#عارفه ان الكلام ملخبط بس كان لازم اتكلم عنها

[3-zooooooz]

مرحب ..

كان يوم زحمة قوي مع الصحيان اللي كان ٦ ونص ! هنتلاشى كل حاجت حصلت ونتكلم عن المسدج اللي كانت من خلود بتقولي فيها انها ادت رقمي لواحده طلبته هي تعرفها وانا المفروض اني اعرفها بس انا مش فاكرها وسكتنا بعدها لقيت البنت اللي خلود ادتها رقمي قالتلي ان في بنوته كانت بتدور على رقمي وهي ادتهولها والبنوته دي انا عارفاها بس معرفتي بيها سطحيه جدًاااا ، بعدها بشويه لقيت مسدجات في الريكويست على الماسنجر للبنوته دي بتقولي فيها ان في واحده اسمها نجاة كانت صحبتك في المعهد الابتدائي بتدور وتسأل عليكي ونفسها تشوفك او تسمع صوتك وبقالها فتره كبيره جدًا وربنا سخرني اني اوصلك بيها ( نجاة حكتلي بعد كدا انها برضو متعرفش البنت دي وكانوا في جروب مع بعض لواحده من المنصوره اصلا ودخلوا لبعض برايفت وشكل الكلام جاب بعضه ) هي كانت بتفكرني ان مش انتي ابوكي الاستاذ اسماعيل ؟ مدرس في المعهد الازهري ! هي تعرفك .. انتي مش فاكراها ؟ وانا كنت هتجنن مش فاكره اي حد بالاسم دا والله .. طلبت منها انها تديها رقمي او الفيس بتاعي ! وانه يا ريت تكلمني _ وفي بالي اكيد اول ما تكلمني انا هفتكرها _ غابت شويه البنوته بتاعه الماسنجر وقالتلي انها خدت رقمي من البت اللي خلود ادتها رقمي وأن نجاه هتتواصل معايا ، انا فضلت متوتره جدا من الاحراج لو مفتكرتهاش وخايفه مش عارفه ليه ! لدرجه اني فكرت اني اقفل التلفون بس ابويا قالي ليه دا كله ..ردي عليها لما ترن عليكي عادي ولو مفتكرتهاش مش مشكله وضحيلها ان الدنيا تلاهي وان دماغك مش دفتر ، على بعد العصر لقيت مسدج من رقم غريب على الوتساب فيها السلام عليكم ولسه هرد راحت رانه ، انا فضلت شويه والتلفون في أيدي بفكر ارد او مردش بس قررت في الاخر اني أرد ، مش قادره اوصف مدي الشوق والوحشه اللي حسيته في صوتها وفرحتها بإنها لقيتني ، افتكرت معاها زمايلانا اللي كانوا في الفصل .. وكانت بتقولي فاكراهم؟ معرفش عنهم حاجه حكتلي انها مش بتتواصل غير مع زميله لينا بس انا فاكراها جدا وقالتلي انها عايزه رقمي برضو قولتلها ادهولها طبعا ، كانت بتسألني على حالي وفي وسط ما انا بحكي ومندمجه مثلا ! الاقيها بتقولي لسه فيكي الغمازتين الحلوين ؟ / يا لهوي يا عزه صوتك وحشني قوي ، اكني متغيرتش بعد ال ٩ سنين دول .. الاستاذ اسماعيل كويس ..؟ من أحسن المدرسين اللي درسولي في حياتي سلميلي عليه والنبي .. وفضلنا على الحال دا لحد ما رصيدها خلص اتكلمنا بعد كدا كلمتين على الواتساب وصتني فيهم اني افضل على اتصال بيها واني مبعدش وبعدها قفلنا و اتشغلت ، من شويه لقيتها باعته المسدجات دي .. حاجه جميله انك تلاقي صاحب فاكرك بعد ٩ سنين لا وكمان بيدور عليك ومشتاقلك لدرجه انه حكتلي ان بقالي سنتين او تلاته كل ماوتنزل البلد وتقابل حد شبهي كانت توقفه وتسلم عليه وتسأله لو كان يقربلي او لأ ، ربنا يحفظها ويرزقها الذريه الصالحه ذي ما بتتمنى يا رب ❤️