omarqabeel

[omarqabeel]

الجبار - Orion / الثور - Taurus / عنقود الثريا - The Pleiades / العقرب - Scorpio

الجبار - Orion

الجبار من أشهر وألمع المجموعات في السما، أفضل وقت تشوفها فيه هو يناير وشهور الشتا، شخصيًا دي كانت أول مجموعة أنا بشوفها ومعرفش إنها مجموعة لحد لما اتعلمت،

اوريون أو الجبار كان عند الإغريق من أكثر الرجال جمالًا ويبقى إبن إله البحر بوسيديون.

اوريون له كذا رواية، منهم واحدة بتقول إنه وقع في غرام الثريا، بنات أطلس السبعة "بيعملوا كل حاجة مع بعض باين :"" فضل يلاحقهم لحد لما زيوس أنقذهم من مطاردة اورين ليهم وحطهم في السما في عنقود الثريا، هنحكي عنه بعد كده.

اوريون شكله في السما مواجه للثور وباين إنه لسه بيطارد السبع أخوات لحد دلوقتي.

رواية تانية بتقول إن اوريون كان بيحب ميروب، بنت الملك اينوبيون الجميلة واللي كانت كارفاه، في مرة البيه كان سكران طينة وحاول يعتدي عليها، أبوها الملك عرف وعاقبه بإنه خرق عينيه ونفاه من أرضه.

هيفايستوس، إله النار والحرف، صعب عليه اوريون وبعتله مساعد علشان يبقى دليله لإنه مش شايف، لحد لما في مرة اوريون قابل وحي قاله إنه لو فضل ماشي ناحية الشمس بصره هيرجع، اوريون عمل كده وبصره رجع وعلشان كده هو مواجه للشرق.

عرفوا الجبار زمان خالص في حضارات مختلفة، وأكتر جزء مميز في مجموعته وأعتقد إن أغلبكم شافه في وقت من الأوقات حتى من غير ما يعرف إيه ده، 3 نجوم ظاهرين في السما فوق بعض، دول اسمهم حزام الجبار زي في الصور كده.

وبالمناسبة، أهرامات الجيزة بتاعتنا وجودهم جنب بعض كده يحاكي ال3 نجوم دول في السما. ولزيادة الدقة، غرفة التهوية في هرم خوفو تتحاذى مع نجمة من الحزام اسمها النطاق - Alnitak.

وأيوة، مأخوذة من العربي. نجوم كتير أوي من نجوم المجموعات أصول اسمها من اللغة العربية ذكرنا منهم شوية في القصص اللي فاتت

الثور - Taurus ♉

الثور معروف حتى من وقت العصر البرونزي اتوصف بالثور في حضارات مختلفة الإغريقية والمصرية وكمان بابليون القديمة، وفي كهوف لاسكو من العصر الحجري في رسوم له ولمجموعة الثريا أو السبع أخوات.

المهم مين الثور ده بقى؟ الثور ده زيوس، الراجل ده طالعلنا في البخت باين :"

عشان يعجب ويشاغل الأميرة يوروبا، الجميلة بنت ملك أجينور الفينيقية، عمنا زيوس تخفّى وسط قطيع ثيران الملك وعلشان هو الثور الحليوة اللي فيهم جذب انتباهها، الست راحت تبدي إعجابها به وبلونه الأبيض، وأول ما قعدت على ظهره راح البيه قايم وواخدها جري على جزيرة كريت بعيد بعيد وحديهم، جزيرة في البحر المتوسط دلوقتي،

عدّاها وهو ثور وقالها تادا وكشف عن نفسه الحقيقية واتجوزوا.

حب بقى يكلل فوزه وعشان كده حط صورة الثور في السما وعلى الأرض حط يوروبا، القارة بتاعتنا دلوقتي.

وفي رواية تانية، بتتكلم عن آيو، اللي قولنا عنها في قصة سيفيوس وكان بيحبها زير النساء زيوس من ورا مراته هيرا إلهة الجواز كانت هتقفشهم، :"D، وعشان كده حول آيو لثور وخباها منها بس آيو"الثور" هربت ونطت في البحر.

