#الستات

[sarrah]

كان اسمها نجلاء.. ادعولها بالرحمة، هي ومحمد قريبها 😭

[lsd-l]

A very big turn off towards men ..

[yooo-gehn]

ليه بتكره التقاليد قوي كدا ؟

في مرة كنت جاي من سفر في ميكروباص، ونزلت منه على الطريق السريع، ونِزلت معايا عيلة من أب وأم وإخواته البنات وعيالهم، والأب كان باين عليه المرض والإعياء، وجينا نعدي الشارع وسط العربيات. وتعدية الشارع على طريق سريع شبه "نيو" في فيلم الماتريكس وهو بيتفادى الرصاص اللي مضروب عليه من كل ناحية. لازم تحسبها كويس وتمشي كل خطوة بحذر. اللي حصل إن الستات سبقونا أنا والأب، كان حظهم حلو وكان واضح أنهم متعودين وعارفين بيعملوا إيه. لكن الأب كان مريض وأنا كنت مهموم، فأنا كنت متردد ومسهِّم، وهو كان خطوته تقيلة ومخه مش فيه.

فيه لحظة كده الأغراب بيعتمدوا على بعض فيها، ويتصرفوا وكأنهم أهل، عادةً بتبقى لحظة بيتشاركوا فيها مهمة تقيلة، فبناخد بإيد بعض، وفي اللحظة دي الراجل اعتبرني ابنه، وكان مستنيني أعدي عشان يعدي معايا، لكن العربيات كانت كتير، وكلها صواريخ بتعدي، فأنا كل شوية أقدم رجل وأرجّع التانية، والراجل يعمل زيي. وفي مرة وأنا على وشك أعدي، بصيت للراجل، لقيته باصص للستات على الناحية التانية اللي بيستعجلوه، وشوفت على وشه أنه مستعيب أنهم سبقوه وهو اللي مأخرهم. فأنا في آخر لحظة قررت أني أرجع لورا، وهو كان قرر إن كرامته الذكورية لا تحتمل التأخير ثانية زيادة، وحرفيا طلع يجري وخبطته عربية نص نقل طيرته، مشهد من فيلم لكن بيحصل قدام عيني.

الراجل طب ساكت. غالبًا مات. جثة نايمة على ضهرها وعند راسها بركة دم. واللي قتله فكرة. المنطق بيقول أنه راجل كبير ومريض ومن حقه ياخد وقته. لكن التقاليد بتاعته بتقول أنه هو الراجل وماينفعش يبقى في ديل ستاته.

في مرة تانية، في قصة شخصية أكتر، أمي اتشخصت بسرطان المرارة، وعانت أيام قاسية جدًا في أواخر حياتها، وفي يوم كنا راجعين البيت من جلسة كيماوي أنا وهي وأبويا. وللأسف ماكنش فيه أسانسير، واضطرت تطلع 3 أدوار، وفي كل سلمة تطلعها تصرخ من الألم، ألم أنا لحد دلوقتي مش فاهم ومش عايز أفهم سببه. وأنا مش مسامح التقاليد اللي خلت الأولوية عند أبويا أنه ينهرها ويزعقلها في كل مرة أنها توطي صوتها، مش أنه يحاول يخفف عنها ويطيب خاطرها، أو حتى يسكت. التقاليد ماعندهاش نقاش. ماعندهاش تسامح. ماعندهاش قلب.

أنا بكره التقاليد لأنها بتقنع الناس إن مفيش ست محترمة تصرخ في مكان عام حتى لو كان عندها سرطان. وإن مفيش راجل يرضى على نفسه إن ستاته تسبقه. حتى لو الست بتموت من الألم، وحتى لو الراجل مريض وعادي أنه يفكر في ألف طريقة منطقية تانية يعدي بيها الشارع.

