nourah-mw

[nourah-mw]

يا قلّة خاتمتي..

اخر تدوينة لي قبل ٧ شهور 💔

حبيبتي مدونتي اشتقت اكتب فيها

سواليف القصيم كثييرة كثيرة مرة لدرجة لو بكتب عنها لازم اكتب كل يوم بيومه

حالياً امر بضغط مهني وهذا ما اعادني إلى تمبلر.. مع الضغط المهني هناك ضغط عاطفي من نوع فاخر، هذه تجربتي الاولى فيه لكن لا بأس.. الحياة دروس

تفاصيل الحدث كثيرة ومتشعبة مما يصعب علي ذكره هنا لكن بالمختصر هو موظف عندي مضطرة اتخذ معه اجراءات رسمية لايقافه عند حده، وعشان اسوي هالخطوة لازم اطلع عنز الوهابا، وانا عنزي ما احبه تطلع، اكره انها تطلع واكره اكثر ان الناس تشوفها

لكن مجبر اخاك لا بطل 🫠

الموظف الان اجازة مرضية، جابها لاني رفضت اعطيه اجازة رسمية ولا هو ماله الا العافية والدليل طلبت ارفاق تقرير بحالته الصحية بناءًا على انظمة العمل عندنا وانهبل بس بس يدقدق علي

ما علينا، هو اجازة اسبوعين راح منها اسبوع وباقي الاسبوع الجاي، ومن امس الخميس بدت المشاكل تظهر

الله يعينني ويسهل امري ويكفيني شر من به شر

اللهم ارني الحق حقاً وارزقني اتباعه، وارني الباطل باطلاً وارزقني اجتنابه

دعواتكم

[nourah-mw]

السلام عليكم ورحمة الله وبركاته

اسعد الله صباحكم بكل خير

مدونتي العزيزة، كنتي في زمن من الأزمان ملجأي للتعبير عن أي شعور يطغى علي، تغير الزمان فصرتي ملجأ للمشاعر السلبية والأحداث الصعبة ثم كبرت فجأة.. زادت المسؤوليات وقل الكلام، انشغلت بالحياة الواقعية عن الافتراضية، وإن كنت لا أُعِدّك "افتراضية" بقدر ما أنتِ يومياتي المسجلة.. كثير من المشاعر المعبّرة هنا ظننت وقت كتابتها أنها لن تنمحي وستسمر معي لكن لم يحصل

لما اعدت قراءة تدويناتي السابقة اكتشفت أني برحمة من الله وفضله نسيت المشاعر التي كانت تعتريني وقتها.. طبعاً مازلت أسترجع وقعها وشدتها لكن لم يعد لها تأثير.. صارت سواليف مثل ما يقولون

كانت هالكلمة اكثر كلمة تستفزني وقت حزني "بتصير سواليف" مو لأني ما كنت أصدقهم بقدر ما أني كنت اتمنى انهم يفهمون مشاعري بهاللحظة الي اعيشها، هي للآن حدث ما صارت سواليف، للآن مؤلمة، متعبة، منهكة استهلكت وقتي وطاقتي وجهدي.. لكن الحمدلله تخطينا

اليوم أنا سعيدة جداً، ومثل ما كنت أوثق لحظات حزني وضعفي بغيت أوثق شعوري اليوم

أمس الخميس كانت زيارة فريق سباهي للمركز، كنت أجهز للزيارة من بداية السنة تأجلت عدة مرات لظروف مختلفة وياللحظ.. قبل الزيارة بثلاث اشهر جاء فريق متابعة من الرياض للتأكد من جهازية المركز صدر على اثرهم قرار من ادارة الرياض بتغيير قسم الجودة شمل هذا التغيير تعيني كمساعد منسق للقسم اضافة على اشراف الصيدلية

صار تجهزي مو مقتصر على الصيدلية فقط إنما على المركز كامل، انضغطنا بشكل كبير وصلت مرحلة كرهت روحة الدوام وهذي اسوء مرحلة اوصل لها من بدأت مسيرتي الوظيفية

أنا إنسانة احب شغلي وأحب أشتغل لكن الضغط خرب كل شيء ولما يبدأ الإنسان بكره شيء يحبه يمر بشعور قاتم.. وهذا الحضيض الي وصلت له الفترة الماضية ثم فجأة تفعّلت عندي خاصية الـ"طُز" صرت اقول بقريح والشيطان الرجيم، نفسي وصحتي أولى من اعتماد المركز ما عاد صرت اهتم خصوصاً أنه من شهر ١٠ صدر قرار تقاعد مدير المركز وصرنا بدون أبو ، بالضبط زي اليتامى ما لنا والي إلا الله

أساساً ما وافقت اشتغل بالجودة إلا اكراماً له ثم فجأة دافعي الوحيد يخت��ي !!