في الثقافة البابلية بقى، الثور ده من موقعة جلجامش -واحدة من أقدم الأعمال الأدبية من بلاد الرافدين، وفيها جلجامش بيواجه الثور المُرسل من عشتار الهة الحب والجمال علشان يهزم البطل اللي رفض مساعدتها

وجلجا��ش ساعات بيتمثل إنه اوريون في المجموعة المقابلة اللي قولنا عنه.

ليه باين راس الثور بس؟ في افتراض إن بقيته غاطسة في البحر اللي عداه عشان ياخد يوروبيا للجزيرة أو إنه رابض علشان يسمح ليوروبيا تطلع على ظهره، ولكن في الحقيقة هو مفيش مكان السما عشان هو كبير جدا :" مجموعتين الحمل والوحش Cetus موجودين في مكان الجسم كامل. حاجة كمان انتريستينج، الثور باين في السما إنه بيرجع لورا، وتفسيرهم للسبب إنه خايف من الجبار اوريون.

ألمع نجمة في مجموعة الثور هي الدبران Aldebaran ومعناها الذي يتبع، لأنها بتتبع الثريا.

عنقود الثريا - The Pleiades

الثريا مختلفة شوية لأنها مش مجموعة ولكنها عنقود نجمي فيه أكتر من ألف نجم بس طبعًا بُعاد جدًا على إننا نشوفهم منفصلين، تبعد عننا حوالي 444 سنة ضوئية :" العنقود ده قصته لها علاقة بالجبار، زي ما قولت إنه كان بيحب سبع بنات اخوات :" ويبقوا بنات أطلس وبيحاول يشقطهم بس معرفش وكانوا كارفينه وعلشان مش عارفين يعملوا إيه زيوس أنقذهم وحطهم في السما.

ألمع تسع نجوم في العنقود أساميهم أسامي السبع بنات وابوهم أطلس وامهم.

العقرب - Scorpio ♏

العقرب له روايتين مرتبطين بالجبار اللي قولنا عنه قبل كده، له رواية تالتة خالص وهي حبه لآرتميس وفي مرة حاول يعتدي عليها ف هربت منه وبعتت العقرب علشان يقتله.

أو رواية تانية: كونه صياد قوي وعايز يبهر آرتميس بيه راح قتل كل حيوانات الغابة وجابهم لها قدام بيتها كهدية :"D طبعا اتفزعت من المنظر كونها إلهة الحياة البرية وحامية الحيوانات، فأمرت العقرب يلدغ اوريون ومات،

بس زيوس تكريما له -بتكرمه على إيه ياعم- واللي عمله للآلهة حطه في السماء.

المهم إن مورال القصص اللي بتجمع الجبار والعقرب هو عقابه جزاء كل أعماله، وعلشان كده المجموعتين دول في السما عكس بعض في السما؛ لما اوريون بيغرب العقرب بيشرق. وأيوا، كل ما في السما بيشرق ويغرب زي الشمس بالظبط.

العقرب أروع مجموعة شكلًا في السما، شكله مميز تحديدًا ألمع نجمة Antares وهي قلب العقرب ولونها أحمر.

Illustrated pictures © What We See in the Stars book by Kelsey Oseid

[omarqabeel]

الدب الأصغر/الدب الأكبر - Ursa Minor/Ursa Major

في قصة من القصص، زيوس كان معجب بحورية اسمها كاليستو، هييرا مراته الغيورة جدًا، لما عرفت حوّلت الحورية الغلبانة دي لدبة.

بهيئتها دي وهي دب كده قابلها إبنها آركاس - arcas، رَفَعت إيديها عشان تحضنه إبنها بقى، الواد اتخض ياعيني ميعرفش إنه طرزان وأمه دبة :"، كان رامِ سهام ماهر، طلع القوس والسهم وجه يضربها بس زيوس اتدخل وأنقذها، إزاي بقى؟

البيه بدل ما يرجّع الست اللي اتظلمت بسببه لإنسانة تاني، لأ إزاي قام حولّها إبنها دب. مش بس كده، لأ راح ماسكهم كده من ديولهم ووداهم لبر الأمان، في السما بقى، عملهم نجوم.

