#لحظه وقف عندها الزمن

[klephty]

انكتب عليا فى اوقات محدده بأيادى القدر أنزل على ملا وشي و كل ما ألبس الأسود استغرب! بعيداً عن كون الأسود عاده من اول مره لبسته بس يوم ٢٨ ديسمبر ٢٠٢٠ ألبسه و يكون زى الحجر فوق جلدى و يكون مُر، ازاى بكون جاهزه دايماً و لابساه! أنا خلصت حُزنى كله النهارده، انا كبرت ٥٠ سنه فوق عمرى النهارده! بعد ليله طويله من خيال بيتحرك فى اوضتى و كنت حاسه انه هياخد روحى سابنى و راحله!

النهارده بس اتأكدت إن الدنيا ماتسواش و قد ايه خانتنى لما كنت متعشمه محدش تانى يموت بعد خالى، النهارده بعد موت شخص مهم فى حياتى و مع دخولى اول لحظه بيته بدون خوف من الوباء اللى مات بيه، انا دخلت أدوّر عليه! إنهيار عصبي حاد و عدم استعياب لحد وقتى اللى بكتب فيه الكلام، من أول منظر التابوت المكتوب عليه آية " كلُ نفسٍ ذائقة الموتِ " لحد ما قعدت تحت رجلين خالتى و هى بتحكيلي عن حب حياتها اللى إختفى فى لحظه، الراجل الوحيد اللى باركلى فى كل مره كنت بتقدم خطوه، الراجل اللى كنت بحس نظرة الفخر فى عيونه، خالتى سكتت لحظه و قالتلى :" انا مكنتش بعملك، روحى اللى كانت بتعملك و انا دفنته و جيت و قاعده اهو "، اللحظه اللى حسيت الزمن وقف عندها و حسيت إنى اتبخرت! فى اللحظه دى كرهت نفسي و وجودى اللى كنت مستنيه موته اخيره و أكون إنتهيت، انا مكنتش عايزه حد يموت تانى قبلى، اصلى كده كده مُت من أول مره و مابقتش أخاف لكن ليه اموت بالبطئ و روحى تنسحب سِنه سِنه، ده مش عدل! اهى كلها انسحبت و خلصت و على أى حاجه السلام.

[29-m]

جدتي توفت

لحظه وقف عندها الزمن لحظه لسه بعشها لحظه عدت بس لسه محشوره فيها عايشه جواها صدمه واى صدمه لحظه وقفت الدنيا عندها وقررت بعدها متمشيش لحظه تخوف نموت لحظه ضعف لحظه انعدام ثقه وانعدام امان لحظه وحده لحظه كل حاجه وحشه لحظه مش قادره تفارقنا لحظه وقف عندها الزمن او احنا الى وقفنا..

[klephty]

١٠ سبتمبر ٢٠١٩.

سعاده مطلقه، كل ثانيه فى اليوم ده كان نفسي أوقفها و أكتب عنها كان نفسي اتصور عشان كده حاولت كتير أتصور بعيداً عن تصوير اليوم ده و التعب و المجهود اللى اتبذل و كان كله كوم و الساعه تلاته العصر لما طلعت استوديو " ٤١ " عشان أخد أول شهاده ليا فى مجال التليفزيون، من مكان يمكن عشت عمرى كله عشان أبقي و لو مجرد جزء منه.. بغض النظر عن كل لحظه كانت مرهقه بالنسبالى إلا إن كل التعب راح فى الثانيه دى، الثانيه إللى لو ليا وقت فى الدنيا هأتمنى أكررها كل ثانيه فى عمرى

مش هقدر أنسي الوقت اللى عيشته فى المبنى ده حتى لو كان مجرد ساعات معدودة، انا بلخص عمرى كله من اول ما دخلته لحد ما اخدت شهاده منه ، حافظه فى استديو. كل كلمه اتعلمتها هناك كل فنجان قهوة شربته فى كافيه الدور العاشر، ريحة كل كورنر فيه و وشوش الناس المألوفه، المكان ده انا و أنا هو و هو الهدف الأول و الاخير بالنسبالى مهما رحت و جيت، المكان اللى طموحى كان على حِسه، بغض النظر أنا واقفه فين دلوقتى لكن هرجعله.. و أنا حاجه أكبر بكتير من اللى بتخيلها

لحظه كأن الزمن وقف عندها، بتعدى عليا كل يوم بقالها سنه و كأنها كانت امبارح، كنا فى الصيف آه بس كانت حرارة الجو أحن وقتها من دلوقتى برغم إنها نفس الأيام، كنت أجمل و أنجح