tukent

[tukent]

tulo ka takna sa pagpanghupaw

atol nga udtong tutok, ala 1:37 sa hapon

dose mil kwatro siyentos ang hinungdan sa pagpanampiling ni Jelo. Daw sama sa usa ka langaw ang iyang salapi; paspas ang lupad ug lisod dakpon.

sa unang higayon sa iyang kinabuhi misuway kini’g online casino.

ang online casino usa ka duwa sa cellphone, sukdanan daw kinia sa pagkagastador.

may panultihon ang mga katigulangan, nga timaan ang pagpangatol sa palad sa usa ka taw kon anaa’y kwartang umaabot.

tuod wala man mangatol ang mga kamot ni Jelo, anaa lang daw ni mga kubal.

ang pagpusta sa online casino usa ka hunghong sa mitaliwan niya nga uyuan. Hadlok, pero mas milabaw ang iyahang pagtuo nga ang tambag sa patay mao ang tubag sa iyang mga pag-antos.

tuod dili himi ang batan-on, pero giyama-yamaan kini sa duha ka inutil.

ang aso gikan sa nagdaob ug ang abog nga gikan sa Tylr, brand sa usa ka stand fan. Pareho nga sungugan sa iyang kapildihan, inutil gayod.

—

atol nga kadlawon, diha sa pagpamuwaw. alas 2:08 sa sayong buntag

paspas ang iyang mga tudlo sa pagtulpok, galumbaanay sila sa kada pitik sa iyahang dughan, daw marathon.

dihang gipatilaw og traynta mil singko gikan sa casino, si Jelo wala matagbaw. Miusab pa gayod sa pagpusta sa kadaghan.

tulpok na sab sa cellphone…

hinutuktok sa makadiyot…

galibog asa motutok, diha ba sa kwarta sa hangin o sa kauban niya nga iyaan nga mihigda usa kadiyot sa iyang katre.

ang maong pag casino, hunghong o tambag gikan sa uyuan nga asawa sa iyang iyaan nga si Rita, may breast cancer.

paagi ba kini sa kalag sa iyang uyuan, nga yamyaman siya’g pusta para sa ikadungag nga tambal para sa iyaan nga sayo niyang gibiyaan?

sa iyang hunahuna, husto na!

igo na ang traynta mil, apan ang singko nga sinsiyo, para kaniya anogon.

ang singko, pwede pang molubo ug mahimong ipalit niya’g sapatos, i-ilis sa iyang bag nga bisan unsang orasa pwedeng mapaknot, pwede sad pangkuot sa iyang umaabot nga pakighimamat sa iyang uyab lang sa cellphone.

por Dios, por Santo!

unsaon sa singko pagpakaon sa iyahang uyab nga bisan gani mangga sa kilid, mamili pa adtong hamis ang nawong nga tig-singkwentahon. Kadtong may kaubang uyap nga halang.

nibalik og tutok si Jelo sa cellphone ug sa way pagduha-duha, na-anugnan kini sa singko. Maong si Jelo, mipadayon sa gibati…

gipusta og hurot ang traynta mil singko.

—

atol nga mingaw bisan og alingisig ang palibot, alas 6:22 sa gabii

kilom-kilom ug si Jelo andam na nga dawaton ang kamatuoran nga ang kwarta ug langaw usa ra.

diha sa iyahang paghinuktok agi sa kapildihan, mibalik og bisita ang iyahang hunahuna diha sa katapusang adlaw sa haya sa iyang uyuan, espesyal kaniya ni nga adlaw.

gawas sa suod siya sa uyuan niyang si Randolph, nahimong memorable pod ang maong adlaw nga Dec 19 kang Jelo, tungod kay sa unang higayon namatikdan niya ang mga dagway sa mga igsuon niini ug sa uban niyang mga kaparyentehan.

unang nakat-on si Jelo og sugal tungod sa duwa sa haya, nga mao ang tongits. Bata pa nasayod na kini sa sistema sa duwa; ang mapildi ug modaog.

sa wala pa niya papahuwaya ang cellphone, mitan-aw usa kini sa litrato niya ug sa uyuan kadtong anaa pa sila sa tabay, nanimba.

ug didto, diha sa iyahang lawom nga pagpanghupaw, iyang nahinuklogan nga

lisod man dawaton ang mawad-an og dakong kantidad, apan mas walay ikakumpara sa kalisdanan kung mawad-an og suod nga higala.