الأم هي مجموعة الدب الأكبر، خلينا نقول الدبة علشان النسويات؟ والدب الأصغر هو إبنها، واضحة يعني.

الدب الأصغر أسهل مجموعة تلاقيها في السما علشان واحدة من نجماتها السبعة يبقى نجم الشمال - Polaris

بولاريس مكانه فوق محور الأرض بالظبط ومش بيتحرك من مكانه بالنسبالنا رغم دوران الأرض، نجم الشمال كان زمان مهم للناس علشان يحددوا الإتجاهات.

Illustrated pictures © What We See in the Stars book by Kelsey Oseid

[omarqabeel]

القوس - Sagittarius / الجدي - Capricorn / الحوت - Pisces

القوس - Sagittarius ♐

القوس قصته مش ملحمية زي المجموعات الباقية، وبالنسبة لي قصته هي الأكثر مللًا. في الأول اتكلموا عن مجموعة القوس على إنهم مجموعتين، القنطور والقوس بتاعه وده علشان النجوم اللي بترسم شكل القوس أشبه بأبريق الشاي وأوضح في السما.

ولكن دلوقتي، القوس بيجسد قنطور -كائني المفضل في هاري بوتر- ، نص إنسان نص حصان، باين في السما وهو بيوجه سهمه تجاه المجموعة المجاورة له وتحديدًا قلب العقرب وألمع نجومه زي ما قولنا.

أصول القوس سومارية، وبتوصف إله الحرب والصيد، اللي عندهم كان يشبه كائن القنطور وله جناحات، الصورة السومرية دي نقلها الإغريق بس سابوا الجناحات وده سبب عدم وجود قصة واضحة للقوس عند الإغريق، مكنش حد يعرفه من المؤرخين.

ناس منهم شكوا اصلًا إن ده قنطور، منهم عالم الفلك إراتوستينس ورأيه إن القناطير مش بتستخدم قوس وسهم، ووصفه بأنه أشبه بكائن اسمه ساتير satyr؛ كائن خرافي بردو يشبه هجين البشر والحصان :" قال يعني فرقت ياعم.

وده بيمثل شخصية كروتوس ابن Eupheme، كانت ممرضة لآلهة الإلهام، بنات زيوس التسعة -زيوس ده مبيتهدش؟-

ذكر المؤرخون إن كروتوس - Crouts يبقى إبن بان - Pan، في اتفاق ضمني مع إراتوستينس إن رامي القوس والسهم ميبقاش قنطور ولكن ساتير ويبقى هو رامي السهام اللي المجموعة اتسمت على اسمه، كروتوس هو مخترع الرماية وكان عايش على قمة جبل هيليكون - Helicon. وقريب من آلهة الإلهام - Muses هم اللي طلبوا من زيوس يخليه في السما وهو بيعلم فن الرماية، و خد شكل رجل الحصان علشان كان فارس ماهر.

الجدي - Capricorn ♑

الجدي الموصوف في المجموعة هو كائن غير مألوف، عنده إيدين معزة وديل سمكة، نسميه معزة البحر :"

القصة أصولها عند البابليين والسومريين علشان كانوا بيحبوا الكائنات البرمائية.

الجدي كان ومازال مرتبط ب الانقلاب الشتوي solstice.

