#بحس إني طفلة ودماغي دماغ عيال صغيرة والله بس غصب عني مش بقدر أتحكم في ده

[lsd-l]

بعاني من مشكلة جامدة وهي إني دايماً بحتاج اللي معايا يطمني دايماً بإنه موجود، إذا كان أصدقاء أو إخوات أو قريب أو حبيب، أي حد يصنف بإنه قريب مني وبيحبني، ببقى محتاجة منهم دايماً بشكل مستمر -بس مش اللي هو كل يوم، كل فترة- أتطمن ب"متقلقيش أنا جنبك ومش هسيبك مهما حصل"، لأني في العادي لو كنت قريبة من حد في فترة أوي وده بيحصل قليل لأني مش بعرف أقرب لأي حد بسهولة.. وفجأة الظروف إضطريتنا ننشغل عن بعض شوية، ببدأ أسكت وأبعد وأنعزل تاني وأحس إني رجعت للوحدة وإن محدش هيقدر يكمل معايا للآخر، وببدأ ألوم نفسي على كل حاجة وأحس العيب فيا وإن أكيد أنا محدش يستحملني، لحد ما الشخص ييجي يطبطب عليا وياخدني في حضنه ويقوللي ماتقلقيش الأيام بتبعدنا بس أنا زي ما أنا وهفضل جنبك. فا تهدى الوساوس وأحس إني متطمنة بالقرب ده وإني كنت مكبرة الموضوع كالعادة، ويعدي كام أسبوع وأرجع تاني في نفس الدوامة .