loveannaaa - Tumblr blog

[loveannaaa]

angulo

Pilit inaakyat ang makapagpigil hiningang patalim,

Nagniningas na mga sahig,

Bawat hakbang toneladang layo ang dating,

Abante-atras, dumadagundong pintig ng damdamin,

Natutong kalakihan ang nakasanayan,

Binigyang pugay ang mga boses na pilit kinikimkim,

Sa kasuluksulukan ng silid, pilit tumitindig.

Pabugso-bugsong sitwasyon, pangarap na takip-silim

Galit sa sarili ang hinaing, "bakit ba ito parin?"

Hindi magkandaugagang hingal ang lumalabas sa mga bibig

Tanging pangarap ang bitbit, "sapat nga ba?"

Kumapit sa patalim, hindi inda ang sugat na tamo.

Nangangalawang na silakbo ng damdamin,

Binibigyang buhay gamit ang dugo't pawis.

Nakakalula, nakakatindig balahibo, nakakagimbal

Umabante, "tama na ba?"

"Sige pa, malapit ka na", bulong ng sinumang di mawari

Nagtiwala sa 'di kasiguraduhan

Iniyugyog, nadapa, nanghina, nasaktan

Pero walang tumumbas sa nais makamtan

Sa dulo, may kislap ng pagmuni-muni,

Lumapit, may pigurang madungis at di makilala

Bawat galaw ay iisa , napagtantong repleksyon ang nakikita

Metikulosong pagmamatyag, hindi mawari ang nadarama,

"Nandito na ba ako?" nakakabinging katahimikan.

Sa wakas, may isang luhang pumatak,

Hindi man sigurado, dama na siya ay nasa tamang pwesto.