#yugen sundae

[jakkenpoy]

come on, let's go home

[knchuchi]

Haliya - Yūgen Sundae (Cover by Krystene and JULS)

Sa tuwing uuwi ako sa yakap mo Pagsalubong mo'y sapat na, buhay na 'ko Kailan kaya ulit ako uuwi?

     Hi, hello! Kamakailan lang ay naglabas kami ng isang video sa YouTube, at iyon ay ang aming cover ng ‘Haliya’ — ito ay isang kanta na binuo ng bandang Yūgen Sundae, at masasabi kong malapit ang awiting ito sa aking puso. Una ko itong napakinggan few months ago nang i-recommend iyon ng aking girlfriend, at hindi ko inaasahang magreresonate iyon sa akin hanggang ngayon.

     Lagpas isang taon na kaming LDR ng girlfriend ko, at kahit may distansya mang namamagitan sa amin ay pinaglalapit pa rin ang aming damdamin ng mga bagay na nagpapatatag hindi lamang sa aming relasyon, kundi pati sa mga taong mahal namin at gayundin sa aming aspirations sa buhay. Pero ano ba naman ang i-look forward ang muli naming pagkikita? Sa araw-araw na pagharap sa nakakapagod na routine at pagkilos, nandoon iyong pagkasabik na mahagkan at mayakap ang isa’t isa na para bang doon kami muling makakahinga nang maluwag at makararamdam ng pahinga. Bilang siya ang isa sa mga itinuturing kong tahanan, talagang may impact sa akin ang lyrics ng ‘Haliya’.

     Kaya naman, after ilang months na LSS pa rin ako sa kantang iyon, I decided to make a cover. Noong una, dapat solo project ko lang iyon (haha), ngunit naisip kong hindi pala ako marunong sa instruments. Esensyal pa naman sana ang gitara. E bilang tumutugtog naman ang aking girlfriend at kumakanta, naisipan kong tawagan siya at yayain na gawin naming dalawa ang cover. Ayun, after explaining my initial plans to her habang naliligo, pumayag siya then we worked on it.

     First time kong gumawa ng legit at medyo maayos na cover, at iyon ang pambawi kong content sa YouTube channel kong hindi ko na naasikaso mula noong pumasok ako ng kolehiyo. Mahirap pala talagang magrecord lalo na kung hindi naman kagandahan ang pangrecord at may mga ‘di maiiwasang ingay sa paligid. Sa environment ko dito ay kinelangan kong hintayin ang hatinggabi at magpatay ng electric fan kahit pa man mainit para lang makapagrecord nang walang istorbo. Hindi rin gaanong madali ang pagkuha ng video ng sarili ko habang kumakanta dahil may mga tao sa lugar na pinag-shootan ko at wala rin akong tripod para maging maayos ang pagkakakuha ng video sa cellphone. Pero syempre, like BDO, we find ways. Nakakatuwa lang na nagbunga ang mga sandaling iyon, pati na ang efforts ng aking girlfriend, ng isang ganap na cover.

     If you wanna listen to it or kung gusto niyong panoorin ang aming video, [NARITO ANG LINK]. Ikatutuwa din namin kung kayo ay magpapakita ng suporta at komento kung anong tingin niyo sa aming final output, at pati na rin sa kanta. Sana ay magustuhan niyo ito, at isipin na balang araw ay makauuwi rin tayo sa mga taong sandigan natin sa mga oras ng pagkawalang-bahala at kapaguran.

     Hanggang sa muli! ♥