الشباب الإغريق بقى قالوا إيه، إن معزة البحر دي تبقى الإله بان أبو كروتوس القوس فاكره؟، إله مرح كده، كان بيقضي أغلب وقته بيجري ورا ستات أو نايم :"، كان بيخض الناس بصوته العالي وزعيقه، واللي بالمناسبة هي أصل كلمة Panic -عارفها عز المعرفة أنا ��لكلمة دي-

زيوس كرّم بان في السما لأنه أنقذ الآلهة الأولمبية مرتين، الأولى في حربهم مع الجبابرة - titans لما بان نفخ في الصدفة بتاعته وخوف الجبابرة، وفي رواية أخرى كان بيحدف صدف :" -مش فاهم إزاي جبابرة وإزاي طوب يعني؟-

وبعدها هرب ونط في النيل ونص جسمه بقى السمكة وسميناه معزة البحر:"

الحدث التاني وهنتكلم عنه في مجموعة الحوت، بان هو اللي حذر الآلهة من تيفون الوحش اللي بعتته جايا مازر ايرث، اقترح عليهم يتحولوا لحيوانات علشان يضللوا تيفون، وهو نفسه اتحول لمعزة البحر دي ونط في البحر.

الحوت - Pisces ♓

الإغريق والبابليين يتشاركوا نفس القصة، بس أصلها للبابليين -يا إغريق يا حرامية-، الإتنين شافوا بُرجي الجميل بيرسم سمكتين مربوطين بحبل، وبيحكوا القصة الرومانية الخاصة بفينوس وكيوبيد لما ربطوا نفسهم بحبل واتحولوا لسمكتين علشان يهربوا من الوحش تيفون.

القصة بتحكي عن أوائل الأحداث في ميثولوجيا الإغريق، لما الآلهة الأوليمبية هزموا الجبابرة - titans والعمالقة - giants بطلوع الروح ياعيني قامت مازر ايرث -جايا- قالتلهم "سربرايز يا ولاد" وبعتتهم ليفل الوحش، تيفون وحش مرعب محدش شاف زيه بشكله المخيف، عنده 100 راس تنين وبيطلع نار من عنيه، ميثولوجيا بقى.

جايا بعتت البتاع ده قال يعني هيهزم فريق فيه زيوس :"

أول من شافه كان بان أبو ساجيتاريوس، قام مزعق "إجري يلا" وحذرهم منه وطلع يجري ناحية البحر، واتحول لمعزة البحر -مجموعة الجدي-.

هتسألني طيب وفين السمكتين؟ اصبر جايين اهو. مدام افروديت إلهة الحب والجمال وابنها ايروس إله الحب بردو :" راحوا يستخبوا بين الشجر على ضفاف نهر الفرات بس الهوا شد حبتين افروديت خافت، مسكت ابنها وقالت "إبني حبيبي هيقتلوه" واستنجدت بحوريات البحر ونطت لهم في الماية، في رواية من القصة ظهر فيها سمكتين وشالوهم على ظهرهم إلى بر الأمان، رواية أخرى هم نفسهم اللي تحولوا للسمكتين. نجمة الريشة - Alrescha من العربية، في المجموعة تمثل عقدة الحبل.

Illustrated pictures © What We See in the Stars book by Kelsey Oseid

[omarqabeel]

العذراء - Virgo / الميزان - Libra

العذراء - Virgo ♍

مجموعة العذراء لها روايتين لهم علاقة بالزراعة والعدل، واحدة منهم كونها إلهة العدالة دايك Dike، كانت بنت زيوس ووجودها جنب مجموعة الميزان الدليل على العدالة، والتانية كونها إلهة الزراعة.

دايك كانت عايشة في العصر الذهبي للبشرية وقتها كان كرونوس هو حاكم اوليمبس، كانت عايشة على الأرض في وقت ازدهار ورخاء وسلام. الوقت كله ربيع، مكنش في فصول :" تخيل؟ والزرع بينمو من غير تدخل الناس، والناس مبتكبرش وحاجة منتهى الجمال ولا كأنهم -أستغفر الله- آلهة، ولا حد منهم بيشتغل ولا يعرف حزن ولا حرب.

لحد لما زيوس قال "إيه الزهق ده؟ يلا نتخانق" وانقلب على أبوه وحكم مكانه وبدأ العصر الفضي وبدأ الانهيار، الزراعة قلت والناس نشب بينهم صراعات ونزاعات نتيجة لضعف الحكام وفرض الضرائب، جت الست دايك تنصح الناس وتحذرهم عن الخراب اللي هيحصل بسببهم.

