loraine-yannah - Tumblr blog

[loraine-yannah]

Tara na at magtungo sa lungsod ng Baguio: The Summer Capital of the Philippines

Image by Baguio Visita

Sa kabila ng hirap at pagod, nararapat lamang natin na matamasa ang kapayapaan at kasiyahan. Isang solusyon ang paglalakbay upang maibsan ang iba't ibang bagay na bumabagabag sa ating isipan. Gantimpalaan natin ang ating sarili upang magpapawi ng pagod at magkaroon ng oras para sa ating sarili at pamilya.

Napagpasiyahan ko at ng aking pamilya na maglakbay sa bawat sulok ng lalawigan ng Baguio. Hindi namin alintala ang layo at tagal ng biyahe sapagkat pag-akyat mo sa taas ay makakamtan at masasaksihan ang ganda ng Baguio.

Ako ay isang indibiduwal na mahabagin pagdating sa kalikasan. Kaya't sa bawat aking paglalakbay hindi ko makakalimutan ang bawat sikot ng mga lugar na aking pinupuntahan, sapagkat nais kong masaksihan ang kaberdehan ng kalikasan.

Paunang Impormasyon tungkol sa Baguio:

Ang Baguio ay matatagpuan sa lalawigan ng Benguet. Ang Benguet ay mahahanap sa rehiyon ng Cordillera Administrative Region (CAR), na binubuo ng anim na probinsya at ang mga ito ay ang pinakamahusay at pangunahing pinagmumulan ng mga gulay sa kabundukan. Kilala ang Baguio bilang ‘Summer Capital of the Philippines’ o kaya naman ay ‘City of Pines’ dahil sa rami ng mga punong pino na nakapalibot sa kapaligiran nito. 

Heograpiya:

Image by Marky Ramone Go

Ang lokasyon ng lungsod ng Baguio ay puno ng mga matataas at matatarik na bulubundukin. Dahil dito napapadali ang pagtubo ng mga lumot, orkidya, bulaklak, gulay, at mga puno ng pino kung saan dito nagmula ang kaniyang palayaw. Ang lungsod ay naging isa sa pinakamalinis at pinakaberdeng urbanisadong lungsod sa Pilipinas.

May kabuuang limang mga reserbasyon ng kagubatan ang lungsod ng Baguio, kabilang ang tatlong mga watershed na nakakatulong para sa pangangailangan sa tubig ng mga tao na naninirahan dito. Kasama rito ang paggamit ng mga bilang na irigasyon para sa pagsasaka sa mga kultural na lupain.

Klima:

Image by Laquatsa

Tunay na malamig ang klima sa Baguio, kung saan nararapat kang magbaon ng makapal na jacket bilang pananggalang sa lamig. Nakaranas na ang lungsod ng Baguio ng napakababang temperatura na umabot sa 6.3 celcius noong 1961. Ang dahilan sa napakalamig na temperatura ng lugar ay ang mga matataas na bundok kung saan nakatayo ang lungsod ng Baguio.

Pinakamagandang oras ng taon upang bumisita:

Image by Nth Harmony

  Ang malamig na panahon na may kasamang malamig na simoy ng hangin ay hudyat na ng papalapit na kapaskuhan. Gayunpaman, mas mainam na bisitahin ang lungsod mula Nobyembre hanggang Abril sa panahon ng tag-init. Malamig man o mainit ang klima, posible pa ring makapaglibot, makapaglakbay, at makilahok sa iba’t ibang aktibidad. Ang mga ito ay iilan sa mga dahilan kung bakit dinudumog ng mga turista ang malamig at tuyong panahon sa Baguio.

Kultura at Tradisyon:

Image by WordPress

Ang mga wikang karaniwang ginagamit sa Baguio ay Ibaloi, Kankana-ey, at Ifugao, pati na rin ang Ilocano at Pangasinan na nagmula sa kani-kanilang mga ninuno. Sa kasalukuyan ang mga nakatatanda na lamang ang sanay na gumamit ng mga tradisyunal na wika at hindi nila maunawaan ng mabuti ang wikang Filipino. 

Image by It'sMoreFunInIfugao

Mayroong tribo na naninirahan sa lungsod ng Baguio sila ay tinatawag na Igorot. Ang mga Igorot ay magaling sa iba’t ibang larangan tulad na lamang ng pangangaso, pagtatanim, at paghahabi. Mayroon din silang angking talento pagdating sa paggawa ng bahay at mga imprastraktura. Masayang namumuhay ang mga Igorot sa kabundukan at kahit man sa loob ng siyudad, sapagkat komportable sila sa mga taong nakapalibot sa kanila at hindi nila alintala ang mga turistang humahanga sa kanila.

