abmterabyte-blog

[abmterabyte-blog]

Umasa

Isang salita ngunit napakalalim ng kahulugan

Isang salita na madaming tao ang nakakaramdam  

Isang salita na pinagkakaguluhan

Isang salita na palaging napaguusapan

 Umasa ako na mamahalin mo pa rin ako

Umasa ako na ako ang pipiliin mo

Umasa ako na ang tingin mo sa akin ay puwede pang magbago

Umasa ako sayo ngunit sa limot ako'y binaon mo

 Ngayon, ako ay umaasa pa rin dahil alam ko na sa salitang umasa ay mayroong pag-asa

Pag-asa na masasalba pa ang relasyon na kaysaya

Pag-asa na babalik ka kahit sa tingin ko ay malabo na

Hindi ko alam kung anong meron sayo at bakit patuloy ko itong ginagawa

 At sa hinaba haba ng aking pakikipaglaban

Sa tingin ko ako ay pagod na

Dahil ako ay nasaktan, nasasaktan na ng sobra

Pero maniwala ka sa hindi, ako’y patuloy pa ring umaasa

 Ngunit hindi ko alam kung hanggang kailan ko ito magagawa

Dahil sa bawat pagsambit ko ng laban pa,

Ang iyong sagot ay tama na

Sa bawat pagbigkas ko ng mahal pa kita

Ang iyong sagot ay ayaw mo na

 Pero sa huling pagkakataon gusto kong ipaalam sayo na umaasa pa rin ako

Dahil ang mundo ko ay patuloy pa ring umiikot sayo

Umaasa at humihiling sa mga tala na ikaw ay maging parte ulit ng buhay ko

At hanggang sa dulo ako ay umaasa na ikaw pa rin at ako

-Kim Reyes

[abmterabyte-blog]

Sa ilalim ng maliwanag na buwan

Sa Ilalim ng maliwanag na buwan na puno ng ala-ala

Ikaw ang aking nakikita

Mga matatamis na sandaling nasa aking isipan

Hindi ko alam kung mababalikan ko pa ba

Sa Ilalim ng maliwanag na buwan

Tayong dalawa ang aking nakikita

Mga kamay na noo'y magkahawak pa

Ngayo'y unti-unti nang nabubura

Sa Ilalim ng maliwanag na buwan

Mga gabing tayo ay magkasama pa

Hinahanap ko ang iyong presensya

Ngunit naalala kong lumalayo ka na nga pala

Sa Ilalim ng maliwanag na buwan

Mga kwentuhan natin ang aking naaalala

Mga ngiting abot langit

Ngayon, tila wala na ang saya

Sa Ilalim ng maliwanag na buwan

Ako nga ay lumuluha na

Mga ngiti ay napawi na

Dahil sa aking tabi'y wala ka na

At sa Ilalim ng maliwanag na buwan

Ikaw ang naging inspirasyon ko

Naisulat ko ang tulang ito

At ito ang tulang natapos ko

-Adrian Faminiano

[abmterabyte-blog]

Dulo

ang sabi sa kanta ikaw daw ang pagibig na hinintay

na ang puso daw ay matanggal na nalumbay

ikaw daw ang pagibig ng binigay

pagibig na binigay ng Maykapal sa kanyang buhay

 maraming natatamaan sa kantang iyan

maraming naiiyak maririnig pa lamang ang himig ng kanta

patunay raw kasi na may taong magmamahal sayo hanggang dulo

na kahit anong pagsubok man dumating sainyo nakakapit parin kayo

may ilan namang nagsasabi na "hindi totoo yan"

"wag kayong maniwala, magbbreak din yan"

"walang kayang forever"

 hindi ko lubos maisip na bakit may mga taong hindi nalang makuntento

kung bakit may mga taong pilit hinuhusgahan agad ang magiging takbo ng kwento

Maaaring dahil nasaktan na sila at natakot nang muling magmahal

kung bakit ba naman kasi hindi nalang sila muling sumugal

kung bakit ba naman kasi paulit ulit binabalikan ang nakaraan

eh sila lang din naman ang paulit ulit na nasasaktan?