كان نفسها يا حبة عيني ترجع أيام الازدهار، جمعت الناس واديتهم كلمتين في جنابهم وإن اللي بيحصل ده بسببهم واللي جاي طيبن على دماغكم وانتو لسه شوفتوا حاجة، وسابتهم وطلعت عاشت في الجبل واديتهم واحدة معلش ابويا عايزني.

طبعا انت مستني اقولك إنهم سمعوا كلامها وراحولها عشان تنقذهم وأنقذتهم وكده؟ لأ، فضلوا يتنيلوا من أسوأ لأسوأ لحد لما بقوا على الحديدة خالص وفضلوا يقتلوا في بعض.

مقدرتش تستحمل مشاكل البشر -سيم يا دايك سيم- سابتهم وطلعت الجنة وده مكانها دلوقتي، وعلشان كده بنشوفها في السما جنب الميزان. ألمع نجمة في المجموعة هي السنبلة - Spica وأفضل وقت تشوف فيه المجموعة في نص الربيع كده.

الميزان - Libra ♎

اليونانين القدماء كانوا في الأول فاكرين مجموعة الميزان دي هي مخلب من مخالب السرطان.

بس اللي ربط المنطقة دي من السما بالميزان هم الرومان، في القرن الأول ق.م لإن القمر كان موقعه في الميزان وفي نفس الوقت اللي روما اتبنت فيه وده تفسير ليه الميزان مجموعة الرومان المفضلة، وربطوها بالاعتدال الموسمي Equinoxes، يومين انتصاف الليل والنهار، مرتين في السنة وبيمثلوا بداية فصول الربيع والخريف.

مع ربط المجموعة دي بالميزان انتهى ارتباطها بمخالب السرطان، وبدأت الصلة بينه وبين إلهة العدالة دايك، المتمثلة في مجموعة العذراء.

وعلشان الناس متنساش إن مجموعة الميزان كانت في وقت من الأوقات مرتبطة بالسرطان، النجمة الألمع فيها اتسمت الزبان الشمالي - Zubeneschamali واللي معناها المخلب. الميزان هي المجموعة الوحيدة اللي بتمثل جماد مش إنسان أو حيوان.

Illustrated pictures © What We See in the Stars book by Kelsey Oseid

[omarqabeel]

الحمل - Aries / الجوزاء - Gemini / الدلو - Aquarius

الحمل - Aries ♈

أثاماس، ملك ثيساليا العظيم، كان عنده توأم فريكسوس وهيلي، أبوهم الملك اتجوز اينو واللي بقت المثال الحي لمرات الأب، كانت بتغير منهم وعمالة تعمل مكائد ضدهم.

وحطت خطة تخلي الأرض على مشارف مجاعة لما بوظت محصول القمح، ولما جوزها راح يسأل الوحي نعمل إيه في المجاعة دي مرات الأب رشت الوحي :" علشان يقول للملك إن حل المجاعة إنك تضحي بولادك.

اتبعتلهم حَمَل سحري صوفه ذهبي عشان ينقذهم وياخدهم إلى كولخيس - Cloches بعيد عن مرات أبوهم وشرها. بتسأل مين بعته؟ هقولك، أمهم نيفيله Nephele، وفي رواية اخرى هيرميس رسول الآلهة الإغريق وإله البحارة وابن زيوس هو اللي بعته لما صعبوا عليهم.

وهم الاتنين راكبين على ظهر الحمل ده وطايرين لبر الأمان، هيلي وقعت من عليه، -مكانتش ماسكة كويس باين :"- وغرقت في البحر في منطقة دلوقتي اسمها مضيق الدردنيل.

