#عذراً ع التأخير

[aan56]

ردًا على اللي علقت عن مجتمع اليابان وكيف معطين نظرة عكس واقعهم اللي فيه من البلاوي، أنا نفسك انصدمت عما قريب ولكن مو عن البيدو والاشياء ذي لأنها كانت تظهر بانميات وتبين لي هالواقع ولكن انصدمت من فيديو مقابلات بشوارع اليابان كان واحد يسأل يابانيين ويابانيات عن (الزنا) مع شخص آخر بينما يمتلكون حبيب، ويقول لهم هل كذا يعتبر خيانة؟ المهم إن كثير منهم يقول لا وخاصةً اني دافع فلوس عشان الخدمة وفيه اللي يقول إن إذا مافيه مشاعر مايعتبر خيانة.. الصدمة إن فيه كثير بنات يقولون انهم هم بانفسهم يخونون وعادي يضحكون للكاميرة! غير اللي تقول انه ممتع شعور الخيانة ( هنا اخذت موقف من الكفار بشكل عام) مع إن ياكثر العرب اللي يروحون هناك ويقولون انهم شعب محترم بس ينقصهم الاسلام ، ولكن شكل طبايعهم الحقيقية مايظهرونها عند الاجانب أو ما ادري صراحة وش الحقيقة الغائبة..

المهم اني اخذت منهم مقلب أشد يعني على الاقل الكوريين من يومي ادري ان كثير منهم يعنفون المرأة وسوء معاملتهم لها والتنمر يعانون منه نص الشعب وحبهم للمثالية الزايدة بس يظهرون لنا هالشيء ، الله يعافيهم ولا يبتلينا اصلًا مبادئ الامه البشرية بدأت تسقط للهاوية هذا إذا ماكانت وصلت للهاوية بالأساس، والله الاسلام يعزنا ويقوّم مبادئنا دين عزيز وعظيم كل ما اشوف حال الكفار كيف يقتدون ببعض بالردى على اساس انه تفتُح أحمد الله على هالدين وعلى هالعقيدة الحمدلله فعلًا

يب أنا سمعت عن هاللقاء

بغض النظر اذا كان فعلاً يجسد الواقع الياباني أو لا ..

بس تبقى مجتمعات بوذية .. لا دينية .. طبيعي نشوف عندهم بعض التصرفات البعيدة عن الفطرة البشرية .. حتى لو تلاحظين بالحروب يكونون هم ألعن البشر بالتنكيل و القتل .. بالبداية كنت أحسبه شيء له علاقة بالعرق الآسيوي ..انه عرق يفتقد الانسانية والمشاعر .. كذا تشكيله البيولوجي .. بس أخوي نبهني لما قال يمكن لانها شعوب لا دينية .. فـ صح .. كلامه منطقي

فلذلك نلقى عندهم كثير من المنطق الغريب ..

ومع كل هذا .. أعيد و أكرر كلامي .. شوفي كيف متمسكين بعاداتهم و تقاليدهم ومعتقداتهم الغريبة .. ويتفاخرون فيها .. لدرجة أبهرونا فيها على مافيها من بعض الأشياء الغبية

بينما ربعنا يستحون لما يتكلمون عن غض البصر أو الغيرة أو اللبس العربي .. وهي لما تتأملينها بتلقينها تنقط جمال و روعة

[aan101]

 💕 مرحبا آآن - سان

 :) شرايك بالصوره كيوت 😍  تذكرتك اول ماشفته

https://scontent-cdg2-1.xx.fbcdn.net/v/t1.0-9/12920241_1374062829276190_2866234769596848996_n.jpg?oh=2e8413032e7490be6ce94699732e5960&oe=57B8B1ED

 👌 تدرين وش أحسن شيء سويتيه .. إنك ما طحتي بمانجا كونان وماسكه نفسك 

 😄 جد الأحداث مولعه نستني ون بيس مع انه الثاني هو مولع بعد 

عاد بالنسبه لي أفضل المانجا عن الأنمي ، مدري ليه بس أتفاعل معها اكثر 😇 يهمن الرسم كثير وغالبا المانجاكا رسمه ثابت مافيه تشويه و المشاعر توصلني اسرع ههه

 😩 عموما.. اللي بس تمنيته اني جمعت الآرك كامل لما ينتهي أفضل من المطمطه

—-

وشكرا ع الفلم ٨  .. اذكر اني مختمه كل الحلقات والافلام اللي فيها كايتو بس وشلون فاتني هذا ما ادري 👀