أنا بكره التقاليد لأنها بقايا تقديس أسلافنا، والعذر الأمثل لأننا نمشي ورا التيار عمياني وإحنا قافلين دماغنا، وبتخلينا نقبل فكرة إن ناس عاشت في زمن غير زمنا، ودنيا غير دنيتنا، أكيد عارفين مصلحتنا أكتر مننا.

[rooh-elhaya]

من احلي الحاجات اللي اتعلمتها من مامتي اني ماليش دعوه بحد

عمري ما شوفت مامي متصاحبة ع واحدة وكل شوية تروح تزورها او بتروح بيت حد الا للضروره القصوي مناسبة او حاجه مهمه .. او تتكلم في التليفون بالساعات في تفاصيل متخصناش زي معظم الستات

ملناش دعوه مين اتجوز ومين اتطلق ومين اشتري ايه ومين عمل ايه في حياته

كبرت وبقيت مبركزش اصلا في اي حاجه تخص اي حد ولا عندي فضول حتي لأي سؤال ، وعمري ما اسأل حد علي حاجه هو مش عاوز يقولها حتي لو عارفها عنه بالصدفه وليه اكسفه و اقوله اني عارفه

راحة البال اللي بحسها اما بشوف ناس بتلف حوالين نفسها بسبب فضولها او عدم الرضا بنصيبها ومقارنتها بغيرها دايما بتخليني اعرف اني في نعمه كبيرة الحمدلله وان بختي وحظى ان امى ربتنى ع كده

رحمة الله عليكي يا إمي 💔

[shorook]

التعامل مع الستات في أي شغل ما هو إلا تكفير ذنوب

[colored-entropy]

عايز أعترف اعتراف بس مكسوف سيكا، والفراجيل ماسكولانتي ناقحة عليا حبتين.

الأسبوع ده قررت اخلي مواعيد تمريني الصبح بدل المغرب، أهو الواحد يظبط نومه ويلحق اليوم من اوله وييجي عليه آخر اليوم ينام، بعد ما كنت بتمرن الساعة خمسة وارجع سبعة اخد دوش واكل لقمة وأحس بطاقة تخليني انزل أجري ع الكورنيش واحدة بالليل.

المهم ان مواعيد الصبح لاحقة مباشرة على كلاس الفليكسابيلتي بتاع البنات، والكابتن اللي هتمرن معاه النهاردة هشوفه لأول مرة ففضلت قاعد مستنيه برا المكان حوالي ساعة، كابتن البنات كل شوية تيجي تبص عليا وتقولي انهم هيطولوا شوية والكابتن بتاعي هيتأخر حبة، وتقولي طب ادخل جوا وانا أقولها لا خليني في الطراوة هنا وانتو خدوا راحتكم. مكنتش أعرف ان كلاس فتيات القوة ده بيطول كده.

المهم اني غالبا صِعبت على كابتن فاطمة لما لقتني قاعد برا أكتر من ساعة، بصراحة الجو كان حلو والبحر بيبعت هوا بارد لذيذ، فقلتلها انا حبة وهمشي عشان عندي شغل، قالتلي لا انت كده كده جيت فتعالى وأنا هديك تمرينة، ضحكت، وبصيت لها باستغراب فاكرها بتهزر، وفي قلبي ذكر تقليدي على وشك يقولها جرى ايه يا ولية؟ احنا هنهزر؟ أنا نسوي اه وانت على راسي من فوق بس نحترم فرق الجينات والهرمونات بردو، بس مسكت نفسي ومقولتش حاجة لما لقيتها بتتكلم جد، فقررت أحط الماسكولانتي حجتي في التلاجة مؤقتا لما نشوف الكلام على ايه، ودخلت غيرت هدومي وطلعت شرحت لها الموقف.

انا اتمرنت شهر ثم تمرقعت وانشغلت شهرين ثم رجعت الأسبوع اللي فات، ولحد النهاردة مخدتش تمرينة رجل، وأنا بحب تمرينة الرجل يا كابتن. هي سمعت الكلمة من هنا ووشها نوّر، وعنيها اتسعت، وقالتلي تمام، هات موبايلك أكتبلك التمرينة على ما تسخّن.