لما وصل فريكسوس بالسلامة إلى كوليخيس، أوروبا الشرقية دلوقتي على ساحل البحر الأسود، رحب بيه الملك. تعبيرًا عن شكره وامتنانه لوصوله بالسلامة ضحّى بالحمل وقدم للملك الفرو بتاعه وفي المقابل الملك جوزوه بنته.

وتكريمًا بقى لتضحية الحمل وإنقاذه لأولاده، زيوس حطه في السماء تخليدًا.

الجوزاء - Gemini ♊

في اللاتينية Gemini تعني التوأم.

مجموعة الجوزاء بتمثل التوأم كاستور وبولوكس، ولاد ليدا ملكة سبارتا، بولوكس ابن زيوس، وكاستور ابن ملك سبارتا تينداريوس توأم من الأم بس، شوفت سمير وشهير وبهير؟

التوأم المتشابه -إزاي معرفش- كبروا مع بعض وكانوا قريبين أوي، كاستور كان فارس ممتاز وشاطر في المبارزة وهو اللي علم هيركليز المبارزة، بولوكس كان ملاكم جسور وقوي، معرفش أنا كان في ملاكمة من زمان كده؟

كان الشابان في رحلة استكشافية عبر البحر، وصلوا وجهتهم وخلصوا رحلتهم وراجعين، قابلهم جدع كده اسمه اميكوس -أعظم متنمر في التاريخ- قالهم محدش هيستكشف هنا ولا هيمشي إلا لما نلعب ماتش بوكس، طالما صحيت يبقى لازم اتخانق، طبعًا جه بولوكس ولاعبه وكسب طبعًا علشان هو بطل القصة.

في رواية أخرى، التوأم أنقذوا طاقم الرحلة أكثر من مرة في رحلات مختلفة، واتعرفوا بحاميين البحارة، وإنهم مُنحوا قوة إنقاذ كل البحارة اللي موتهم بوسيدون إله البحر. البحارة دايمًا لما يشوفوهم في السما كانوا بيحسوا إنهم في أمان من العواصف وما شابه.

لما كاستور اتقتل في عركة ما، علشان كان بصباص البيه، بولوكس أخوه حزن عليه وطلب من زيوس إنه يخليه خالد زيه، وزيوس الطيب سمع الكلام وحط الاتنين اخوات في السما.

ألمع نجمتين في المجموعة بيمثلوا رأس كل واحد فيهم واسامي النجوم على اساميهم، كاستور وبولوكس، وأفضل وقت تشوفهم في السما هو فبراير وبداية الربيع.

الدلو - Aquarius ♒

صورة الدلو في السما بترسم شاب صغير حليوة كده معاه قُلة :" أو أبريق، بيصب منها مياه ورحيق.

الولد الحليوة في القصص الإغريقية هو جانيميد - Ganymede ابن الملك تروس - Tros، عند اخواتنا الإغريق جانيميد كان أحلى شاب على وجه الأرض، شاب روش من طروادة زيوس شافه في يوم كان بيرعى أغنام أبوه وقال الله والله الولد ده ينفعنا، بس في الحقيقة السبب وراء وجوده هو عندًا في هيرا مراته.

وقام نازل متخفي في شكل نسر علشان يجيبه يبقى في اوليمبس مع الآلهة، وفي رواية أخرى زيوس بعت النسر، النسر اتكرم في مجموعته المجاورة aquila.

جه جانيميد لأوليمبس واشتغل عندهم باريستا :" أو حامل الأكواب بتاعهم واشتغل يصب لهم خمور -أستغفر الله-

وفي القصص المصرية القديمة، المجموعة دي كانت بتمثل إله النيل بتاعنا ده، الإله حابي.

Illustrated pictures © What We See in the Stars book by Kelsey Oseid

[omarqabeel]

السرطان - Cancer / الأسد - Leo

السرطان - Cancer ♋

قصته مشابهة للأسد سيكا عشان بتدور عن قصة هيركليز و الاثني عشر عمل. مش هنخش في تفاصيل جرائم هيركليز اللي مكانتش غلطته ولبستهاله هيرا مرات زيوس الغيورة -انا كرهت الست دي- علشان كارهة حب زيوس لإبنه هيركليز، وبسبب أفعالها الثعبانية هيركليز اتحكم عليه يعمل الاثني عشر عمل في خدمة الملك يوريستيوس، ملك اليونان وقتها.

