ahmedgamal20 - Tumblr blog

ahmedgamal20 · 5 years

Text

هتكلم عن قصه اسوا كارثه بحريه يتعرضلها سلاح الغواصات الروسي و هي الغواصه "Kursk "K-141

هي قصه كارثه حصلت سنه 2000 لواحده من اسود الايام اللي عدت علي القوات البحريه الروسيه في تاريخها في اليوم ده غرقت الغواصه النوويه الروسيه كورسيك Kursk بسبب انفجار حصل جواها قتل اغلب طاقمها و اللي فعلا يزعل هو ان ال24 بحار اللي نجوا من الانفجار فضلوا محبوسين جواها في قاع المحيط و ماتوا من الاختناق قبل ما فرق الانقاذ تلحق توصلهم هبدا الاول افهمك مين هي كورسيك Kursk وبعد كده نروح لازاي غرقت قياده القوات المسلحه السوفيتيه فضلت لسنين بتعتبر ان اكبر تهديد علي امن البلد هو حاملات الطائرات الاميريكيه هم شايفين ان حامله الطائرات دي عباره عن مطار عايم علي وش المياه و الاهم من كده ان حامله الطائرات نفسها بتقدر تضرب صواريخ عابره للقارات شايله روؤس نوويه هم كانوا شايفين ان حاملات الطائرات هي راس الافعي للقوات المسلحه الاميريكيه وعشان تقطع راس الافعي مكنش فيه حل احسن من الغواصات السوفييت عملوا فئه من الغواصات مخصوص لضرب حاملات الطائرات سموها انتاي Antey-Class Submarines بس الامريكان سموها اوسكار-2 Oscar II غواصات Oscar II دي كانت طولها بيعدي 150 متر و الزعنفتين بتوعها عرضهم 18 متر و وزنها بيعدي 19,400 طن يعني بتتكلم عن ضعف وزن المدمره في حالتنا اسال انتوا عاملين غواصه تقيله اوي كده ليه؟ الحقيقه ده سببه حاجتين: اول سبب هو ان الموتور اللي بيمشي الغواصه دي كانوا عباره عن اتنين مفاعلات نوويه OK-650 بيدو للغواصه 97,990 حصان بيخلوها تجري تحت المياه بسرعه 33 عقده "61 كيلومتر في الساعه" وده هدفه ان بما ان الغواصات دي اتعملت عشان تصطاد حاملات طائرات فهي لازم تجري بسرعه شبه سرعه حاملات الطائرات السبب الثاني هو ان الغواصات Oscar II كانت بتشيل صواريخ كبيره و كتير في نفس الوقت يعني مثلا الغواصه الواحده كانت بتشيل 24 صاروخ P-700 Granit مضاد للسفن ده لوحده صاروخ طوله 10 متر و وزنه داخل في 7000 كيلوجرام يعني تقريبا عماره 3 ادوار اهي الغواصه الواحده شايله 24 عماره من دول الصاروخ الواحد سرعته بتوصل 1.6 ماخ يعني 1.6 سرعه الصوت و مداه بيوصل 582 كيلومتر الصاروخ ده كان بيستخدم نظام توجيه بالاقمار الصناعيه اسمه Legenda وقتها كان احدث حاجه بس دلوقتي طلع معاش و فكرته انه عشان يصطاد حاملات الطائرات بحيث ان بيبقي قدامك حلين يا اما الصاروخ يشيل راس متفجر عادي وزنه 740 كيلوجرام وده بيقدر يسبب اضرار محترمه في جسم حامله الطائرات وده في حاله ان حامله الطائرات اللي هتدمرها قريبه من الساحل و انت خايف علي السكان من الاشعاع النووي او انك تحط راس نووي بقدره تدميريه 500 كيلوطن و ساعتها حامله الطائرات هي و السفن اللي معاها هيتبخروا زي ما المياه جوه الكاتل بتتبخر وانت بتسخن المياه عشان تعمل شاي السوفييت عملوا 13 غواصه من الOscar II ومن ضمنهم كانت الغواصه K-141 اللي اتسمت كورسيك Kursk الغواصه كورسيك Kursk دخلت الخدمه سنه 1994 ضمن الاسطول الشمالي الروسي و يوم 15 اغسطس 20001 كان المفروض ان الغواصه هتعمل مناوره مع حامله الطائرات الروسيه الادميرال كوزنيستوف "Admiral Kuznestov" و المدمره بيتر فاليكتي "Pyotr Valikity" بحيث ان السيناريو ان الغواصه كورسيك Kursk كانها بتصطاد حامله الطائرات و المدمره دورها انها تحمي الحامله المناوره كانت شغاله و وزي الفل لحد ما في الساعه 11:20 صباحا بتوقيت موسكو حصل انفجار تحت المياه هز منطقه المناورات الانفجار لما