زين مني ثابرت لين هالحزة

ثم قبل اسبوع من الزيارة باشرت عندنا المديرة الجديدة.. وآه يالشعور الي اعتراني ما ينوصف

كأني كنت مشردة ولقيت ملجأ آمن.. اطمئنان عجيب

المديرة الجديدة شاطرة مرة وسبق كان لي تواصل معها عشان الجودة لذلك حسيت أننا بأيدي أمينة

وفعلاً كانت على قدر ظني وافضل حتى، ابهرتنا بعملها وحرصها وشجاعتها حتى ما شاء الله انها توافق تجي لمركز قبل زيارة الاعتماد باسبوع وتشتغل معهم وتطلع على ظروفهم الكاملة وتقدر تعزز نقاط القوة وتحسن من نقاط الضعف مو أي أحد يقدر يتخذ هذا القرار ويحسن التصرف بناءاً عليه فبسم الله عليها ما شاء الله كانت مبهرة جداً

فالحمدلله أولاً وآخراً ظاهراً وباطناً دائماً وأبداً على نعمه التي تعد ولا تحصى

كانت الزيارة يوم الخميس انتهت بوقت قياسي، اثناء الزيارة قرروا يبدأون الجولة التفقدية بقسم الصيدلية.. كان التدقيق عالي علينا تابعوا معنا كل المعايير وتأكدوا من اكتمالها والحمدلله كل شيء كان كامل ، بعدها انقسموا كل مقيم راح يتابع اقسام معينة لكن بما أن الملفات كانت كاملة وقسم الصيدلية بيّض الوجه بمعايير الملاحظة والمقابلة تسهلت امور البقية

المقيمين كانوا مبهورين من جهود المركز، كنت اتمنى لو كان د. صالح موجود يشوف اثر جهوده وعمله ، ماخليتها بخاطري ارسلت له اتشكره وادعي له واعتقد إن كل موظفين المركز سووا نفس الشيء

بإذن الله اذا صدر الاعتماد بنحتفل وبيكون هو ضيف الشرف لهالمناسبة

انتهت السنة على خير وانتهت الضغوط الحمدلله

الويكند هذا ذكرني بأيام الجامعة لما ينتهي بلوك الخميس وبداية البلوك الثاني الأحد يصير الويكند الي بينهم فاااااضي كنا نسميه قولدن ويكند

الحريّة 🎉

[nourah-mw]

انببببببببهرت إنك ما زلت موجودة بتمبلر للحين ، وفرحت جدًا إن نورة اللي عرفت صفحتها واحنا بزران مازالت كتاباتها بذات الروح

ياربّ دايمًا حياة حلوة ومشرقة ومليانة نور لك

يا زييينك والله، الله يديم افراحك ويسعدك على الكلام اللطيف

ما شاء الله عليك متابعة قديمة ومازلتي مواظبة

تستاهلين نجمة 🌟

اللهم آمين أجمعين يارب

[nourah-mw]

نورة في القصيم

أهلاً ومرحباً بكم متابعي الأعزاء في يوم جديد وسنة جديدة وفصل جديد من حياتي انقله لكم بكسل بعد انقطاع طويل

الحمدلله على تمام النعمة و اكتمال المنّة أن بلغني الله هذا اليوم بعد ثلاث سنوات من الغربة والشتات فاللهم لك الحمد حتى ترضى ولك الحمد إذا رضيت ولك الحمد بعد الرضى

كعادتي آكتب لكم بدون أي استعداد مسبق، يوم الأحد فتحت تمبلر من اللاب توب وتهيضت مشاعري وتذكرت سالف زماني واشتقت اكتب لكم من المتصفح عوضاً عن تطبيق الجوال لكن كانت فيه مشكلة ولا قدرت اكتب فتأجلت التدوينة ليومنا هذا

مدري كيف أبدأ بالكتابة.. كملت الآن ستة اشهر في القصيم لكني احس بالانتماء الشديد كأني هنا من الازل

أول يوم عمل أخذت أبوي معي.. ما سويتها بنجران ولا الرياض لكن لما جيت القصيم حسيت لازم يجي معي، هذا مقر عملي الدائم وهذولا الناس الي بداوم معهم بقية سنواتي العملية بإذن الله اضافة اني عرفت أن مدير المركز شخص ملتزم واستشعرت انه متهيب من فكرة وجود موظفة انثى بصيدلية كل العاملين فيها رجال + الفكرة الاولية لأي احد يسمع عن بنت مغتربة بسبب الوظيفة الاكيد انها ما راح تتوافق مع رؤيته المحافظة (علماً أنه هذي تخميناتي بدون أي ادلة وبراهين ولا الرجال ما بيني وبينه اي نوع من التواصل) لكني استبقت الاحداث والتدابير