الفلم بطل يجنن .. صحيح وسطه ممل شوي بس الجزء الأخير يشفع له

 😍😍 اعشق ثنائيات كايتو و كونان  

هلابك حبوبة

الصورة كيوووت .. اوما الظل الأسود هههههههههههه   ١

ايييه من جدددد .. أنا سعيدة على برودة دمي تجاه كونان حالياً .. خاصة اني أشوف ان كونان أحسن بالانمي أكثر من المانجا .. و ارك القرمزي أقرب مثال

الانمي أحس رسمه ثابت برضو .. مو مثل ون بيس ع سبيل المثال كل حلقة ستايل رسم

—

ما أذكر اني خبرت أحد عن الفيلم الثامن ^^” تراي نساية .. و الانونات اللي أجاوب عليهم كثار .. فهنا تزيد الطين بلةهههه

ثنائيات كايتو و كونان حلوة .. بس عن نفسي أستثقل حلقات كيد بشكل عام ، مو كره فيه .. بس لان حلقاته  دايم خارج إطار القصة الأساسية للانمي .. أحس وقتها اني أشرف انمي ثاني مو كونان 

[aan56]

هيلو انن م اتوقع حتعرفيني بس انا اعرفك متابعتك من حسابك الاول

كيفك ؟

من اول اشوف انطباعاتك هنا

ملاحظه م نشرتي شي من الانميات الجديده فقط جوجيتسو و سباي فاميلي

م تخططي تشوفي طوكيو ريفنجرز ؟

الحمدلله بخير ..

أنت كيفك ؟؟

يوزرك مو غريب .. قد مر علي .. بس العتب ع الذاكرة التعبانة

,,

أمانة ما شفت غيرهم للان .. شوي انشغلت الايام الماضية .. وأحس اني كنت مكتفيه فيهم

,,

طوكيو ريفنجرز شفته وصكيته دروب ..

هذا رأيي عنه

[aan56]

السلام عليكم آن 🤍كيف حالك مره مشتاقة لك مع اني تركت الانمي بس مازلت استمتع بتعليقاتك ولازم امر على مدونتك 💓كلمينا عن روتينك كيف تهتمين فيه وش اهم الاشياء اللي لازم تنجزينها في يومك وكيف تنظيمك لوقتك🤍حالياً انا قاعده اركز كيف اهتم بروتيني وجودتة فابي استفيد منك 😂💓💓

وعليكم السلام والرحمة .. هلابك ريمو💕 .. والمعذرة ع التأخيرغير المتعمد🙏🏻

يسعدني و يشرفني كلامك يا قلبي عن زياراتك الحلوة لصفحتي ♥️☹️

أمانةً روتيني اليومي مافيه شيء مميز .. وعادي جداً 😬

من الأشياء اللي كنت مخططه لها بعد استقالتي اني أرجع أشارك بالمراكز و الجمعيات الخيرية .. أنا من بعد الزواج و الولادة ومن ثم الوظيفة ابتعدت كثير عن هذي البرامج اللي هي بالنسبة لي بمثابة روحي وأحبها كثير

فـ لله الحمد اشتركت بتنظيم كم برنامج خيري .. آخرها برنامج أرجوحة واللي كان مخصص لفئة الاطفال .. وهذا الشيء أسعدني كثير .. لان عندي قناعة اننا كبشر مسلمين . لازمنا تنقية روحية دينية بين الفترة و الاخرى .. وأفضل مكان هو الالتحاق بمثل هالبرامج .. سواء من تنظيم أو مشاركة بسيطة .. لانها في الغالب أماكن تكثر فيها جلسات الذكر و التناصح والتسابق لخيار الأعمال كصيام الاثنين والخميس .. وغيرها

بالنسبة لبرنامجي اليومي في رمضان

أنا لاحظت على نفسي -وعلى كثير من الناس - اننا نكون متحمسين بأول الايام ونتعبد و نجتهد فيها .. بس مع مرور الايام نركد و نتعب .. والمشكلة الأجر يتزايد مع الاخير .. أقصد مع العشر الأواخر ..

