Ang blog na ito ay ginawa ni Ali Zander D. Ramon seksyon ng GED117_FOPI01_1Q2324 bilang pagsusuri sa tula ni Jose Corazon de Jesus. Ang mga tulang “KALUPI NG PUSO”, “SA PAMILIHAN NG PUSO”,” SA BILANGGUAN NG PAG-IBIG WALANG SALA’Y NAPIPIIT!”, “KAMAY NG BIRHEN”, at “AGAW-DILIM” ay para bibigyan ng opinyon sa mensahe at kaisipan ng tula.
Ang mga tulang ginawa ni Jose Corazon de Jesus ay maari nating maiugnay sa kasalukuyang panahon at kapakinabangan nito o halaga sa kasalukuyang panahon ng lipunan at pangkatauhan.
0 notes
KALUPI NG PUSO
Isinulat ni Jose Corazon de Jesus
Talaan ng aking mga dinaramdam,
Kasangguning lihim ng nais tandaan,
bawat dahon niya ay kinalalagyan
ng isang gunitang pagkamahal-mahal
Kaluping maliit sa tapat ng puso
ang bawat talata’y puno ng pagsuyo,
ang takip ay bughaw, dito nakatago
ang lihim ng aking ligaya’t siphayo.
Nang buwan ng Mayo kami nagkilala
at tila Mayo rin nang magkalayo na;
sa kaluping ito nababasa-basa
ang lahat ng aking mga alaala.
Nakatala rito ang buwan at araw
ng aking ligaya at kapighatian…
isang dapithapo’y nagugunam-gunam
sa mga mata ko ang luha’y umapaw…
Anupa’t kung ako’y tila nalulungkot
binabasa-basa ang nagdaang lugod;
ang alaala ko’y dito nagagamot,
sa munting kaluping puno ng himutok.
Matandang kalupi ng aking sinapit
dala mo nang lahat ang tuwa ko’t hapis;
kung binubuksan ka’y parang lumalapit
ang lahat ng aking nabigong pag-ibig.
Sa dilaw mong dahong ngayon ay kupas na
ang lumang pagsuyo’y naaalaala,
O, kaluping bughaw, kung kita’y mabasa
masayang malungkot na hinahagkan ka…
May ilang bulaklak at dahong natuyo
na sa iyo’y lihim na nangakatago,
tuwi kong mamasdan, luha’y tumutulo
tuwi kong hahagkan, puso’y nagdurugo.
Kaisipan ng tula
Ang tula ni Jose Corazon de Jesus na "Kalupi ng Puso" ay nagpapakita ng damdamin ng pag-ibig sa pamamagitan ng isang munting kalupi. Ipinakita ng makata ang kalupi bilang simbolo ng pagmamahal, ligaya, at lungkot. Sa pamamagitan ng kalupi, naipahayag ang pag-asa, pangarap, at pangungulila sa pag-ibig. Ang tula ay isang makatang pag-alaala sa mga karanasang puso na puno ng emosyon.
Mensahe ng tula
Ang tula ni Jose Corazon de Jesus na "Kalupi ng Puso" ay nagpapahayag ng damdamin ng pag-ibig, kasayahan, at lungkot. Sa pamamagitan ng imahen ng kalupi, ipinapakita ng makata ang karanasang umiibig at nagmumula sa puso. Binibigyang diin ng tula ang halaga ng pag-alaala sa mga magagandang alaala at sakit ng pagkawala. Sa huli, ipinapaabot nito ang mensahe ng pag-ibig bilang isang makapangyarihang damdamin na nagdadala ng saya at pighati sa buhay ng tao.
0 notes
SA PAMILIHAN NG PUSO
Isinulat ni Jose Corazon de Jesus
Huwag kang iibig nang dahil sa pilak
pilak ay may pakpak
dagling lumilipad
pag iniwan ka na, ikaw’y maghihirap.
Huwag kang iibig nang dahil sa ganda
ganda’y nagbabawa
kapag tumanda na
ang lahat sa mundo’y sadyang nag-iiba.
Huwag kang iibig sa dangal ng irog
kung ano ang tayog
siya ring kalabog
walang taong hindi sa hukay nahulog.
Huwag kang iibig dahilan sa nasang
maging masagana
sa aliw at tuwa
pagkat ang pag-ibig ay di nadadaya…
Kung ikaw’y iibig ay yaong gusto mo
at mahal sa iyo
kahit siya’y ano,
pusong-puso lainang ang gawin mong dulo.
Kung ikàw’y masawi’y sawi kang talaga
ikaw na suminta
ang siyang magbata;
kung maging mapalad, higit ka sa iba.
Sa itong pag-ibig ay lako ng puso
di upang magtubo
kaya sumusuyo
pag-ibig ay hukay ng pagkasiphayo.
Kaisipan ng tula
Naglalaman ng kaisipang ang pag-ibig ay hindi dapat batay sa yaman o kagandahan. Sa halip, ito'y dapat nagmumula sa tapat na damdamin ng dalawang tao. Binibigyang diin ng tula ang kahalagahan ng pagmamahal na tunay at hindi nabibili, at ang pagpili ng tamang kasintahan na magmamahal ng tapat at buong-puso.
Mensahe ng tula
Naglalaman ng mensahe na ang pag-ibig ay hindi dapat batay sa yaman, kagandahan, o dangal. Dapat itong nagmumula sa tapat na damdamin at pagmamahalan ng dalawang tao. Ang tunay na pag-ibig ay nagmumula sa pusong tapat at handang magmahal ng buong-buo.
0 notes
SA BILANGGUAN NG PAG-IBIG
WALANG SALA’Y NAPIPIIT!