حصل عمل هزه ارضيه سجلت 4.2 علي مقياس ريختر بتاع الزلازل بعدها بدقيقتين انفجار تاني حصل الانفجارات كانت قويه لدرجه ان المدمره بيتر فاليكتي "Pyotr Valikity" كانت بتترج الانفجارين خلوا الغواصه تغرق لمسافه 100 متر و هي مايله علي العمودي علي الارض بزاويه 20 درجه بس في الصوره قبطان الغواصه كورسيك Kursk "جينادي لياشين Gennady Lyachin" بيحيي العلم في مناوره قامت بيها الغواصه في البحر المتوسط يوم 19 اكتوبر 1999 لان دايما في المصايب مخنا بشكل اوتوماتيكي بيروح لاسهل الاحتمالات فانت لا تتخيل كم الفتي و الهبد اللي الروس عاشوه لما جالهم خبر ان الغواصه كورسيك غرقت الهبد احيانا كان بيجي من حتت مينفعش باي حال من الاحوال انها تهبد زي لما قياده القوات البحريه الروسيه اول ما الكارثه حصلت قالوا ان والله الغواصه انفجر جنبها لغم بحري قديم من ايام الحرب العالميه الثانيه بس ناس قالت ازاي يا جدعان ده تصميم كورسيك مخلي ان جسمها عباره طبقتين من الصلب و متقسمه ل9 حتت ضد تسريب المياه فاكيد لغم بحري من ايام الحرب العالميه الثانيه مش هيغرقها ده اخره يخدش سطحها الخارجي شويه و قالوا لا معلش اصلها انفجرت بسبب تعرضها لنيران صديقه من المدمره اللي شاركت معاها في المناورات بس اطقم الانقاذ لقت ان اثر الانفجار انه حصل جوه الغواصه مش براها فكده النظريه دي ولا ليها لزمه فكره ان اكيد الانفجار حصل من جواها دي و عمل فتحه في مقدمه الغواصه عند المنطقه اللي بتتحط فيها الطوربيدات خلي الهبد ميقلش قد ما خلاه مركز علي حته معينه وقتها طلعت هبدايه من العيار التقيل ان سبب غرق كورسيك هو انها كانت شايله طوربيد جديد لانج الروس اخترعوه و كانوا بيجربوه اسمه"شكفال Shkval" شويه و طلع ان مفيش طوربيد بالاسم ده في الترسانه البحريه الروسيه اصلا فين وفين لما اطقم التحقيقات البريطانيه حلت اللغز وهو ان الطوربيدات اللي كانت علي متن الغواصه كورسيك هي طوربيدات Type 65-76A اللي الي حد ما قديمه بدات تدخل الخدمه في القوات البحريه الروسيه بدايه من سنه 1997 بس بتستخدم سائل اسمه بيرو-اوكسايد الهيدروجين Hydrogen Peroxide Liquid الروس كانوا بيحطوا نوع معين من الHydrogen Peroxide Liquid اسمها HTP ودي اختصار High Test Peroxide الطوربيد زيه زي الصاروخ واحد بيمشي في المياه و الثاني بيمشي في الهواء بس الاتنين بيعملوا حاجه واحده وهي انهم يتحط عليهم قنبله و يجروا بيها بسرعه عاليه اوي عشان تروح تنفجر في هدف ما عشان الصاروخ او الطوربيد يجري بالسرعه العاليه دي فهو بيحتاج محرك او موتور و الموتور ده عشان يشتغل محتاج اكسجين في حاله الصاروخ الموضوع سهل لان الهواء الجوي مليان بالاكسجين فالموتور بتاع الصاروخ بيسحب الاكسجين اللي هو عايزه المشكله بتبقي في المياه طبعا الطوربيد مش سمكه عشان يبقي عندها خياشيم توفرلها الاكسجين ده معناه اننا لازم نحط مع الطوربيد حاجه توفرله الاكسجين اللي الموتور بتاع الصاروخ محتاجه عشان يجري و الحاجه دي هي الHTP الHTP دي ماده من اعجب المواد اللي ربنا خلقها دي ماده مش قابله للاشتعال ومش بتتفاعل مع الوقود ولا حتي بتمتزج به فيها ميزه حلوه لو الHTP دي اتحطت مثلا في اسطوانه من الفضه فبتلاقيها اتحللت لبخار مياه و اكسجين وده اللي بيروح للموتور عشان يشتغل المشكله ان التفاعل ده بيصاحبه تمدد في حجم الHTP بما يعادل 5000 مره عشان كده انت لازم تكون واخد بالك لان تلامس الHTP مع الفضه لازم يحصل لما الموتور بتاع الطوربيد يكون شغال و يكون في المياه فعليا عشان التمدد ده يدي للطوربيد قوه دفع اضافيه بس لو حصل ان التمدد