Ang mga okasyon tulad ng kasal, pista, pagsilang ng bagong sanggol, at kaarawan ay nagdaraos  ng isang panrelihiyong ritwal ang mga Igorot sa pamamagitan ng pag-aalay at pagsasakripisyo ng manok, baboy, o kalabaw bilang pasasalamat sa kanilang diyos na si Kabunyan. Madalas ring mag-alay ng tapuy, isang uri ng alak na binuo mula sa bigas.

Image by Pen fires

Ang mga produktong mula sa Baguio ay kinahuhumalingan ng mga tao dahil sa angking ganda at pagkamalikhain nito. Mayaman sa kulturang sining ang lungsod, tulad na lamang ng paghahabi, pag-uukit, paglililok, at pagtatato. Ang mga ito ay pinapahalagahan at pinagyayaman ng mga residente at gobyerno ng Baguio, dahil likas ang kanilang kakayahan sa paggawa ng mga produkto.

Image by Dave Leprozo

Ang Panagbenga o Panagbanga Festival, na kilala rin bilang Pista ng Bulaklak ng Baguio, ay isang buwanang pagdiriwang na karaniwang dinaraos mula Pebrero hanggang Marso kung saan sumisibol na ang mga bulaklak. Sikat ang Panagbenga Festival dahil sa mga magagarbo at magagandang palabas at parada na hinahandog ng mga estudyante, organisasyon, artista, at may katungkulan sa gobyerno. Idinaraos nila ang ‘parade of floats’ kung saan ang mga floats na ito ay napapalibutan ng mga bulaklak na nagpapakita ng pagkamalikhain.

Paano makarating sa Baguio?

Upang umpisahan ang aming paglalakbay umalis kami ng ala-una ng umaaga (1:00 AM) upang maiwasan ang mahabang trapik. Ginamit namin ang aming sariling sasakyan upang mapabilis ang mga paggamit ng ruta. Patungong Angeles, Pampanga ang rutang aming tinahak upang magbyahe sa NLEX at makarating sa unang lugar na aming pagpapahingahan. Sa tuwing kinakailangan naming magbanyo o kumain, kami ay hihinto at hahanap ng lugar. Una kaming nagstopover sa Tarlac upang mag-almusal at pagkatapos naming kumain kami ay nagpalipas ng kaonting minuto upang magpahinga at nagpatuloy na muli kaming magbyahe. Makalipas ang 4 na oras ay nakarating na kami sa Urdaneta at nagbanyo panandalian. Nang makarating na kami sa Sison hudyat na ito na papalapit na kami sa aming destinasyon dahil nararamdaman ko na mula rito ang malamig na simoy ng hangin. 

Unti-unti na kaming papalapit sa Baguio at sa pag-akyat namin  masasaksihan mo agad ang mga bulubunduking kay berde at ang langit na bughaw na kadalasan ay puno ng hamog. Kaunting minuto na lamang at makakarating na kami sa aming destinasyon kung saan kami mananatili habang kami ay naglalakbay. Nang kami ay makarating hindi ko maiwasang mamangha sa likas na kagandahan ng Baguio, sulit ang aming mahabang byahe na inabot ng 5 hanggang 6 na oras at nakarating kami roon sa oras na 6:00 AM.

Saan maaaring manatili habang naglalakbay sa Baguio?

Image by Hotel Veniz

Maraming mga hotel at transient house sa Baguio, dahil sa dami ng mga turistang nagpupunta rito. Napagpasyahan namin ng aking pamilya na tumuloy sa hotel na malapit sa mga lugar na aming lalakbayin. Ang hotel na aming tinuluyan ay ang Veniz Hotel na kung saan luma ang kaanyuan sa labas, ngunit pagpasok sa loob ay makikita mo ang tunay na ganda nito. Malinis ang bawat sulok ng hotel at mababait ang mga tauhan na agad kaming tinulungan sa aming mga gamit upang dalhin sa aming magiging kuwarto. Talagang sulit ang bayad dito dahil budget-friendly at maraming serbisyo ang hinahandog ng hotel na ito, tulad na lamang ng masasarap na pagkain, malinis at maluwag na kuwarto, at magandang tanawin.