روحت أسخن ورجعت لقيتها حاطلالي super sets upper body، ده صباح الخير كده، يا فندم أنا متمرنتش سوبر سيتس قبل كده، يهديك يرضيك، قالتلي طب بس كمل تسخين، حاضر، روحت ورجعت لقيتها حاطالي سوبر سيتس بأوزان عشرين كيلو لتمرينة الرجل! جرى ايه يا ولية بجد؟ بقولك بقالي شهرين متمرتنش رجل! عاوزاني ألعب 20 سكوات بوزن 20 كيلو في اربع مجموعات؟ احنا هنهرج؟ قالتلي خلاص هشيل الأوزان ونظبط الفورم الأول وبعد كده نزود أوزان. أمين؟ أمين يا كابتن.

وعينك ما تشوف إلا النور، ها أنذا كواحد بيحب تمرينة الرجل فعلا، لقيت نفسي مش قادر، وشكلي عامل زي الفرخة المبلولة، الحمد لله مكانش فيه ناس كتير في المكان، صحيح قدرت أنفذ التمرين كله، بس مجادرش يا زميلي، انتصرت عليا المرأة، صحيح هي المرأة انتصرت عليا كتير قبل كده، بس أول مرة اتهزم خارج ميدان الأمور العاطفية.

ربنا يسامحك يا كابتن فاطمة، هو بس لو مكانتش عنيك حلوة وضحكتك سكر، مكنتش هسمحلك تعملي فيا كل ده. بس الحق يقال والله، الروح الأمومية اللي في الستات دي غريبة وجميلة ومهمة، فاطمة هي اول حد يهتم بيا هذا الاهتمام المخجل، كل شوية تيجي تقولي الحركة بتتعمل كده مش كده، وتشرحلي كل تمرينة بتستهدف أنهي عضلة، وتعدل عليا التكنيك، وانا أقولها اني عارف التكنيك فعلا بس مجادرش والله يا كابتن، أنا عارف اني بنصب ومبشغلش العضلة كاملة بس مش جهلا مني ولكن فراغ طاقة. الظاهر ان الفليكسابيلتي بتاعتكم دي مهمة فعلا، حقك عليا يا فاطمة، حقكم عليا يا كلاس فتيات القوة، مش هتريأ عليكم تاني والله، انتو ناس كمّل، أنا اللي عجوز.

مش عارف هوري وشي للشباب تاني ازاي؟ أنا مرنتني واحدة ست يا رجالة. صحيح هي ممكن تمسك نص أصحابي تعجنهم، بس بردو. أوديك فين يا ذكورة هشة بعد التهزيق اللي حصل فيك ده؟ خليك في التلاجة شوية بقى. محتاج أستخبى تلات شهور وأرجع أواجه العالم تاني.

في النهاية وانا ماشي قلتلها شكرا يا فاطمة، ان شاء الله مش هوريك وشي تاني، وهجيبلك أصحابي البنات تكسريهم براحتك، فتضحك ضحكة لذيذة فشخ، وتقولي بس والله فورمة جسمك حلوة فعلا، ومستواك كويس جدا، فتطيب خاطري، عسل والله. المجد للستات فوق الأرض وتحت الأرض وجوا الجيم.