مين السلطعون ده بقى، ده بعتته الست هيرا عشان يشتت هيركليز في واحدة من الاثني عشر مهمة، كان فيها بيقاتل الوحش هيدرا؛ وحش ثعباني بجد وله تسع رؤوس، كل ما تقطع واحدة بتطلع تاني، ولكن زيوس كان معاه ابن عمه ايولاس كان بيحرق كل راس تتقطع عشان ميطلعش مكانها ويكسبوا، هييرا خافت يكسبوا وبعتت السرطان علشان يشتت هيركليز ولكن هركليز شاطه برجله جامد لحد ما بقى في السما :"

وفي رواية تانية السرطان منه لنفسه قرر يطلع من المستنقع اللي فيه هيدرا ويعض هيركليز ولكنه داس عليه فعصه، وهيرا مرات الأب الشريرة حطته في السما لجهوده الفارغة دي :" ولكن برغم إنه بتكرمه في السما ولكن حطته في مجموعة نجومها خافتة، الأخفت على الإطلاق في الاثني عشر مجموعة من الأبراج، أصله معملش حاجة يعني.

الأسد - Leo ♌

مجموعة من القدماء، الناس شافوها وقدروا يتعرفوا عليها في السما، وفي دلائل أثرية بتقول إن الناس في بلاد الرافدين كان عندهم مجموعة مشابهة للأسد من 4000 سنة قبل الميلاد.

الشباب الإغريق ربطوه بأسد نيميا الشرس اللي عاش في كهف في الغابة، وارتبط بقصة أعمال هيركليز الاثني عشر للملك يوريستيوس يكفر بهم عن ذنوبه، أولهم قتل الأسد. الأسد كان مؤذي بيفترس حيوانات الغابة ومتربص للبشر كمان، ناس كتير حاولوا يقتلوه ولكن محدش قدر وماتوا كلهم لأن جلده صعب اختراقه وقتله كان صعب ولا حتى بالرماح.

هيركليز عرف إن مستحيل هزيمته بالسهام، اكتشف ده لما رمى سهم ناحية الأسد والسهم وقع مخترقش :"

وده خلاه يعمله فخ في كهفه، قفل مدخل من الاتنين وبكل شجاعة قام هيركليز رفع عصايته ودخل على الأسد اللي فضل يتراجع للكهف وبدأت المصارعة بينهم وانتهت بخنق الأسد للموت وخرج هيركليز بجثته زي طرزان كده في الفيلم :" وأصبح منقذ سكان نيميا.

استخدم بعدها مخالبه الحادة علشان يقطع جلده واستخدمه كمعطف كامل برأس الأسد وكان مخلّي شكله أقوى.

في روايتين بيفسروا ليه الأسد في السما، الأولى -والأرجح بالنسبالي- هي إن الأسد اتحط في السما كونه ملك الوحوش وأقواهم وده اللي قاله عالم الفلك إراتوستينس، والرواية التانية هي إن زيوس قرر يحيي ذكرى العمل البطولي لهيركليز وحط صورة الأسد المنهزم في السما.

ألمع ست نجوم في المجموعة بيمثلوا رأس الأسد منهم الجبهة - Algieba.

