان مسكً و عنبر

عن عام مع غيرك معاك انت ساعات

و المر منك كان ينذاق سكر !

حبك بدون أسباب و أعذار و أوقات

مثل السحر ما يندرى كيف يسحر

اي و الله أنك ملح أخير السنوات

وإني تمنيتك من القلبِ و اكثر

شفتك هدية مْن إله السموات

و شرعت لك بابً بصدري مسكر

لكن إذا حديتني عالنهايات

أنا على اللي فات جداً مقدر

ابذكرك بـ الخير واروح بسكات

و أهم شي انْي على خير اُذكر ..

[jwapaot]

يمر البال طيفك و اصفق من الياس إيد بإيد

من اللي وزع طيوفك على كل تجاهاتي

قديمك طيح من عيون قلبي رغبه التجديد

جديدك طول غيابه و لا اظنه بعد ياتي

ما دام القرب قرب القلب ما انتَ عن حشاي بعيد

غلاك اقرب من اللي كل يوم يمر شوفاتي

يقل الوصل لكن الغلا فيني بلاه يزيد

احس الغيرة الحمره عليك مْن ابتلاءاتي

أخاف مْن ابتساماتً وراها حسرة و تنهيد

واخاف اجامل الدنيا على حساب ابتساماتي

انا اللي كل ما حسيت في نفسي عوارض كيد

توضيت السلام و رحت ادور فيه عن ذاتي

بسيطً من يحاولني بقلبه يكسر التعقيد

صريحً من يلاحظني بيفهمني من سكاتي

شجاعً قبل احبك و اتطبع خشيه الرعديد

لسينً قبل احبك و افطن لمضمون كلماتي

يعيش الشعر بأصوات العرب و ان ما لقى ترديد

مثل ما مت بك غافل ، تموت بغفلة أبياتي

حرام تمرني عابر ، تُخلد سيرتك تخليد

حرام تمرني عادي و انت اغلى طموحاتي

بتبقى ما بقى بالجو غيم و بالاراضي بيد

أعز اللي حيا ما بينهم يا أصّح غلطاتي ..

[jwapaot]

أثر المحبه شوف والناس عميان

كلً نشوفه من زوايا غلاته

مدري ما بين الطبع والوجه شتان

و لا غلاه اللي مكثر حلاته

كان بعيون القلب ما يشبه أنسان

كان امنيه تسوى جميع أمنياته

أجيه كلي خاطر و قلب و لسان

و أنا الثقيل اللي بخل بـ التفاته

يا كان و دي نقضي العمر خلان

و لا أفارق في حياتي حياته ..

حاولت بإني اعذره قدر الأمكان

و امسح جوارح سيته بحْسناته

فتره قصيره في تواريخ الازمان

تغيّر بنادم و مجرى جهاته

يطيح من عيني واشيله بالاحضان

ما أبي يمس القاع غير لصلاته

ما هو على شانه و لكن على شان

اللي خذيته من حلو ذكرياته

« ليته تنقى في جروحه و لا كان

جرحه رخيص و ما يليق بغلاته ‏»

[jwapaot]

بعض المطيح يعلمك قيمتك زين

ما تصدق الدنيا مع اللي ضمنها

ما للفرح قدر بعيون الشرايين

لولا مواجعها و لولا غبنها

الدمع تنقص قيمته داخل العين

و يزيد قدره كل ما طاح منها

مثل المطر على صدور الاراضين

لولا مطيحه غيمته وش ثمنها

لولا الهجر ما بان قدر القريبين

الغربه تحن القلوب لوطنها

حتى العقل لولا اختلال المجانين

ما كان راعي الشور يامر و ينهى

جروحنا لو ماهي جروح غالين

ما راح تجرح غير منهو طعنها

تبين صدوف الحياة الاصيلين

ما ترخي الخيل الاصيله رسنها

ما راح منِك في رقبة البخت دين

الصادقين مْحال تخسر رهنها

فان ضاعت الهقوه بدرب المحبين

لا تسأل الايام يا قلب عنها

واللي خلق نفسي من الطين للطين

ما لنت لين الروح تحضن كفنها

أعيش طرقً عذب و أموت بيتين

مدفون قايلها و عايش لحنها .

[jwapaot]

وجه خطاويك على وين بتروح

و لا تعتزل قلبك و تقعد بروحك

و لا تضحك لقلبي و لك قلب مجروح

و انا افهمك و افهم تفاصيل روحك

ما إني بأول قلب فارق له طموح

و لا هو بملزوم بطموحي طموحك

الله يلوم اللي يلومك و مسموح

واللي حصل قسمه بلوحي و لوحك

مسموح و انت أغلى من يروح للروح

غالي و لا ترخص غلاتك جروحك .

[jwapaot]

ما بعدك وقبلك حضور

و غيرك ما كان ولن يُكن

تغيب و يغيب السرور

و انا يموتني الحزن

علّمت عذالي الغرور

عرّفت صوتي عالشجن

قلبي كثر ما هو جسور

ارهف و أبيض من القطن

كنت اشبه احرار الطيور

لكني أخترتك سجن

يزود من زودك قصور

و تكرم لجل عينك مدن

يحق لك كثر الغرور

ما اكثر علامات الحسن

انتَ قصيدة من شعور

اعظم من حروف و وزن

ما كنت لي عادي عبور

أنسان في هيئة وطن

أشوف وجهك بالعبور

المحك بغيوم المزن

ليت الزمن فيني يدور

ويردنيَ لَك هالزمن

لو جيتني لين النشور

ما والله اشتاق وأحن ..

[jwapaot]

ليت الغلا طاح يوم الدمع دمعته

مدري من معلق الصوره على اجفاني

يا حلو وجهه حسافه طاحت اقنعته

يا هو تشوهه بقسوة وجهه الثاني

اكذب لو اقول جرحهه ما توقعته

حاولت اصده و لكن قلبي أعماني

أسرع من البرق حبه ما تسارعته

يمكني احبه اصلاً قبل يلقاني

لان قلبي بغير الله ، علقته

خسرت كل ماتعلق فيه شرياني

لو في يدي عقرب الساعات رجعته

انساه قبل أدري انه راح ينساني

لله و أمانه و حفظ الله استودعته

عسى سنينه تبسم له على شاني

طيوفه باربع الوجهات وزعته

يطري علي بالشعر يطري بالاغاني

يا كذبي ان قلت بعده ما تلوعته

و يا صدقي ان قلت كان اعز خلاني .

[jwapaot]

هذا أنا نظرة عيوني هي مراية خفاي

من تهجاها حكايات من روحي قرى

ليه اشوف بقلبي الناس و أراهن عماي

دام ربي خالق العين هي اللي تَرى ؟

كل غيمً بلل الخد ما بلل ضماي

و كل ليلً كنت بسريه قاسي ما سرى

ما تسام الا بالاعمار يا ساكن حشاي

ما انت سلعه في رجا بيع ولا مشترى

العمر مره و مكتوب ربي جاي جاي

لا نضيع حلو الايام في طاري طرى

ان رضيت أحيان ودي لو أبشر عداي

وان زعلت اعيش و اموت ماحيً درى

بيض الله وجه جرحً يبين لي غلاي

من جميلة ودي إنه يطول ما برى

بحرم الاحزان وجهي و القيها قفاي

و ارمي الدنيا بأهلها ورى ظهري ورى

من يروح وداعةْ الله ْ ، و آنا الله معاي

ما إني بحاجة لـ غيره بهالدنيا ذرى

لو تضيق بعيني الارض ما ضاقت سماي

عشت راسي بالثريا ورجلي بالثرى .