كنت ضايعة أول ما جيت، دخلنا بالبداية على مدير التشغيل والي كان أحد المساهمين بعملية نقلي ثم وجهنا لمكتب المدير، انسان لطيف وبشوش رحب بنا وسولف مع ابوي ��طلع فيه قرابة بعيدة بيننا ثم التفت علي وقال انه بيمسكني اشراف الصيدلية < وهذا من الأول عندي خبر عنه بس ما توقعت بيكلمني فيه بهالسرعة

مع إني ضد الفكرة وارى إن المشرف الحالي آكثر من ممتاز لكني ما ناقشت الموضوع املاً انه ينسى وتجي العواقب سليمة

وبنهاية اللقاء عطاني باقي الاسبوع اوف عساس ارتب وضعي الله يجزاه خير

ثم بدأ الدوام والحمدلله خطتي نجحت وما فتحوا معي موضوع الاشراف مرة ثانية

لكن مشرف الصيدلية د. فيصل ما قصر دخلني مع الجودة ومن البداية اجتماعات وتنسيقات.. برضو بدأ يأخذ رأيي بامور الصيدلية وتطويرها و و و.. وأنا نايمة بالعسل

لما فجأة طلع مهمة بشهر مايو وقلاني مشرف مناوب ثم فجأة كلمني بداية جون يقول انه انقبل رزدنسي

. . . !

يعني تدبست بي الله يهديه

الصدق أن سبب رفضي الاشراف هو وجوده.. يا جماعة الانسان هذا رهيب مبدع فنان اداري مميز اتوقع لو اشرح من اليوم لبكرا وش كثر هو بطل ما وفيته حقه، علماً إني ما اشتغلت معه كثير بس واضح مرة واااضح، والحين يبونن امسك الشغل بعده !! وشلون معليش ما اتوقع اني بقدر ادير العمل مثله

ما تتخيلون حجم سعادتي يوم اشتغلت مع شخص مثله.. العمل قائم على أكمل وجه، والموظفين مبسوطين والدوام سلس والمراجعين راضين والادارة معتمدة عليه وفوق هذا كله تفكيره مقارب لتفكيري بشكل مرعب ناهيكم عن انه يشاورني ويسمع رأيي

يعني كنت في الجنة ياعبدو.. لكن النعم لا تدوم

والله انه فقيدة على الصيدلية والمركز كله لكن الله يوفقه ويسمح دربه ويكتب اجره

وقبل هذا كله ما انسى فضله علي بعد الله بسعيه لنقلي وجيتي للقصيم فالله يجازيه عني خير الجزاء ويسخر له ويفتح عليه وين ما وجه يارب

اتمنى لو عندي قريحة شعرية توفيه حقه وامدحه مثل مدح المتنبي لسيف الدولة لكن له الدعاء ونسأل من الله القبول

والآن محدثتكم مشرف الصيدلية المناوب حتى اشعار آخر، بلشة بجدول الدوام وتوزيع المهام ومتابعة الأداء وتصنيف قائمة الادوية وترتيب الصيدلية اضافة إلى مهام الجودة ومتطلبات سباهي الله يعديها على خير

[nourah-mw]

نورة ليه ما تكتبين تدوينه وحده عن دوامك بالقصيم😞😞 جاء على بالي قرينا عن نجران والرياض نبي نقرا لو وحده عن القصيم

آه بس يا انون

وش اكتب وش اخلي

هي بقرب الاهل ولا بالراحة النفسية ولا بالبيئة المألوفة ولا بالناس اللطيفين ولا ولا ولا ولا…

الصدق فيه اكشنات بالقصيم وأحداث لو صارت لي يوم انا بنجران ولا بالرياض كان تلقون طايرة اكتبهن بتمبلر وبتسلسل بعد بس تعرفون القصيم والجحادة لازم يعني 🦦

بس لأني نادراً القى وقت افضي به ولو لقيت يصير ابي اتابع شيء ولا انام

بنجران كان يساعدني سعة الوقت والفضاوة وبالرياض خفت كتابتي كثير بسبب ضيق الوقت والحين بالقصيم شبه انعدام للخصوصية😅

لكن باذن الله النية معقودة نحتري بس الفضاوة والسعة

[nourah-mw]

(ولقد نعلمُ أنك يضيق صدرك بما يقولون (٩٧) فسبِّح بحمد ربك وكن من الساجدين(٩٨))

- سورة الحِجر

♥️

[nourah-mw]

هههههههه انا نفس تفكير اهلك الشكوى لله

حتى أنا بس بخاطري اقول باقي السالفة وما طلع معي الا هالطريقة 🦦

[nourah-mw]