عندي قناعة ان أحسن شيء التدرج و تقسيم و تحديد الأعمال عشان ألتزم .. بالنسبة لي التحديد دايم يلزمني .. يمكن فيه غيري ما يحس ان هالشيء يلزمه .. فكلٍّ ومزاجه و شخصيته

فلذلك .. أنا من سنين أقسّم رمضان الى ثلاث أقسام

القسم الاول ( العشر الأيام الأولى ) ... أصلي التراويح ثلاث تسليمات ... والقيام تسليمة وحدة مع الوتر > ملاحظة أنا أصلي بالبيت ما أحب أصلي بالمسجد

القسم الثاني (العشر أيام الثانية ) .. أصلي التراويح أربع تسليمات .. والقيام تسليمتين مع الوتر .. + يوم أصلي فيه النوافل كلها .. ويوم أقعد أقرأ قرآن بعد صلاة الفجر إلى الإشراق ثم أقعد 10 دقايق بعدها ( لانه وقت منهي الصلاة فيه ) ثم أصلي الضحى

القسم الثالث ( العشر الأواخر ) ... أصلي التراويح خمس تسليمات .. والقيام ثلاث مع الوتر .. + أصلي النوافل كلها مع جلسة القرآن إلى الاشراق في كل الأيام ..

هذي الطريقة معتمدتها من سنوات ومرتاحة فيها بدون حوسة .. حبيت أذكرها لعلها تفيدكم

أما باقي يومي .. فأنا أنام غالباً 6:00 الصباح .. أقوم الساعة 9:00 أوصل سارة للروضة ثم أرجع أنام ..غالباً ما أنام , لان القائد المظفر- خالد😁 -له كلام ثاني .. فأقعد معاه إلى الظهر .. في هذا الوقت .. أطبخ الدجاج لسنادويشتات الفطور .. على الساعة 12:00 .. أروح بعدها للمدرسة أرجّع سارة للبيت .. ثم هوباااا صلاة الظهر و نوووووم إلى العصر .. أقوم العصر أصلّح ساندويشتات الفطور .. وغالباَ بعدها أرجع أنام .. وأحيانا لا

أقوم على 5:40 تقريباً .. نجهز الفطور , ثم نفطر

بعد الفطور و العشاء .. أصلي التراويح

من بعد التراويح الى الساعة 1:00 وقت فاضي .. ممكن طلعة للسوق أو انسداحة أو جمعة أهلي أو أو ...

على الساعة 1:00 أصلي القيام

من 2:00 الى الفجر أكون جالسه على جهازي أشوف حلقات من اليوتيوب

وبس والله هذا جدولي غير المميز بشكل عام 😁

[aan56]

أهلًا آن❤️❤️

بسألك، وش الأسباب بالنسبة لك اللي تخليك تقطعين علاقتك مع صديقه أو حتى تخففين التواصل بينك وبينها؟ ، هالفترة فيه صديقة لي مو مرة قريبين من بعض،هي بذاتها كويسة بس تغيرت علي كثيير والسبب الأكبر لكوني ابغى اخفف التواصل هو اسلوبها اللي نوعًا ما ما يناسبني،التمس فيك الحِكمة فـ وش تنصحيني؟ 0^0

هلابك ياقلبي ..

أهم شيء تقطعينها بدون مشاكل ومقاطعة.. " تسريح بإحسان " ... عشان ما يشملكم حديث : " تفتح أبواب الجنة يوم الاثنين ويوم الخميس , فيغفر لكل عبد لا يشرك بالله شيئاً إلا رجلاً كان بينه وبين أخيه شحناء ..." أبد زي ما قلتِ خففي تواصل معها .. واذا أرسلت لك بالواتس أو أي وسيلة يكون ردك مقتضب .. نظام كلمة ورد غطاها

بالاعياد والمناسبات اللي كنتِ دايم تسلمين عليها فيها .. يكون كلامك مختصر مو مثل العادة

اذا طلبت منك طلعة أو موعد .. تعتذرين مشغولة ��و مرتبطة أو أياً يكن

بالسناب تسوين لها تخصيص .. وبالتدريج تبدين تقطعين عنها السنابات

وهكذا

هي بتطفش منك و بتتركك ..