أقدم لكم أعنف تمرينة رجل اتمرنت��ا حتى الآن، برعاية كابتن بطة

[free0spirit]

ربنا يكفيك شر الست الرايقة والست المتضايقة والست اللى سايقة😏بص يابنى ربنا يكفيك شر الستات كلهم

[zahraa17]

شخص ما في زمان ما قدر يقنع الناس إن علشان الست تكون كويسة، وعلشان تستحق الإشادة ووسام الإجادة في القيام بدورها كزوجة/كأم لازم تكون بتعاني، لازم تكون شقيانة وتعبانة، وأي محاولة لكسر دايرة المعاناة دي من الست تعتبر تمرد وخروج عن المألوف، وهي من نفسها بتبقى حاسة إنها أجرمت لو مر عليها وقت وهي مرتاحة .. لازم تكون عايشة مجموعة مآسي مركبة كدا علشان مأساة واحدة لا تكفي .. وفي أي لحظة لو أتيحت للست فرصة ترتاح بأي شكل، سواء عن طريق أجهزة للبيت، أو عن طريق حد يساعدها، أو عن طريق إنها تاخد إجازة ولو حتى لدقايق من وظيفتها كزوجة وأم، لازم في الحالة دي الست تظهر حسن نيتها وترفض الراحة طبعًا، علشان تثبت لنا إنها ست كويسة وأم شاطرة، وعلشان تبقى من جواها راضية عن نفسها وحاسة إنها بتؤدي واجباتها تجاه أسرتها بشكل سليم، ما هي إزاي يعني هتؤدي واجباتها من غير ما تعاني؟!

وبعد ما الشخص دا بقى مشي، جه شخص تاني أقنع الناس إن أي شكوى من الست اللي بتعاني دي هي مجرد دلع "مِرِق" ما كل الستات بتعاني وساكتة إشمعنى أنت؟ وطبعًا طبعًا أي ردو�� فعل سلبية هي من تأثير النكد الـ built-in اللي بتتولد بيه الستات ولا تمت للواقع بأي صلة.

-لقائلها

[sarrah]

[quiet-lady-nana]

‏الستات مابتنساش … إنما بتأرشف 😜

[smallbutkindcouch]

��وقات كتير ينزعج من هشاشتي، وأوقات بنزعج من نفسي لما أقرر أتكلم عنها بصوت عالي، لإني بكره نظرات الشفقة وشايفة إن اعترافي بالهشاشة أمر لا يستدعي الشفقة لإني حقيقي مؤمنة إن القوة مش إنك متنكسرش، القوة في إعادة تشكيل حياتك بعد ما تتفرفت.. القوة في إصلاح الأشياء المكسورة، والإيمان بالقدرة على دا.. قوة الستات مش الاستقلال المادي ولا المنصب ولا الفلوس.. قوة الستات هي قدرتهم على إعادة تشكيل الحياة كل يوم آلاف المرات بمنتهى السهولة والسلاسة .. دي قدرة لا يملكها أقوى راجل في العالم، لكن تملكها أضعف ست في العالم

[yooo-gehn]

سؤال لأصحاب العقول المتأملة:

الهند كان فيها عرف سائد بيخلي أي زوجة تولع في نفسها لو جوزها مات. العرف كان شديد القوة لدرجة فرض نفسه على الستات حتى لو ماكانوش عايزين يموتوا محروقين. وأثناء الاحتلال البريطاني للهند أحد الضباط الإنجليز منع واحدة ست من أنها تولع في نفسها بعد ما جوزها مات، وسؤالي هل أنت موافق على قرار الظابط ولا لأ؟

السؤال مفيش فيه أي فخ، ولا فيه إسقاط على الاحتلال الإسرائيلي اللي أنا بدينه تمامًا، ولا أنا برحب بأي احتلال أجنبي لأي بلد على أساس أنهم "هاينضفونا"، السؤال بالنسبة لي معضلة أخلاقية ببساطة: هل لو كان الموضوع في إيدك، هاتسمح بممارسة عرف أنت عارف في قرارة نفسك أنه مؤذي لصاحبه وفاسد أخلاقيا؟ ولا هاتقول أنا هاحترم عرف الناس دي مهما كان؟

وخد بالك، أي تصرف بنسمح بوجوده، بيأسس لنظام بيكون التصرف ده جزء منه. ولو كان التصرف فاسد ده بينتج عنه نظام فاسد. وفي المقابل، منع الناس بالقوة من ممارسة عرف هما مؤمنين بيه بشكل جماعي، هو نوع من الفاشية.