صراحة يبهرني تفاعل اهلي مع بعض المواقف

اقولهم اني اليوم طلعت للدوام على حد الوقت ولما ابعدت شوي عن البيت تذكرت اني ناسية لاب كوتي واضطريت ارجع اخذه وتأخرت على الدوام

لما احد يقول لكم سالفة زي كذا وش تفاعلكم مع الموقف ��

المتوقع والمعتاد أن الواحد يسأل اذا لحقت على البصمة، عسى ما تأخرتي بكثير، قالوا لك شيء بالشغل، لا يكون اسرعتي وصادك ساهر

بس لاا اهلي على طول يفكرون بحلول في حال تكرر الموقف..

"ليش ما تركتي اللاب كوت بالدوام"

"المفروض عندك واحد احتياط بالدوام"

"كان ما نزلتيه من السيارة"

طيب وسالفتي ؟ وتكملة السالفة اني يوم وصلت متأخر مالقيت موقف للسيارة من كثرة المراجعين وإني اضطريت اخذ لفتين على المركز ادور لي موقف واخر شيء نزلت ابصم ثم رجعت ادور موقف

وإني دخلت اركض للصيدلية حتى لابكوتي ما لبسته زين وإن المراجعين كانوا زحمة ولا انتبهت للبسي الا بعد ساعة

عدت السالفة ثلاث مرات وكل مرة تنتهي بنفس النقطة وينحرف الموضوع لنقطة ليش ما عندي خطة بديلة في حال نسيان لاب كوتي

وعشان بس تطمئنون، عندي خطة بديلة، اساساً دايم اخلي لاب كوتي بالدوام وعندي ثاني احتياطي باللوكر لكني رجعتهم عشان اغسلهم ولأني قمت متأخر نسيت اخذهم معي

ونعم اعرف إني المفروض ما ارجع الاثنين سوى واغسل كل واحد لحال بس عساس توفير بما انه ما عندي ملابس بيضاء كثيرة ولا يسوى اغسل مرتين كلهم ابيض

ولا ما احب اغسل ملابسي مع ثياب اخواني

هذا كله بأول يوم دوام لي بعد تكليفي بالاشراف المؤقت على الصيدلية

واضحة من بدايتها 🦦

وبس

خلص اليوم وانا ماقدرت اكمل سالفتي البايخة لذلك وجب ذكرها هنا

تمت.

13 / 5 / 2024

[nourah-mw]

خالتي تمدح وحدة تقول "تقل وردة، ودتتس تدهنينه بزيت زيتون وتجرعينه"

[nourah-mw]

آخر يوم عمل في الرياض:

يوم الخميس الموافق ١٨ يناير ٢٠٢٤ كالعادة صحيت لصلاة الفجر وبدأت استعدادي للدوام، كان يوم كسائر الأيام ما خطر في ��الي إنه بيكون هذا آخر يوم عمل لي بالرياض "بما أنه مقرر لي أن آخر يوم هو ٢٥ يناير أي بعد اسبوع"

بطريقي وقفت عند مخبز طحت عليه قبل فترة واخذت من عنده تميس بالجبن نفطر عليه أنا والبنات، وصلت الدوام سويت ابريق شاهي "كالعادة" طلعت التميس وبديت افطر

طلعت اغطي على الشباك وخلال هالوقت قررت اشيك على انظمة العمل الداخلية عندنا وما هي آلية النقل (لأنه كان عندي علم مسبق أن مديري استغفلني وبغيت اتأكد).. لكن قبل أكمل لازم احطكم بالصورة

مديري بالعمل انسان متعاون بشكل عام هذه كانت فكرتي المبدئية عنه

في السنتين الماضية كان علاقتنا جيدة أنا شخص نظامي وملتزم بالقيام بعمله على اتم وجه وهو تعاون معي في شهر رمضان وساعدني بالجدول عساس اقدر ارجع لأهلي بدري

جدياً احاول اتذكر جمايله علي للاسف ما يطري على بالي غير هالنقطة

بقية الاشياء كانت تعتبر مكافأة على عمل أو جهد مبذول، مثلاً قدمت محاضرة فقال لي لك يوم تبصمين فيه بس وتطلعين

مرة كنت محتاجة اجازة وتعاون معي فيها مع اني بلغته عنها بفترة قصيرة جداً (ولا اعتبر هذي تفضل منه لأن العمل كان فيه عدد كافي لكنه هو حاط نظام لازم يصير عندي خبر مسبق)

عموماً كانت تصدر منه بعض المواقف والتصرفات تضايق الواحد لكني ترفعت عنها حفاظاً على الاستقرار

ثم بدأ موضوع النقل ومحاولاتي فيه وبما أن النقل كان على ترقية وظيفية ما كان له أي صلاحية يرفض نقلي نهائياً كما صرح بهذا أكثر من مرة وما زلت إلى يومكم ما اعرف سبب التصريح هذا !!