بس عموماً أنتِ ماتدرين .. يمكن هالبنت تكون بالمستقبل أعز صديقاتك, فلا تستعجلي بقطع علاقتك معها

وش المشكلة تكونين طبيعية معها ؟ بالوضع اللي ما يتعبك

واذا سألتك ليه أنتِ مخففة تواصل أو شيء ؟ تعذري بأي عذر محترم .. مثلاً أبغى أخفف أجهزة , من تالي صايرة أكره الواتس , مشغولة .... الخ

بس لا تفرطين فيها

هذا رأيي ..وإن شاء الله اني أفدتك

[aan56]

نزل فلم العمالقه المكمل للاحداث راح تتابعينه؟ 😭😭😭

وش سالفة هالفيلم ؟

مو ع أساس انه بارت أخير ! ليش صارت حلقات موزعة ؟!! ياشينهم هالاستديو طلّعوا الانمي من عيوننا 😤

[aan56]

ممكن تتكلمين كيف الشخص يقوي توكله على الله حتى مع وجود اللحظات الي يغلب فيها القلق وشعور مافيه امل.. خودي وقتك بالرد🙏🏻

أهلا أهلا..

المعذرة ع التأخير ..

كلما زادت معرفتك بالشخص ، زادت ثقتك فيه … ولله المثل الأعلى

تعرفي ع الله سبحانه من خلال قراءتك للكتب اللي تتكلم عن حكمته و رحمته و تدبيره للأمور .. مثل كتاب لأنك الله

واقرئي الكتب اللي تعزز إيمانك .. لان كلما زاد الإيمان زاد التعلق بالله .. مثل كتاب أقوم قيلا ، سابغات ، زخرف القول ، شموع النهار ..

كذلك .. كتب السيرة … فكلما تشبعتِ من قصص النبي عليه الصلاة والسلام و قرأتِ عن توكله صلى الله عليه وسلم و الصحابة بالله سبحانه وتعالى .. كيف هم أقوياء بالله سبحانه .. كلما تأثرتِ بهم … مثل كتاب : الرحيق المختوم ، هذا الحبيب يا محب

داومي ع النوافل .. الصلوات الرواتب ، القيام ، الوتر ، الضحى ، صيام ثلاث أيام من كل شهر .. فالله سبحانه يقول بالحديث القدسي ..

"…وما يزال عبدي يتقرب إلي بالنوافل حتى أحبه، فإذا أحببته كنت سمعه الذي يسمع به ، وبصره الذي يبصر به، ويده التي يبطش بها، ورجله التي يمشي بها…"

عودي نفسك ع الاستخارة في كل شيء.. كبير كان أو صغير .. فهي تطرح البركة في قرارك.. و بتستشعرين خيرة الله لك ..

تعودي انك تدعين الله و تطلبينه في كل شيء نفسك فيه .. حتى لو كان اسكريم😄… لا يكون الله سبحانه آخر خياراتك..

ان شاء الله أكون أفدتك ..

[aan56]

من فتره توغاشي منقطعه اخباره ماله حس تتوقعين جالس يشتغل على المانقا او سحب عليها :( كنت متحمسه اشوف اخر ارك يجمع العناكب مع هيسوكا احس بتكون الاحداث ناااار ، وايلومي انضم للعناكب بعد ماخطب هيسوكا والله ضحكني المؤلف هههههههه على طاري وش انطباعك عن شخصيه ايلومي؟

تعرفين مين أكثر انسان مخفة و هطف بالحياة ؟؟

اللي يثق بـ توغاشي خخخخخخخخ

ياشيخة ذلنا ذا بالمانجا حقته .. العالم بدت وخلصت من بعده , وهو الى الحين يكتب فيها !! مع انه قادر يخلي أحد يكتب عنه .. بس هو لا ..ابو راس يابس .. الا انا اللي أكتب

بخصوص لقطة ايلومي و الخاتم , ناسيتها صراحة .. بس ما أحب بهارات توغاشي عن هالموضوع حتى لو كانت مزحة

انضمامه للعناكب ما أستعبد انها حيلة منه ومن هيسوكا حتى يلعبوا ع الحبلين .. أو كل واحد منهم يحقق مصلحته .. وكرولو أكيد حاس بحيلتهم .. في الاخير هو مب غبي .. فـ بنشوف تقابع حيل متشابكة من العيار الثقيل

,,

ايلومي سبق تكلمت عنه ببوست سابق .. و قلت انه نجم ارك الانتخابات .. مو كيلوا البكاية

بهالارك ظهرت منه أشياء زادت حبي له .. منها تعابيره المتعددة .. زي هذي اللقطة ياااوك