 siguro nga mahirap gawin ang isang bagay na walang kasiguraduhan

baka nga imposibleng magawa ito ng taong hindi alam kung ang pinaglalaban ay may mapupuntahan

Ngunit dapat pakatandaan

Na kahit anong sigalot ang maransan

Sa dulo may isang taong itindahana sayo

At masasabi mo nang “Ikaw at ako” hanggang dulo

-Pau Daz

[abmterabyte-blog]

Maraming Tanong... Walang sagot...

Maraming tanong ang gumugulo sa isip ko

tanong na hindi ko alam kung paano sasagutin ang mga ito

pero isa lang ang alam ko

yung taong may alam ng sagot iniwan na ako

 nakakagulat dahil bigla ka nalang nawala na parang bula

at makikita nalang kitang may kasamang iba

ang sakit tanggapin na ang dali para sayo na sabihing tapos na

eh kaya naman pala nakahanap kana ng bagong makakasama

 hindi ko alam kung ako ba ang may kasalanan at ako ang dapit sisihin

hindi ko alam kung ako nga ba ang nagkulang sa relasyon natin

hindi ko alam kung bakit mas pinili mong humanap ng ibang mamahalin

hindi ko maintindihan kung bakit ginawa ko na ang lahat pero para sayo kulang parin

 kung titingnan ang dami kong hindi nalalaman

eh ikaw na nga kasi ang sentro ng mundong aking ginagalawan

pasensya na ha sobra kasi kitang pinagkatiwalaan

malay ko ba namang sa isang iglap bigla mo nalang akong iiwan

ay teka hindi mo nga pala ako iniwan

umalis ka na nga lang pala ng walang paalam

 nagtataka ako na sa haba ng ating pagsasama hindi ko napansin ang mga pagbabago mo

ah alam ko na baka sadyang naging kampanti lang ako

naging kampanti na nagiisa lang ako sa puso mo

pero ano ba naman yan nagkamali nanaman ako

dahil bago mo nga pala ako iwanang lumuluha

ayy mali pala bago ka pala umalis ng walang paalam habang ako'y lumuluha

nagpapakita kana nga pala ng mga palatandaan na aalis kana

 bakit hindi ko napansin ang paglamig ng iyong mga yakap?

bakit hindi ko naramdaman na may kulang na sa iyong mga halik?

bakit hindi ko naisip agad na isa na lamang pala iyong pagpapanggap?

bakit ba pinagpipilitin kong ika'y muling babalik?

anong nangyari sa mga iniwan mong pangako?

bakit parang naiwan nalang itong nakapako? Po

anong nangyari sa sinabi mong "tayo hanggang dulo?"

bakit sa nakikita ko umabot na tayo sa dulo?

 ang dulong hudyat na tapos na ang ating pagsasama

pagsasamang noong una'y punong puno ng saya

pagsasamang hindi nakakasawa kahit ulit ulitin pa

bakit? bakit? bakit ngayon tinapos mo na?

sabihin mo nga kung bakit ang dali sayong sabihing wala na!