Isinulat ni Jose Corazon de Jesus
Lumuluhang isinasayapak ng dalagang walang awa: kay A.
Isang tao ang mag-isang lumuluhang walang tigil
sa silong ng sakdal dilim na piitan ng Paggiliw;
Sa labi ay tumatakas ang mga ay! ng damdamin
at sa anyo’y tila mayr’ong nilalagok na hilahil.
Para niyang nakikitang siya’y ayaw nang lapitan
ng dalagang lumalayo sa tawag ng kanyang buhay.
Palibhasa, siya yata’y hinding-hindi nababagay
na umibig sa dalagang mayr’ong matang mapupungay.
Nagdaan ang mga araw. Ang bilanggo’y nagtitiis
sa pagtawag sa pangalan ng diwatang naglulupit
samantalang ang diwata’y patuloy sa di-pag-imik.
Ngunit sino kaya yaong naglulupit na diwata?
Walang salang iya’y ikaw, dalaga kong walang-awa
at ako ang bilanggo mong hanggang ngayo’y lumuluha.
Kaisipan ng tula
Ipinakikita ang lungkot ng isang taong nasa bilangguan ng pag-ibig. Hindi magkasundo ang dalawang puso dahil sa limitasyon ng lipunan. Ang babae, bagamat mahal ang lalaki, ay hindi maaring yakapin ito. Sa kabilang banda, ang lalaki ay hindi maaring makuha ang pagmamahal ng babae. Sa huli, tinanggap ng lalaki ang kanyang kapalaran bilang bilanggo ng pag-ibig, at patuloy pa rin siyang umiibig sa kabila ng lahat. Ang tula ay nagpapakita ng sakit at halaga ng pag-ibig sa kabila ng mga paghihigpit ng lipunan.
Mensahe ng tula
Ang sakit ng pag-ibig na hindi natutupad dahil sa pagkakaiba ng kanilang katayuan sa buhay. Sa kabila nito, ipinapakita ang tapang ng pag-ibig na patuloy na nagbibigay buhay sa puso ng dalawang tao. Ito'y mensahe ng pag-asa at determinasyon, na ang tunay na pag-ibig ay hindi nasusukat ng anumang paghihigpit o hadlang. Sa kahit gaano kahirap na sitwasyon, ang pag-ibig ay patuloy na nagbibigay liwanag at kahulugan sa buhay ng bawat isa.
0 notes
KAMAY NG BIRHEN
Isinulat ni Jose Corazon de Jesus
Mapuputing kamay, malasutla’t lambot,
kung hinahawi mo itong aking buhok,
ang lahat ng aking dalita sa loob
ay nalilimot ko nang lubos na lubos.
At parang bulaklak na nangakabuka
ang iyong daliring talulot ng ganda,
kung nasasalat ko, O butihing sinta,
parang ang bulaklak kahalikan ko na.
Kamay na mabait, may bulak sa lambot,
may puyo sa gitna paglikom sa loob;
magagandang kamay na parang may gamot,
isang daang sugat nabura sa haplos.
Parang mga ibong maputi’t mabait
na nakakatulog sa tapat ng dibdib;
ito’y bumubuka sa isa kong halik
at sa aking pisngi ay napakatamis.
Ang sabi sa k’wento, ang kamay ng birhen
ay napababait ang kahit salarin;
ako ay masama, nang ikaw’y giliwin,
ay nagpakabait nang iyong haplusin.
Kaisipan ng tula
Ipinakikita ang kagandahan at kabaitan ng kamay ng isang babae. Ang tula ay naglalarawan ng kamay bilang instrumento ng pag-asa, pagmamahal, at pag-aayos ng mga sugat sa buhay. Ipinapakita nito ang kapangyarihan ng pagmamahal sa pagpagaling ng puso at kaisipan ng isang tao.
Mensahe ng tula
Naglalahad ng mensahe ng pagmamahal at kalinga sa pamamagitan ng paglalarawan ng kagandahan ng isang babae at ang kapangyarihan ng kanyang mga kamay na magbigay-ginhawa at kasayahan sa ibang tao. Ipinapaabot nito ang halaga ng pag-aalaga at malasakit sa kapwa bilang daan tungo sa kaligayahan at kapanatagan ng puso.
0 notes
AGAW-DILIM
Isinulat ni Jose Corazon de Jesus
Namatay ang araw
sa dakong kanluran,
nang kinabukasa’y
pamuling sumilang,
ngunit ikaw, irog, bakit nang pumanaw
ay bukod-tangi kang di ko na namasdan?
Naluoy sa hardin
ang liryo at hasmin,
Mayo nang dumating
pamuling nagsupling,
ngunit ikaw, sinta, bakit kaya giliw
dalawang Mayo nang nagtago sa akin?
Lumipad ang ibon
sa pugad sa kahoy,
dumating ang hapon
at muling naroon,
ngunit ikaw, buhay, ano’t hangga ngayo’y
di pa nagbabalik at di ko matunton?
Kaisipan ng tula
Nagsasaad ng malalim na lungkot at pangungulila matapos ang pagkawala ng minamahal. Ipinakikita nito ang sakit at pag-aalala ng isang taong iniwan ng minamahal, na nagdudulot ng matinding pangungulila.
Mensahe ng tula
Naglalarawan ng pusong puno ng lungkot, pangungulila, at pag-aalala matapos ang pagkawala ng minamahal. Ipinapakita ng tula ang kawalan ng pag-asa, paghihintay na tila walang hanggan, at ang pangungulila na hindi kayang punan ng anumang bagay o karanasan. Ang tula ay isang pagpapahayag ng damdamin ng pagkawala at paghihintay na karaniwang nararanasan ng mga tao sa buhay.
1 note
·
View note