Illustrated pictures © What We See in the Stars book by Kelsey Oseid

[omarqabeel]

Cepheus الملتهب - Cassiopeia ذات الكرسي -Andromeda - اندروميدا

سيفيوس الملك والأب، كاسيوبيا الملكة والأم، اندروميدا الأميرة وبنتهم. ال3 دول مع بعض لأن قصتهم مترابطة وهم اصلًا أسرة مع بعضهم :"

سيفيوس - Cepheus

ملك اثيوبيا -مش اللي نعرفها دلوقتي- حاليًا منطقة جنوب شرق البحر المتوسط والبحر الأحمر واللي فيها دلوقتي مصر وفلسطين والأردن. في روايتين يفسروا وجوده في السما، الأولى تعزيزًا له بعد اللي عملته مراته وساعدت في تدمير مملكته. والرواية التانية إنه ملك ضعيف معرفش يحكم ويشكم مراته ويسكتها "وكلمته كانت بتنزل الأرض عادي :"" اتحط في السما عقابًا يفضل يسمع عجرفة وغطرسة مراته اللي دمرته، وعلشان كده مجموعة سيفيوس في السما نجومها خافتة شوية، عقابًا ليه بقى؟ عملت إيه كاسيوبيا يعني؟

ذات الكرسي - Cassiopeia

كانت ست متعالية ومغرورة، في مرة كانت قاعده بتدلع قدام مرايتها ��تسرح شعرها، تفاخرت بنفسها زيادة حبتين وقالت "إيه الحلاوة دي؟ أحلى واحدة في العالم، حتى أحلى من كل الحوريات - Sea Nymphs" واللي منهم أمفيتريت - Amphitrite مرات بوسيدون - Poseidon إله البحر. أمفيتريت وصلها كلام كاسيوبيا واتعصبت، راحت طلبت من بوسيدون إنه يعاقبها، سمع الكلام وبعت وحش البحرCetus -له مجموعته- وحش أشبه بالحوت كده عشان يغرق ويدمر أرضها هي وسيفيوس. قام عمو سيفيوس راح يطلب نصيحة الوحي إزاي يمنع الكارثة دي، الوحي قاله الطريقة الوحيدة علشان تتجنب دمار أرضك وهجوم cetus وبوسيدون كمان يرضى عنكوا إن كاسيوبيا تسحب كلامها وتعترف إن الحوريات أحلى يا إما يضحوا ببنتهم الغلبانة اندروميدا :"

اندروميدا Andromeda

طبعًا لغطرسة الست كاسيوبيا ضحّوا ببنتهم عادي :" وسابوها مقيّدة بغلال في صخرة للوحش وهي بتقول "انتوووو بتلعببوواا" وراحت تكفّر عن ذنب أمها ولكن كانت بت مرزقة وظهر لها الأمير فرساوس - Perseus. اندروميدا، اللي كانت حلوة اوي يا لمبي، شافها فرساوس أول مرة افتكرها تمثال رُخام واللي خلاه يتأكد إنها إنسانة هو شعرها اللي طاير، -مش فاهم أنا إيه المجاملة في إني اقولها انتي تمثال :"D- المهم فضل يسألها عن اسمها ومربوطة ليه وهي من كسوفها كانت ساكتة، ولولا إنها مقيدة كانت غطت وشها من الكسوف -أحسنتي يا بنتي مش زي أمك- بس ردت عليه لاحسن يفتكر إنها فعلًا مذنبة، أنقذها وهزم الوحش واتجوزها في الآخر. وقامت أثينا إلهة الحكمة والقوة إحياء ذكرى أندروميدا في السما وحطتها جنب المجموعتين اللي بيمثلوا زوجها فرساوس وأمها. على عكس أغلب المجموعات في السما، كاسيوبيا موجودة مش تكريمًا ولكن إذلالًا علشان اللي عملته، زيوس وبوسيدون هم اللي حطوهم في السماء، كاسيوبيا كعقاب لغرورها تعجرفها محكوم عليها تقضي نص السنة موجودة في السماء مقلوبة كإهانة، كاسيوبيا اللي بردو اسمها ذات الكرسي، بتتصور في السماء قاعدة على الكرسي بتسرح شعرها، أفضل وقت تتشاف فيه وقت فصول الشتا وبتبقى مقلوبة كإنها هتقع. هي وسيفيوس موجودين في جزء السماء الشمالي وبيدوروا حول نجم الشمال - Polaris.

Illustrated pictures © What We See in the Stars book by Kelsey Oseid