مع بداية موضوع النقل بدأت نفسيتي تتوتر وقدرة تحملي تتجه للصفر

أعترف أنا شخص هيّن ليّن المعشر ما دامت علاقتنا ودية وقائمة على الاحترام ولا ابالي بتقديم مصلحة الغير على نفسي ما دامت الانفس طيبة فأنا امشي على نهج البستي حين قال:

أحسن إذا كان امكانٌ ومقدرةٌ، فلن يدومَ على الإنسانِ امكانُ

أما عند تجاوز الحد فما اضمن نفسي صراحة ولا اعرف كيف بتصرف لكن الشيء الأكيد إني حريصة عليه هو أني اجاهد نفسي ما اغلط على أحد إنما تصرفي السلبي هو دائماً، دائماً ردة فعل لتصرفك فقط.

المهم، في أحد الأيام بعد ما تعطل موضوع النقل للمرة الثانية كنّا في ضغط عمل وزحمة مراجعين جاء مديرنا الفاضل واتخذ قرار ما لأمه جادة.. موظف صيدلية الطوارئ استأذن فجاء واخذ احد الموظفين عندنا وارسله لصيدلية الطوارئ علماً أن تشغيل صيدلية الطوارئ امر مستحدث والعمل قائم بدونها، رحت للمدير ووضحت له أن قراره كان في غير محله، قلت له أنت مو شا��ف الضغط الي حنا فيه؟ كيف تاخذ موظف من عندنا عشان يفتح صيدلية لحاله وهو ممكن مرضى الطوارئ يجوننا هنا بكل بساطة!! وكان رده كالعادة "أنا ما دريت انكم مزحومين شفت فيه عدد واخذته" يعني اذا أنت مدير وما تدري مين مفروض يدري !!!

طبعاً كلامي ما غير شيء ولا رجع الموظف وجلسنا مضغوطين واكلين هوا

المهم من بكرا رحت له وقلت ابي استأذن قال كيف مو أمس كان مافيه عدد وش هالتناقض !

قلت له يوم أمس قلت لك انه مافيه عدد هل رجعت الموظف الي ارسلته للطوارئ؟ قال لا، قلت يعني أنت تشوفه انه العدد كافي اذاً ابي استأذن، قال لا تجيبين موضوع أمس اليوم شيء وأمس شيء بعدين أنتِ يا نورة إذا الموضوع بمصلحتك سهلتيه وإذا لغيرك صعبتيه

على رأسي مئة ألف علامة تعجب❗️ ❗️❗️❗️❗️❗️❗️❗️

الحين مو أنت تقارن كلامي اليوم بكلامي أمس اذاً اسمح لي ارد عليك بناءاً على مقارنتك، قال استئذان مافيه قلت ميخالف "كنت تحت تأثير الجملة الأخيرة"

الحين أمس قلت لك عددنا قليل ومضغوطين صح ؟ قال صح، طيب هل رجعت الموظف؟ لا، إذاً بناءاً على رأيك أمس المفروض اليوم العدد كافي ايضاً وأقدر اسأذن لكن أنت تقول مافيه عدد اذاً مين المتناقض هنا ؟ قال أنا قلت بس

كلمة متناقضة على سوئها أهون بكثير من اتهامه لي بالأنانية لكن ليه ازعل! اساساً هو شخص ما اعتد برأيه فما يهمني.. ومضت الأيام

لكن يبدو أن الموقف حز بخاطره، بعد يومين ولسبب بايخ ارسل لي رسالة (No Show) وسفهته لكن ما اعجبه الوضع وناداني عنده بالمكتب وتجادلت معه مرة ثانية

ارسال رسالة تحذيرية بدون تنبيه لفظي مسبق تصرف غير مقبول خصوصاً لموظف مجتهد ومعطاء، لو أنا شخص مهمل وغير مبالي ومراعي للعمل فأنت معذور على هذا التصرف، اما تتصرفه معي ! أنا! الي شايلتك فوق راسي ولا عمري قلت لك لا لأي طلب تطلبه!! عيب والله عيب

هذا كان بداية توتر العلاقة بيننا

بعد فشل المحاولة الثانية سعيت مرة ثالثة للنقل وكنت اعيش توتر شديد لأن الموضوع صار شبه صراع بيني وبين احد المدراء في ادارتي وتدخلت ادارات اخرى ومشى موضوعي الحمدلله وتمت المقابلة والموافقة المبدئية.. خلال هذي الفترة بدت الاوضاع ترجع على شوي شوي أنا ما اعطيته صلاحية إنه يتجاوز حدوده معي وهو مثل الي بيدخل بموية باردة، يمد رجله شوي ويرجعها شوي..