.. ولقطاته الخبلة مع هيسوكا هههه وشفت شوي من قوته .. بالإضافة الى ذكاؤه .. ماتوقعته ذكي كذا .. وحسيت ان شخصيته فيها طبع قيادي تكتيكي ✨❤️ برضو رباطة جأشه .. أحس فيه ثقة كبيرة بنفسه .. نابعة من قوة عظيمة داخله ما نعرفها.. أكبر دليل على ذلك صحبته لـ هيسوكا 😂 وهو يعرف معرفة تامة ان هيسوكا مافيه انسان مصلحجي و أبو وجهين وُجِد على وجه الأرض مثله😂 ومع ذلك ما طق خبر لأي محاولة خيانة من طرف هيسوكا🤣

[aan56]

فاتك سانجي ف اخر تشابتر 😄

يعععع .. الله يعين فانز سانجي .. يبهذل شخصيتهم عشان يبرز فخامة شخصيات ثانية .. وليته عاد يراضيهم بشيء يسوى ..

تمشيت بالهاشتاق .. الغالبية مستاء من الاسلوب المكرر اللي ماله أي مبرر .. يعني ينادي روبين عشان تقاتل البنت اللي مو قادر يقاتلها لانه لا يضرب النساء .. طيب يا حمار انت عرّضت خويتك للضرب .. كونها بتتجالد مع ذي .. اكيد انها بتاكل تبن ولو شوي .. يعني تفضل انك ترهق خويتك بالطاقم و تورطها بقتال هي في غنى عنه على أنك تضرب بنت هي خصم لك ؟!!!!!

يقلع ابو المبدأ النعال اللي يعرفه هالمؤلف التعبان 😷😷

[aan56]

وش رآيك في يوكوكو نو موريارتي ؟!؟!

آسكك ذكرني بهالانمي و فضلت اني ما أجاوب عليه الين اشوف الانمي ... وشفت أول حلقة أمس .. 🙄

ماه~ .. ما شدتني كبداية .. و حسيته تخمة بيشونين 😅 وليتها نوعية التصاميم اللي أحبها عاد 😅 وبعدين انا متخيلة مورياتي شايب .. ليش جايبين لي ورع ؟ 🌝 كان جابوا لنا واحد من عمر كوتيتسو ع الاقل 🌝

واللي قلل من حماسي اني لاحظت أغلب الانطباعات اللي مرت علي عنه مش و لابد ..

فـ مافيه حافز يخليني أكمله الا انه مافيه غيره ينشاف خخخ

و بس ،..

أعتذر ع التأخير 🙏😬

[aan56]

قريت مقابلة لسيو النصف شيطانات وطلع كلامك صح عن سيو سيتسونا، قالوا لها المخرجين تقلد سيشومارو :/، سيو توا كانت تظن أنه مطلوب منها تتكلم كأنها مسترجلة بس قالوا لها ما تهتم بشكل الشخصية وتتكلم عادي

اها .. ماشاء الله علي هههه 

يع لو كانت توا مسترجلة بلهجتها ... اشوى قالوها لها ان تكون طبيعية .. مافيها أي شيء يوحي انها مسترجلة غير لبسها 

[aan56]

سؤال يراودني ليه دايماً الشخصيات الجانبيه اكثر شعبيه من البطل 🤔

لانها ما تطلع كثير فما نمل منها عكس البطل ...ومانتوقع منها شيء كبير أو انت��ار دائم زي نتائج البطل اللي مرده في الأخير يفوز..

[aan56]

حبيت أن الاستديو و المانجاكا ما خلوا توا مسترجلة، صح شعرها قصير و تلبس لبس أولاد للمدرسة لأنه أسهل للقتال، لكن تصرفاتها مثل البنات وشخصيتها لطيفة وكيوت و تحب التنزه و الشاي، حتى لبسها بحلمها بناتي وعندها فساتين بخزانتها، لو اللي ماسكين الأنمي أجانب بيخلونها كورا 2.0 ، ولا يهون الفاندوم الأجنبي اللي في منهم من هو مُصر أنها شاذة 🤢

بالبداية توقعتها مسترجلة .. بس أبداً ما طلعت كذا .. بالعكس هي أكثر الثلاثي الرئيسي أنوثة .. 

فقط لبسها اللي مو أنثوي ..