هاتعمل إيه لو كنت مكان الظابط؟

تحديث: حكاية الظابط الإنجليزي كانت عشان أخلي السؤال ليه ملابسات في الواقع، لكن الموقف نفسه مش مقيد بأنك لازم تتخيل نفسك ظابط في جيش احتلال. بالبلدي يعني، تخيل نفسك في منصب أو عندك سلطة تخول لك أنك تمنع ممارسة عرف فاسد، هل هاتمنعه ولا لأ؟ وليه؟

[rooh-elhaya]

ربنا يكفيك شر الست الرايقة .. والست المضايقة .. والست اللى سايقة

بص يابنى ربنا يكفيك شر الستات كلهم😂

وصباح الخير 🌹

[shorook]

اكذوبة إن الستات نكدية دي محتاجة تتمحي من على وش الأرض

[danceandrant]

فيه مشكلة بتواجهني دايما مع جوزي و معرفش ديه بتواجه كل الستات في تعاملهم مع الرجالة ولا معايا أنا بس. هي إني بفضفض معاك، بفكر بصوت عالي، بتأمل و بشتكي بصوت عالي مش اكتر مش عايزاك تحل حاجة اسمع و بس بجد والله مش عايزة حل.. كل مرة احكيله حاجة يقولي طب انا اعمل ايه أو يقعد يفكر و يدور على حلول، يا عم والله ما عايزة حل، الحل عندي، عيزاك تسمعني و بس و متردش. ساعات ببقى عايزة اكلمه و افكس عشان هيقعد يفكر في ردود منطقية و حلول عملية في حين إني بس عايزة ابعبع😭

[jaunerevee]

دخلت النهاردة خناقة (هل الستات اللي بيكونوا معاهم عيال في المترو في مصر ومقعدين عيالهم والناس واقفة ده صح ولا غلط)

وحقيقي عاوزة اقول حاجة .. اولا كسم اي حد كبير فاكر ان الطفل الصغير مالوش حقوق .. ثانيًا كسم اي حد كبير فاكر ان المواصلات العامة والطيارات دي ممتلكات خاصة فا هو عايز يقضي رحلته سالم غانم ويكتم صوت اي عيل صغير معاه على نفس الرحلة وانه لو راكب هو وعيل صغير يبقى العيل الصغير يقف وهو يقعد

الناس اتجننت بجد وبقت حاطة دماغها بدماغ العيال الصغيرة .. كسم اللاانجابية اللي خدت الناس للاكستريم اللي هو انا مش مش عايز اخلف بس لا ده انا بعادي العيال الصغيرة كمان

اول ما خلفت ابني كنت حريصة وماشية احسس على مشاعر كل الناس اللي حواليا في الاماكن العامة وطول الوقت بعتذر عن تصرفات ابني (الرضيع الغير مكتمل النمو) لحد ما في مرحلة معينة ادركت انه جس وات دي اسمها اماكن عامة وطالما ابني ماراحش ضرب حد على تيزه يبقى مش من حق حد يكتمه ولا يفتح بقه معاه ولا يبص له بصة حتى .. وبالرغم اني طبيعتي شخص مسالم وبحب اسيب انطباع كويس وبلتزم عادة اني اكون الطرف المحترم في الحاجات اللي بتضايق كل الناس دي الا اني مؤخرًا لو حد بص لابني بصة ماعجبتنيش بردهاله ولو حد كلم ابني كلمة بهزار عن شقاوته او دوشته بردها بحدة ونفسي الناس بجد بدل ما تتخانق عشان عيل صغير اخد مكانهم في المترو يروحوا يتشطروا على اللي راكبهم بجد ومخليهم يدفعوا مرتبهم في خدمات متهالكة في المترو وفي المواصلات العامة وفي الشارع وماحدش عارف يقوله تلت التلاتة كام حتى.