لما جاني خبر الموافقة الرسمية وطلب تحديد اخلاء الطرف رحت له مباشرة وطلبت منه يحدد التاريخ، بناءاً ع��ى كلامه انه له صلاحية يخليني عنده شهر كامل من تاريخ صدور قرار النقل وعلى ذلك قال بتجلسين حتى ٢٥ يناير والاسبوع الأخير اسمح لك فيه تروحين، حاولت فيه يقدمه رفض نهائي بحجة ��نه مضغوط وما فيه مجال بسبب اجازات كثير من الموظفين وهذا صحيح بحكم إني سبق طلبت منه اجازة في اسبوع اجازة المدارس ورفض

لكن الطامة وشي ؟ تخيلوا الخميس الي قبل اجازة المدارس ارسل ايميل فيه تكليف احد الموظفين بالادارة وانه هو بيطلع اجازة هالاسبوع !!!!!

علماً أن كل من ينوب عنه عادة طالعين اجازة، يعني اخذ صيدلي من الشباك وحطه مكانه، اضافة إلى انه فيه قانون غير مكتوب أن كل شخص له حق ياخذ اجازة مع الطلاب مرة وحدة بس، أنا رفضني كل المرتين وهو اخذها كل المرتين !!!!

والله يا طق الامبيير عندي، قلة حيا ومستحى صراحة.. وش هالبجاحة يعني !!

لا وفوق هذا تخيلوا انه يوم رجع من الاجازة جاء يستقعد لي بحضوري وانصرافي (كنت اجي بدري واطلع بدري بس هو عنده نظام إن المكان الي كنت اغطي فيه ما لهم صلاحية الساعة المرنة) وطلب مني أوقع استئذان فرفضت، قال اجل اكتبي افادة قلت ماعندي مشكلة

هذي الافادة

ما اعجبه الكلام ورجع طلب مني أوقع استئذان فرفضت، يعني لو بوقعه ليش اكتب الافادة، قال وقعي عشان ما تكبر السالفة قلت له لا والله اعتذر ما راح اوقع وطلعت

قلت للزميلات (وأنا أعرف إن فيهم من يوصل له الكلام) أعلى ما بخيله يركبه ولو فيه جرأة يرفع بي شيء أو يتخذ أي اجراء يضرني بيجيه العلم، لا يعتقد انه بريء ولا عليه اغلاط اقدر افتح عليه تحقيق وعلى مديره الي فوقه ان بغيت

دناءته هذي يسلكها غيري له أما أنا ما تمشي معي، وطبعاً ليومكم ما شفنا الموضوع الي بيكبر ..

نرجع ليوم الخميس 🦦

��لعت اغطي على الشباك وقررت اقرأ انظمة النقل عندنا لأنه على كلامه انه يحق له يحتفظ بي شهر وأنا على فهمي أنه يحق له يحتفظ بي ٤ اسابيع فقط يعني الاسبوع الي هو متفضل فيه علي خرطي ونصاب

فرحت اقرأ عشان اتأكد من معلومتي وانصدمت.. طلع النظام يقول يحق له يحتفظ بي ١٥ يوم عمل فقط من تاريخ صدور القرار!

يعني ما يكفيك انك تعيي علي ارجع وحتى اخذ اجازة بعذر قلة الموظفين تروح تطلع انت وتجلسني فوق المسموح لك واضافة علي كل هذا تقول إنك المتفضل علي !

اسألكم بالله وش يسمى هذا التصرف ؟ لؤم؟ دناءة؟ شح نفس؟ قلة مروءة؟

المهم بما أن النظام يقول ١٥ يوم عمل يعني جمعة وسبت غير محسوبات يعني لو حسبتها يكون آخر يوم عمل لي نظامياً هو يوم الاثنين ٢٢ يناير ٢٠٢٤

شاورت ابوي قلت وش رايك اتعوذ من ابليس ولا اخذ حقي، قال هو يستاهل تكرمينه ؟ قلت لا قال أجل من يجعل المعروف في غير أهله، يكن حمده ذماً عليه ويندمِ

قلت شورك وهداية الله، كلمت الموارد البشرية قالت افضل حل انك تتواصلين مع ادارتك الي بتروحين لها وهم يتواصلون معه قلت بارك الله فيك رأي سديد

تواصلت مع المحزم المليان الكفو ابن الكفو آل كفوان:

ارسلت له فقرة النظام وتاريخ صدور القرار وما صبرت كلمته على طول وشرحت له الوضع قال ابد ازهليه، بس خلينا نشوف أي ادارة المفروض تخاطبه ولا تشيلين هم

وفعلاً على نهاية اليوم تقريباً الساعة ٢:٤٠ ناداني المدير وقال وأنا اقتبس "القصيم ما ردوا على موعد اخلاء الطرف لذلك اليوم كملتي ١٥ يوم وهذا آخر يوم عمل لك عندنا" قلت طيب وطلعت

حتى الآن ما زال يتلبس لباس الفضل وينتظر مني شكر وعرفان، بالله بأي وجه يخاطبني هذا !