[aan56]

احس مليون مره يمكن انسألتي هالسؤال بس ليش كرهتي سانجي؟ 😭 احس شيء مره غريب شخصيه مفضله تصير مكروهه عند احد يعني احس عن نفسي لو خاب ظني بشخصيه احبها مشاعر الحب بتخف ويطلع من المفضله بس قلبي ما راح يطاوعني اكرهه لان الانطباع الاول له اثر

ههههه ترى هالانقلاب بالمشاعر أخذ مني عشر سنين هههه

والا هين مو بسهولة كرهته .. خاصة انه كان من أفضل المفضلين 😅💔

ولما تكرهين الانمي بكبره و مؤلفه التبن راح تلقين نفسك تدريجياً تكرهين الشخصية 💁🏻‍♀️

[aan56]

آن أول مرة أتابع هنتر وتوه طلع هيسوكا آآآآآآخ السيو نفس سيو جونيور ونفس المطة الدلوعية المتكبره بالكلام :"""" أول كلمه قالها بأول ظهور بالضبط نفس أسلوبه بجونيور يوم يضحك على جورو بالمطعم (الحلقه 99) يوم يقول هذا أمر سخيف ومضحك :""( المشكله كنت متحمسه أكمل هنتر بس علقت على هالمشهد بس أعيد فيه تكفين قولي فيه مطات دلوعه واجد بالحلقات الجايه

هههههههههههههههههه وضعك صعب > مسوية تضحك و لا كأن صار لها نفس الشيء ☺️

يب يب فيه مطات و لا أروع في القادم من الحلقات 😍😍

شكلي حلمت اليوم بـ هيسوكا بسبب طلتي على آسكك هذا 😂😂

[aan56]

أهلين آن تمبلرك يفتّح النفس 3> 3> اختاري خمسة شخصيات تكرهينها من كونان وغيري أو عدلي فيها بالطريقة اللي تعجبك بحيث تكون أهون أو أقل كره؟ + اختاري كمان خمسة شخصيات من كونان مهملها غوشو واعطيها الأدوار اللي تستاهلها بنظرك؟ + سؤال أخير توقعاتك وأمالك عن الفلم الجاي بالويكي مكتوب انه يخص آل أكاي؟ وبس سوري على كثرة الأسئلة خذي وقتك

حبيبتي شكراً 😫💘💘💘💘

بالنسبة لأسئلتك ..

خمس شخصيات أكرهها و أعدل فيها :

سبق قلت مافيه شخصيات أكرهها بكونان انما أنزعج من جانب معين فيها .. وهم

أمورو > التعديل : مايكون جاسوس

بيلموت > التعديل : تصير شريرة صدقية و بلاش الافلام الهندية حقتها + قزمة عند جين حالها من حال فودكا 🙂

هيجي > التعديل : يفكون عنه البثرة كازوها

كازوها > التعديل : يكون لها سالفة بالحياة غير هيجي

ران > التعديل : تخفف من تعلقها بـ شينتشي

//////////////////////////////////////\\\\\\\\\\\\\\\\\\\\\\\\\\\\\\\\\\

خمس شخصيات مهملها غوشو و كيف أعدلها :

هيجي > التعديل : يدخل في معمعة المنظمة ..

جين > التعديل : يـــطـــلـــع 🙂🙂🙂🙂🙂💔

كوغورو موري > التعديل : يخفف من هزليته لانها زايدة عن حدها من تالي + يعطيه حلقات جادة بعيداً عن زوجته مثل حلقة اجتماع الأصدقاء ذيك

بس ذولي .. ماعندي خمس 😬

//////////////////////////////////////\\\\\\\\\\\\\\\\\\\\\\\\\\\\\\\\\\

بخصوص الفيلم القادم .. فيما لو قُرِّر انه عن أسرة أكاي .. فأتمنى يكون البطل و اللي الاحداث تدور عنه واحد غير أكاي .. مثلاً سيرا ..

لاني مابي يكثر ظهور أكاي بغير السلسلة الأصلية .. و يقلل من فخامته و قيمة حضوره ..

ممكن يكون أغلب الفيلم يتكلم عن أكاي كشخص رهيب و عظيم بس بدون مايظهر كثير .. الا بكم لقطة خرافية و بس.. نظام المضارب اللي صار بينه و يين أمورو و الركض و المقامز و حركات النينجا اللي صار بالفيلم العشرين ما أبغى أشوفه🙂