ده حصل بره محرك الطوربيد فانت بتتكلم عن انفجار هي مش بتشتعل هي بتنفجر الحقيقه ان مش الروس هم اللي اكتشفوا الماده دي لاول مره انما الانجليز في يونيو 1955 كانت فيه غواصه بريطانيه اسمها "Sidon كانت بتبحر قدام شواطيء مدينه بورتلاند المفروض ان البحاره بتوع الغواصه كانوا في مهمه تجربه نوع جديد من الطوربيدات بيستخدم الHTP لاول مره يحكي ان و البحاره بتوع غرفه الطوربيدات بيشيلوا الطوربيد الجديد بيحطوه جوه ��ومعه الاطلاق بتاعته فجاه انفجر و مات 13 بحار في الكارثه دي طبعا الانجليز لانهم احسن ناس تكفي علي الخبر ماجور فمحدش عرف بالمصيبه دي ولا قرا عنها بالصدفه ناس من طاقم التحقيقات وقع في ايدها مقاله اتكتبت في هيئه الاذاعه البريطانيه BBC بتتكلم عن كارثه الغواصه "Sidon" و بشويه تدوير الفريق بدا يجمع النقط الناقصه تسلسل الاحداث في الغواصه كورسك Kursk مشي كالاتي: ١- حصل تسريب لHydrogen Peroxide من جوه واحد من الطوربيدات Type 65-76A وده سبب حريق ادي غالبا ان الراس المتفجر جوه الطوربيد فرقع الراس المتفجر بتاع طوربيد زي ده بيبقي عباره عن قنبله وزنها 450 كيلوجرام فهو كفيل انه يدمر برج سكني كامل ٢- الانفجار الاول غالبا هو اللي سبب الفتحه في جسم الغواصه فوق مكان تخزين الطوربيدات الانفجار الثاني غالبا برده سببه هو ان باقي الطوربيدات اللي في الغواصه انفجرت ٣- الانفجارين مقتلوش كل طاقم الغواصه ال118 لان القوات الروسيه استلمت رساله لاسلكيه من ضابط اسمه "ديميتري كوسيلنيكوف Dmitri Koselnikov" قال فيها ان فيه 23 بحار لسه عايشين والرساله دي اتبعتت بعد ساعتين من الانفجار الثاني فرق الانقاذ الروسيه ومعاها فريقين انقاذ واحد من بريطانيا و الثاني من النرويج مقدرتش توصل للبحاره اللي لسه عايشين في الوقت المناسب و كلهم ماتوا الغواصه نفسها تم انتشالها من قاع البحر سنه 2001 و الغواصه اتقطرت لحد ما وصلت ميناء روزلياكوفو Roslyakovo الروسي مهم تكون فاهم تاثير كارثه زي غرق غواصه نوويه ممكن يعمل ايه في الروح المعنويه للقوات المسلحه بتاعه اي دوله الروس زيهم زي الامريكان عندهم الي حد جنون العظمه ان احنا جامدين و محدش يقدر يهزنا فلما تحصل كارثه زي دي و 118 بحار يموتوا و محدش يعر ف ينقذهم بتعمل هزه ثقه في النفس حاجه تانيه وهو احساس العظمه بيخلي عندك احساس بان لا مستحيل ده يحصلنا احنا اجمد من ان يحصل فينا كده ده يفسرلك ليه "فلاديمير بوتين" اللي كان وقتها لسه منتخب رئيس للجمهوريه كان في اجازه ولما حصلت كارثه غرق الغواصه كورسيك مكلفش نفسه انه يقطع اجازته عشان يتابع الموقف بنفسه مش لسبب غير ان يا جدعان مستحيل قوات بحريه بقوه و خبره القوات البحريه الروسيه تحصلها كارثه بالشكل ده احنا بنتدرب كتير و نصرف كتير عشان نتفادي النوع ده من الكوارث في الصوره برج القياده بتاع الغواصه كورسيك Kursk باين وهي بتتقطر لميناء روزيلياكوفو Roslyakovo الروسي بعد غرقها المصادر : مقاله بعنوان The True Story of the Russian Kursk Submarine Disaster : (link: https://www.popularmechanics.com/military/navy-ships/a23494010/kursk-submarine-disaster) popularmechanics.com/military/navy-…

#تاريخ #معرفه #احداث

1 note · View note

ahmedgamal20 · 8 years

Text

‏عارفة اني هرجع عن كل كلمة قولتها بثقة وقررتها في الاخر عشانك ..عارفة ان كل القوة المصتنعة بتعتي هتيجي قدامك وترجع لطبيعتها الضعيفة

0 notes

ahmedgamal20 · 8 years

Quote

‏نعتقد أنه يرانا من فوق .. لكنه يرانا من الداخل

0 notes

ahmedgamal20 · 8 years

Quote