أنا والله لو هو ما يدعي الفضل أحب علي، على الأقل فيه صدق أما كذا! حتى الصدق منزوع

شكيت إن القصيم ما كلموه، طلعت وتواصلت معهم قال الا كلمته قبل الظهر وقلت له ان الادارة رفضت ويقولون النظام يسمح له ب ١٥ يوم فقط.. المسكين انلخم ما يدري انها ما تشمل جمعة وسبت ولما حسبها طلع باعتقاده انه مجلسني يومين زيادة ومع ذلك ما اعتذر وقال انه حصل خطأ لا بل تجاوز هذا بمراحل وجابها بصياغة المتفضل

يالله!!! هذا الشخص يعطيك دروس بالاذلال، سبحان ربي الخالق

قمت ضفيت اغراضي، وشرحت وضعي لزميلاتي ووضحت لهم موقفي لأني ادري انه بيقول انها قليلة ادب حتى بعد ما سمحت لها تروح بدري ما قالت شكراً ولا ودعتني > سلمت على الجميع وودعتهم ولا مريت مكتبه قام حذفني من القروب على طول 😂

ما حبيت النهاية، كان ودي إني اودعهم زين اقل شيء، قررت اني اطلب لهم فطور يوم الأحد واقول لهم يذكرونن بالخير 👀

تــــمّــــت. 21.1.2024

[nourah-mw]

تكتبين بالفصحى ، بالعامّي إن شاء الله بالهيروغليفي اهم شي ماتقطعينا، ترى قاعدين نستنى مغامراتك ف القصيم ☕️🦦

ههههههههههههههههههههههههههههه الله يسعدك يا رب 😂❤️

ابشري باذن الله، عاد كلّي أمل لا رجعت ترجع حليمة لعادتها القديمة ويكون تمبلر من اساسيات يومي 💕

[nourah-mw]

سبحان الله

قبل فترة بسيطة كنت افكر بماذا شعر الكتاب وقت كتابتهم ولماذا كانوا يكتبون

لمن الكتاب ؟ لهم ؟ أم للناس ؟ هل هو للمديح أم للفائدة

ثم جاء الرد من المنفلوطي.. كأنه سمع تساؤلي وكأن عبدالعزيز مرسل لينقل لي هذا الجواب

ولحظة قرائتي للتغريدة داهمني شعور قديم، احساس مر علي وقت طويل ما حسيته.. شعور الي ابي اكتب عن هذا الموقف الآن في تمبلر

لذلك اتيت مسرعة..

قد يكون هذا سبب المنفلوطي.. واغلب الظن انه هذا سبب غالبية من يكتب للعلم والفائدة العلمية، لكن ماذا عن البقية؟

مثلاً الروائيون ! هل يستمتع بالكتابة؟ وهل يكتب الرواية لامتاع ذاته ام اتخذها مهنة ؟

عندما تنحرف احداث الرواية إلى الكآبة كموت أحد أسس القصة أو فشل ذريع في احدى خطط الابطال.. ما هو شعوره؟ هل اجبر نفسه على هذا الحدث وكيف بل لماذا؟

وماذا يفعل ليواسي نفسه؟ فهو من بنى هذا العالم وهو من سبب لنفسه هذا القهر والعجز ، أين المفر ؟

من يعلم! قد يكون هذا مربط الفرس وهذه هي متعتهم الحقيقية فما اعجبهم!

[nourah-mw]

صباح الخير

انا من اول الفانزززز الكي

يارب تذكرني

واول ما قلتي ما رح اكتب بعد اليوم زعلتتت الحمدلله انكي رجعتي 🫶🥹

صباااح النور والسرووور والورد المنثووور

يا حي الله كل فانزيني ❤️❤️❤️

لا ما عليك مني تراي خرطي بس سحباتي واجدة الله يصلح حالنا

[nourah-mw]

بإذن الله في ٢٥ من شهر يناير عام ٢٠٢٤ ستنتهي رحلتي مع الغربة

��م قبول نقلي للقصيم فالحمدلله أولاً وآخراً ظاهراً وباطناً دائماً وأبداً❤️

قريباً ستنتهي غربتي وغرابيلي، يالله!

