لو كان في الإفصاح خيرًا لَما أسرّها يُوسف في نفسه، ولما تولَّ يعقوب عنهم، ولما قالت مريم: "فلن أكلم اليوم إنسيا".. لا تعري هشاشة روحك للشامتين، من يحبك سيفهمك من نظراتك، سيفهم من تعابير وجهك ومن طريقة كلامك، والبقية لن يفهموك، وإن فهموك لن يقفوا معك، وإن غضبوا منك يومًا عايروك..
" ليس بوسعي أن أتواجد مع أشخاص كأنهم حقل ألغام، وأكون مُطالباً بأن أتوخّى الحذر في حديثي وأتخلى عن عفويتي، لكي لا تُفسّر بشكل خاطئ، أنا غني عن هذا النوع من العلاقات. "
لو في فرصة لشغل من البيت لمدة شهرين او ٣ شهور يا ريت حد يقدر يفيدني أو يساعدني ضروري جدا او شغل في اسكندرية
انا اول مرة أنزل حاجة كدا لكن قاعدة بقالي فترة كبيرة جدا جدا من غير شغل وعندي التزامات مادية ومحتاجة اتصرف ضروري
انا مهندسة كهرباء واشتغلت في حاجات تانية وعندي لاب توب فممكن اخلص من عليه أي حاجة مكالمات مع العملاء ومش شرط ممكن اشتغل في أي مجال متاح أو اظبط اي داتا وخبرة 4 سنين شغل فعلي
غير ٦ سنين او اكتر في ال civil work واتعاملت كتير مع الاطفال كدراسة وأنشطة
هو ازاي لحد دلوقتي في مكاتب وشركات شايفة أنه طبيعي جدا يكون مرتبك 3000 جنيه كمهندس مع انك اشتغلت فترة كبيرة من 2019 لكن ازاي لازم كل لما تروح تقدم يقولك ما انت كنت شغال في مجال تاني فهعتبرك فريش ازاي بجد التخلف دا بيحصل و ليك يوم إجازة الجمعة في الأسبوع و ٩ ساعات شغل وهروح مواصلات رايح راجع يعني ٤ مواصلات في اليوم والله مصر دي من إحدى العجائب فعلا يعني بالدولار أقل من ١٠٠ دولار في الشهر تقدر تشتري بيهم بني آدم تتحكم فيه وتبهدله وكمان ميقدرش يكفي مصاريفه مش هقولك مصاريف البيت وأهله
خسارة بجد الدراسة والتعب والمجهود وبصراحة مش عارفة أقبل ولا أقعد في البيت بكرامتي ؟!
كل يوم بقول ياريت لا كنت اتعلمت ولا حاجة كانت كل مذاكرتي من وانا صغيرة تكون لغة أو جرافيك أو برمجة أي حاجة طالما الشهادة ممكن تتعمل ورق حلو اوي لأحلى فلافل وملهاش لازمة مصاريف المدارس والكليات وحرقة اعصاب امتحانات وثانوية عامة ونطلع من الأوائل طول دراستنا وتوتر واستنزاف نفسي وجسدي
حسبنا الله ونعم الوكيل
الله المستعان
مش عارفة بجد المفروض اقول ايه ولا اتصرف ازاي والقاعدة في البيت للأسف مسببة أزمة كبيرة جدا جدا
ليه ممكن إنسان سوي يمد إيده على أقرب إنسانة ليه ؟ خاصة لما النقاش يتعلق بمستقبله ومصلحته قبل اي شئ لمجرد إن الكلام مش عاجبه ومش على هواه رغم علمه بإصابتها وبيضربها بجبروت وفي نفس الأماكن المصابة وصوت عالي وأسلوب صعب
ليه مينفعش النقاش يكون بهدوء ؟
وازاي توصل انسان يطلب الحب ؟ ويكون ردك مش هقول حاجة مش حاسس بيها ..
طيب ليه ارتبط بيه من الأول ؟؟؟ طالما انت بخيل في مشاعرك
وانك تصرف عليها أكل وشرب يبقى عامل الواجب اي حاجة تانية حتى وهي مش بتشتغل مع انها بتدور ولما كانت بتشتغل عمرها ما طلبت حاجة فتسيبها من غير ولا مليم وهي ملزمة بيها ازاي مش عارفة اتصرفي والله يسهلك
الراجل لما بيحب أعتقد بيكون إنسان حنين وييتقي ربنا في الإنسانة الي معاه
في ناس بتطفي الي معاها حرفيا وتخليه انسان باهت جدا ممكن تكون شخصية طموحة جدا بس بمجرد ما توصل انك تحب شخص تشحت منه المشاعر هتتحول لشخصية كئيبة وضلمة وبتفكر امتى الحياة تنتهي خاصة لما يكون والدها متوفي وملهاش حد في أهلها يجيب حقها لإنهم ناس مسالمة عيشي وارضي ما كل الناس عايشة بجد الوحد نفسه يسافر اي حتة ويشتغل يغسل صحون اهون من الذل أو أنه يجراله حاجة
بجد أوعى ترتبط بإنسان بتحبه لازم العقل ثم العقل ثم العقل
القلب دا سبب كل المصايب وعلى رأي الست " العيب فيكم يا في حبايبكم" 🤎
لما يوصلها للحالة الي تشحت الكلمة الحلوة واعتقد البيوت مش أكل وشرب بس وإلا كانت البنات فضلت في بيوت أهلها معززة مكرمة
بس المجتمع مش بيسيب بنت في حالها ولا هي في بيت اهلها ولا في اي حتة ولا حتى لما تموت
محتاجة ألاقي شغل ضروري وتعبت من كتر ما بعت ايميلات ودورت بقالي فترة طويلة جدا
وحتى الي موجود في مجالي مرتبات غير آدامية مع المسؤوليات الي الواحد شايلها وهم البيت
حقيقي عندي استعداد اشتغل اي حاجة بس على الأقل تكون مناسبة ماديا وسط الأوضاع الي بنمر بيها
و فضلت ٣ سنين شغالة مهندسة في مصنع بمرتب ميكفيش حتى اسبوع ومن غير زيادات ولا اي حاجة ولا اجازة واقول أحسن من قعدة البيت لحد ما صحتي راحت وكنت بتهلك وشايلة الشغل حرفيا من الصبح ل بالليل وفي منطقة بعيدة جدا عن بيتي وصناعية وصحراء والبنت الوحيدة وسط عمال وصنايعية والكل بيقول بميت راجل بس في الآخر مفيش تقدير نهائي ومظبطة شغلي والعملاء كلهم بيشكروا فيا وشركات كبيرة بتحب تتعامل معاهم بسببي وفي الآخر ولا حاجة ومرتب أقل من مرتب اي فني لدرجة الواحد ندم على شهادته وعمره الي ضاع فيها
وطبعا حالتي نفسيا بقت سيئة ومعنديش شغل وقاعدة في البيت وكله لازم علاقات ووسايط ولا عارفة ألاقي شغل لا جوه ولا بره حقيقي تعبت