bakit ba para sayo ang matagal na pagsasama na puno ng saya

madali lang tapusin gamit ang mga salita

salitang hindi ko alam kung bakit sobrang sakit nung natamaan ako

salitang noong una'y ayaw tanggapin ng utak ko

alam mo may mas mahirap pa palang tanggapin

hindi ko nga lang alam kung paano ko sasabihin

pero para sayo pipilitin ko

 mahirap tanggapin na ika'y wala na,

pero mas mahirap tanggapin na may iba kana

mahirap tanggapin na tapos na,

pero mas mahirap tanggapin na noon palang pala parang tinatapos mo na

mahirap tanggapin na hindi na ako ang sentro ng buhay mo,

pero mas mahirap tanggapin na hindi pala ako naging sentro ng iyo

mahirap tanggapin na sobra akong naaapektuhan,

pero mas mahirap tanggapin na nakikita kitang parang hindi nasasaktan

mahirap tanggapin na napagod nalang akong umiyak ng dahil sayo,

pero mas mahirap tanggapin na wala man lang luhang lumabas sa mata mo

 siguro nga ako lang ang nasasaktan

baka nga ako lang ang nahihirapan

hindi na dapat ako magtaka na ganung kadaling palitan ako

sino ba naman ako? ako lang naman nagmamahal sayo

 teka bakit nagtatanong nanaman ako

hay nako!!

maraming tanong nanaman ang nasa isip ko

eh wala na ngang sasagot nito

 maraming tanong nanaman...

pero wala nang sasagot...

 maraming tanong...

pero walang sagot...

 sa sobrang daming tanong, wala nang sagot

dapat nga siguro ibaon ko na sa limot

-Pau Daz

[abmterabyte-blog]

Distansya

Mahal, anong nangyari? Ano na nga ba ang nangyari sa pagkakaibigan natin?

Ano na ang nangyari sa pinangakong pagkakaibigan na pangmatagalan?

Napalayo ka na simula ng sayo’y may umangkin.

At wala rin naman akong karapatan para humiling ng pagsasama na walang hangganan.

 ‘Pag ako nama’y nalulungkot, kinukuha ko ang sulat na binigay mo sa akin nung tayo ay magkita.

Binabasa ko ito sa tuwing hinahanap-hanap ko ang mainit mong yapos.

Yakap-yakap ko ang sulat mo sa tuwing nalulungkot ako, dahil ito nalang ang tanging alaala na natira.

Dahil nung sandali na ika’y lumisan, parang may sibat na sa puso ko ay tumagos.

 Alala ko pa nung malapit pa tayo sa isa’t isa, halos hindi tayo maubusan ng istoryang sasabihin,

Pero ngayon swerte na ako kung ako’y iyong mapansin.

Naaalala ko pa nung ika’y tumatangis, ‘di ko kayang makita ka na lumuluha,

Dahil parang nararamdaman ko rin ang sakit na iyong pinapasan.

 Ang sabi mo sakin nung isang gabi ay ‘pag kakausapin kita, bumulong lang ako sa aking isipan,

Kaya ginawa ko ‘to gabi-gabi, kinakausap kita sa pag-asa na ika’y nakikinig.

Naaalala ko pa ang kislap sa’yong mga mata nung kamay mo ay aking tangan.

Nakabisado ko na nga ang bawat detalye sa’yong mukha sa aking kakatitig.

 Ngunit hindi ko alam na ‘yon na pala ang huling beses na ngingiti ka dahil sakin.

Hindi ko alam na pumili ka na ng iyong nais makasama sa paglalakbay sa buhay,

Wala rin naman akong karapatan na ika’y pigilan.

Kaya ang tanging hiling ko ay iyong sagutin ang tanong ko; Mahal, anong nangyari sa atin?

- Simon Barrameda

[abmterabyte-blog]