كانت رحلة طويلة من التوتر والأمل والاحباط بل الاقتراب من شفى جفرةٍ من يأس كدت اهوي فيها مراراً لولا لطف الله ورعايته وكلمات أمي وأبي

من شهر مارس عام ٢٠٢٣ وأنا في شدّ وجذب في هذا الموضوع، مرة يكون النقل مرفوض تماماً وأخرى يلوح لي بصيص أمل ثم ما يلبث أن يتبيّن لي أنما اطارد سراباً

فكرة الاستقالة ترددت على خاطري كثيراً وإن لم اجزم بها، بحثت عن وسائل اخرى وفشلت

عشت الفترة هذة باكتئاب من نوع آخر، يختلف عن اكتئاب نجران.. اكتئاب انضج من سابقه

أقل انهيارات عاطفية، اكثر تقبل للرفض مع استمرارية المحاولة.. اقتنعت أن الحياة وصروف الدهر تشكل الانسان على ما تشتهيه هي لا ما يشتهيه هو

لكن بفضل من الله ومنّة في يوم ٢٦ اكتوبر من عام ٢٠٢٣ تمت مقابلتي واعلامي بقبول ادارتي بقرار الترقية مع النقل ورفعه للّجان المختصة لاعتماد القرار

مع أن القرار علّق عند اللجنة ووترونا شوي بس الحمدلله بالنهاية مشت الامور على خير.

المرفقات:

لحظة اعلامي بترشيحي للنقل، يوم الخميس ٢٦ اكتوبر بعد المقابلة، خط الرياض - القصيم السريع بعد تفتيش صلبوخ:

لحظة اعلامي بموافقة اللجنة على أمر النقل، يوم الثلاثاء ٢ يناير، صيدلية اليرموك الشباك الثالث نساء:

ما راح اكتب تمت، باقي بوست اخر يوم عمل بالرياض باذن الله بعدها نختتم بوستات الغربة من غير رجعة ولا شر يارب 🤲🏼

[nourah-mw]

وش ذا شلون كبر فجأة؟

اول حرق ون بيس يجي من تمبلر قبل ابراهيم

واضح انشغل بالابوة عن الحرق 🦦

My name was given to me by my father. It means second to none. I swear to live up to that by restoring this country's barren lands to the paradise they once were. But I'll need you to lend me strength. I have transcended the last 20 years to save this land. From this moment on, Wano will be led by me, Kozuki Momonosuke!

One Piece Episode 1078: "He Returns! The Shogun of the Land of Wano, Kozuki Momonosuke"

[nourah-mw]

"ثم فجأة.. استوعبت اني أتكلم مع رجل، والرجال من المريخ"

التدوينة الأخيرة كانت غيير، سردك أبهرني ودمجك للخواطر والمواقف ): يا جمال كتابتك با نورة، يا عسى الدنيا تكون لك جميلة كجمال كتاباتك. حسيتك بطلة (بمحاربتك للظروف وصبرك) وأيضًا.. بطلة رواية💗 الله ييسر لك ويفتحها بوجهك يارب

ياحلووك والله 🥹❤️❤️❤️

الله يرفع قدرك يا شيخة 😂❤️

اللهم امين امييين ، عاد بالذات هذا السطر جاني شعور غريب لما كتبته، ما ادري كيف كأني حسيت انه واضح ومو واضح ، بالسياق وخارج من السياق

مدري كيف بس وقفت عليه وقت افكر اخليه ولا اعدل عليه ولا احذفه، يبدو أن خيار ابقاءه كان موفق

شكراً لك ولتعبيرك اللطيف الجميل

اسعدك الله مثل ما اسعدتني بهالرسالة قريتها اكثر من مرة وبكل مرة تسعدني

🤍

[nourah-mw]

ليه الدنيا مب مثل اهلي وليه كل الرجال بحياتي مب مثل ابوي واخواني

هذه الجملة اوجعتني

لأن أنا دائم أقول ليش أبوي وخواني مب زي الرجال ألي في الدنيا

أنا الوضع عندي بالعكس

أرتاح بعيد عن البيت

يا ليتني أنا المغتربة وأنتي عند أهلك

الله يصلح حالكم ويصلح سرايركم ويولف بين قلوبكم يارب

لعل أبوك واخوانك أفضل بكثير من رجال هالدنيا لكنه سوء تفاهم فقط، وقد يكونون سيئين كما تتصورين

لكنهم بالنهاية أهلك وناسك..

يارب أصير أنا عند أهلي وأنتِ عند أهلك وعلاقتك فيهم أفضل

الله لا يبيّن غلاهم وأنا أختك ❤️