Mga pasyalan at aktibidad na maaaring gawin:

Ifugao Woodcarvers' Village

Image by TripadVisor

Ang una naming destinasyon sa paglalakbay ay ang pagpunta sa Ifugao Woodcarvers’ Village na matatagpuan sa Asin Road. Madalang ang mga taong nagpupunta rito sapagkat halos lahat na ng mga magagandang pasyalan ay nasa siyudad. Maraming mga likha ang nandirito, tulad na lamang ng mga iba’t ibang ukit ng tao, hayop, at kung ano-ano pa. Ang mga aktibidad na maaaring gawin dito ay: 

Woodcarving Lesson

Sculpting

Paggawa ng mga keychain at iba pa na maaaring dalhin pauwi

Picture taking kasama ang iba’t ibang mga nakadisplay na eskultura

2. Mount Cabuyao Climb Adventure

Image by Pinay Travel Junkie

Sunod naming nilakbay ang bundok ng Cabuyao upang makaramdam ng katahimikan at malimutan ang mga problema sa buhay. Matarik at madulas man ang aming dinaanan masaya pa rin kaming umaakyat dahil alam namin na sulit ang aming pagod pagdating sa tuktok ng Mount Cabuyao dahil makikita at masasaksihan mula roon ang lungsod ng Baguio. Ang mga aktibidad na maaaring gawin dito ay:

Mountain Climbing lessons (rules, tips, and guide)

Pag-akyat sa Mount Cabuyao

3. Session Road

Tuwing linggo maraming tao ang nakapalibot sa Session Road dahil mayroong iba’t ibang aktibidad na matatagpuan dito. Ang sikat na sikat na aktibidad ngayon sa Session Road ay ang chalk drawing, maging bata at matanda ay nahuhumaling na sumubok na gumuhit sa daan ng Session Road. Akin itong sinubukan at ako ay napakasaya dahil nagkaroon ako ng opotunidad na makaguhit sa isa sa mga kinahuhumalingan na aktibidad dito. Ang mga aktibidad na maaring gawin ay:

Chalk drawing

Bicycling

Singing Contest

Dancing Contest

Taking pictures of dozens of cosplayers

4. Burnham Park

Isa ang Burnham Park sa mga sikat at tampok na pasyalan dito sa Bagui. Marami ang mga aktibidad na maaaring gawin dito. Sa parkeng ito aking napupusuan ang rollerskating at ang mga bulaklak na mahalimuyak, dahil nakakaramdam ako ng kapayapaan at kasiyahan. Tunay na magandang puntahan ito kasama ang inyong pamilya, kaibigan, at kasintahan. Ang mga aktibidad na maaring gawin dito ay: 

Bicycling

Rollerskating

Skateboarding

Boat ride

Fountain show

Carnival games

Saan maaaring kumain?

Image by GoodTaste Restaurant 

Mula sa nakakapagod na paglalakbay, nararapat na hindi natin kalimutan ang kumain ng masarap na pagkain upang mapagpatuloy pa ang paglalakbay na puno ng masasayang memorya. Lubusan kong nagustuhan ang kainan na Good Taste, dahil sa rami ng mga pagkaing mapagpipilian sa murang halaga lamang. Ang kainan na ito ay high-tech na, gumagamit na sila ng mga teknolohiya at robots upang mapabilis at organisado ang daloy ng takbo ng kainin. Aking nirerekomenda ang garlic buttered chicken dahil nanunuot ang tamis, alat, at anghang sa bawat kagat.

Pangkalahatang Karanasan:

Dumating ang araw na kung saan natapos na ang aming oras at araw ng paglalakbay. Bumaba na ang aking pamilya mula sa Baguio, aking na saksihan mula sa kanilang mga mukha ang pagkadismaya sapagkat kulang pa ang mga araw na maaari kaming makapaglakbay.

Hinding-hindi ko makakalimutan ang aking paglalakbay sa Baguio. Napakasaya ng aking naging karanasan sa patuloy kong paglalakbay sa iba’t ibang tanawin at pakikilahok sa mga aktibidad. Maraming mga masasayang memorya ang nabuo at naiwan sa bawat lugar na aming pinuntahan. Aking napagtanto na tunay ngang napakaganda at napakalinis ng Baguio at ang mga residenteng aming nakakasalamuha ay napakagalang at napakabuti sa kapwa. Marami akong nauwing mga souveneir para sa aking mga kaibigan, sapagkat sa dami ng pagpipilian hindi mo mapagtatanto ng mabuti kung ano ang nararapat mong piliin at bilhin.

Kung ako ay tatanungin nanaisin kong maglakbay muli sa lungsod ng Baguio. Nakakapanindig balahibo ang mga tanawing aakalain mong isang litrato lamang. Aking naisip na nararapat na pahalagahan at pagyamanin ang iba’t ibang aktibidad upang matutuhan at masaksihan ito ng marami. Ako ay tuluyang namangha at namulat mula sa mga natatagong ganda ng Baguio. Nararapat na protektahan at pahalagahan ang mga likas na yaman sa lungsod ng Baguio at huwag hayaan na masayang ang mga ito.

Sanggunian: https://new.baguio.gov.ph/home https://www.lonelyplanet.com/philippines/north-luzon/baguio