Paalam

Eto na, andito na tayo sa huling yugto Sa isang taon na tayo'y nagkakilala Isa lang ang sigurado Mga alaalang ating ginawa ay kailanma'y di mawawala Masarap sa pakiramdam na ito'y napagtanto Na ikaw ay nakapagtapos sa kagustuhang matuto. Sa dami ng problemang hinarap, Ika'y andito nakatayo, handa na para sa hinaharap. Alam kong ika'y masaya dahil paghihirap ay mawawala. Pero mananatili lahat ng alaala. At isama na rin sila sa mga nagagalak. "Nakatapos ka, mahal naming anak" Pero masakit isipin na dumating na ang panahon Na mawawalay sa matatalik na kaibigan Pero ako'y sigurado, mga payo ay dala sa lahat ng pagkakataon. At mga masasayang alaala ang dala sa paglisan. 'Di talaga maiiwasan ang mga ganitong nadarama Sa pagtakbo ng buhay, ika'y dapat laging masaya. Sa pagka't ang pagpapahiwatig ay ika'y handa na sa pagbabago. At ika'y mamumulat sa bagong mundo. At huwag mangamba kung sa kanila'y malalayo Dahil bitbit mo ang mga alaala nyong mahal pa sa ginto. Dahil pwede naman bumisita at umalala Sa mga masasayang alaala noong kayo'y magkasama. Pero sa loob ay parang may pumapalo Sa dibdib ay may naghahalo. Sa isang taon na tayo'y nagsama Aaminin na ako'y malulungkot pag ika'y nawala. Magkahalong emosyon sa dibdib na saya at lungkot Walang magagawa dahil dito talaga aabot. Dahil ang lahat ng bagay ay natatapos Pero nais kong malaman mo pagibig kong para sa'yo ay di nagbago. At eto na ang huling pagkakataon para gumawa ng isa pang alaala. Mga alaala na dala saan man mapunta. Mga alaala na magpapaalala Na kahit anong mangyari, ika'y nandito parin.

- Simon Barrameda

[abmterabyte-blog]

Pagkakaibigan

Sino ang mag aakala na sa dinami-rami ng pwede kong makilala ay ikaw pa.

Sa dinami-rami ng studyante na pwede kong maging kaibiagan ay ikaw pa.

Sa una kahit malapitan ka ay hindi ko magawa.

Pero hindi yon naging hadlang para tayo ay maging malapit sa isa’t isa.

  Sino ang mag aakala na ang isang tulad mo ay makikipagkilala sa tulad ko.

Minsan napapaisip nalang ako kung ano ang nakita mo sa akin.

Kung bakit sa dinami-rami ng tao ay ako pa

At ako’y napaisip, ano nga ba ang nakita mo sa isang tao na katulad ko at ako’y pinagkakatiwalaan mo?

  Pero ang lahat ng pag-aalinlangan ko ay napapawi sa tuwing kasama kita

Mistulang lahat ng ito ay aking nalilimutan kahit pansamantala lamang.

Pinaramdam mo sa akin na may pakinabang ako sa malupit na mundong ito.

Pinaramdam mo sa isang tulad ko na may halaga pa rin pala ako.

  At ako’y nagagalak ‘pag ika’y nakakausap

‘Di ko alam kung bakit, pero pag ika’y tinutulungan,

Tila may galak sa aking puso na sa’yo lang nararamdaman.

At wala kang sablay sa pag-papangiti sa akin sa tuwing tayo’y magkasama.

  Sobra sobra ang pasasalamat ko sa tadhana, dahil tayo’y pinagtagpo.

Sa dinami-rami ng mga pwede mong makasama ay ako pa.

Pakiramdam ko ay napaka-swerte ko dahil nakakilala ako ng isang tulad mo.

Binigyan mo ng kulay ang kupas kong mundo.

  Binigyan mo ng bagong pagasa ang pusong durog na durog.

Binigyan mo ako ng bagong pananaw sa buhay na kay lupit, at lagi mong tatandaan,

Ang bawat ngiti na iyong nakikita sa akin, ikaw ang dahilan ng lahat ng ito.

At ikaw ang dahilan kung bakit kinakaya ko harapin ang bawat umaga ng may pag-asa

  Dahil sa’yo ako’y nagkaroon ng bagong dahilan para ipagpatuloy ang aking nasimulan.

Sa dami ng mga posibilidad, sa dami ng tiyansa na may iba kang makikilala ay ako pa.

Kaya abot abot ang pasasalamat ko sa Maykapal dahil tayo ay nagtagpo

Tanging hiling ay ito: kahit kailan ma’y wag sana magkalayo. 

- Simon Barrameda