hum-el-num

[hum-el-num]

ايوا بالظبط أنا هبقى الأم المزة أنقح من عيالي أومال ايه 😎😁

[hum-el-num]

كل ماينقح عليا رغبة أو احتياج ملح واعوز حاجة أوي، مخي ينط فيه جملة الدنيا مابتديش محتاج .. فبخمد كدا واقول اااه صح . مهي دنيا معيرصة بصحيح هستنى منها ايه :)))

[hum-el-num]

قالوا المرتب الشهر دا هينزل بدري على يوم ١٨ في الشهر... طب دي حاجة كويسة أوي.. دخلت أطل طلة لقيته نازل دلوأتي .. طب ممتاز أوي ايه العظمة دي .. ببص لقيته نازل ناقص ٢٠٠٠ جنية !!!! ياولاد كوم شكاير البطيخ .. مفيش حاجة عدلة بتعملوها ليه !! راحوا فين أم ٢٠٠٠ دول طيب !!!!!

[hum-el-num]

العيال عرفوني على واحد ورا الشغل بالظبط بيعمل قهوة، الراجل جايب قفص قاعد عليه ومعاه سخان وحواليه رجالة سواقين تكاتك ..مكان غرزة فعلا ..بس ابن اللظينا قهوته حلوة احسن من الكافتريا المعفنة لا ورخيصة أوووي وكمان قريبة من الشغل هو في قفا الشغل، المهم الراجل دا لما روحناله اول مرة شخط كدا بنبره حماشة (اقفوا هنا) عشان المكان اللي هو فيه كله لبش وسواقين وناس غريبة، تاني مرة روحتله لوحدي اداني رقمه ارن عليه وهو هيجيب القهوة عند بوابة الشغل وانا آخدها منه عشان ماروحلوش في وسط اللبش ( يا دكرررررري) .. المهم الجدع دا أكتر بني آدم تقلان وقرفان شفته، تحسه رئيس مراجيح مولد النبي بجد .. اكتر من مرة ارن مايردش .. تقلان ولا ضاربها طناش معرفش... اديني اضطريت اطلب من الكافتريا قهوة والله تقرف طعمها يجيب النحس

[hum-el-num]

ياااااااه أول شيفت أخده ويكون بلا خناق بلا حرقة دم بلاااا إحباط بلا غليان بلااا غثيان !! اينعم مش شيفت عظيم محصلش فيه أحداث سعيدة أو مبهجة بس شيفت مر عااااادي بلا خسائر نفسية !!!! يامنت كريم ياارب

[hum-el-num]

حزانا مبتليين ياعيني عليهم ..التخان ..اللي جسمهم مليان سمين مش حلو ولا جذاب...صحتهم ضعيفة وشحيحة، وعمرهم ما داقوا حلاوة ولذة وبهجة وثقة وقوة ودلال وجاذبية الجسم الحلو المايل للنحيف المظبوط الخفيف اللي تضاريسه واضحة مش عايمة وتايهة ومرهلة وسط اللظاليظ ..

[hum-el-num]

الواحد صاحي بالعافية متلصم وبيزحف عشان يروح الشغل، وصلت وقاعدة مع الرجالة بيشربوا الدخان وانا قررت هقعد في صمت ومش هلبس لبس الشغل ماهي مش ناقصة، مليش مزاج أزاحمهم النهاردة واقول عاوزة اشتغل واعافر وبتاع خليهم هم يشتغلوا هنيئا لهم . شربت النسكافيه وعملت اللي عليا ..أنا داخلة السكن عايزة أنام ..كتفمهم كلهم

[hum-el-num]

كان نفسي اكون في بلد أللاوية (معترفة بالله ) أخري اقول oh my god و thank god و oh jesuus واعمل اللي نفسي فيه واعيش حياتي من غير ضرر للغير ... ليه اتولد في المنطقة البضان بتاعت الأديان والشخ على حيوات الناس والتدخل في لبسهم وضوافرهم وحواج��هم ودخول حمامهم واكلهم وشربهم وبضانهم ... اللي عندها ٣٠ سنة هنا شتان مابينها وبين أم ٣٠ بردو بس مولودة في بورتاريكو ولا كولومبيا ولا برازيل ..يلا اجعله في ميزان حسناتنا يارب 😌

[hum-el-num]

كللللل دي ناس دابحة !!!! كلللللل دول جزارين !!!!! كلللل دول ناس بيقطعوا لحمة واتعوروا ... احنا بنغرق هنا ... افرررم ياسيسي، الشعب عنده لحمة كتير وهايصين ولاد اللظينا !!! لا وكلهم متعورين ماشاء الله ! انقذ الموقف يا سيسسسسس ... استاذة هادية غالب اعملي حاجة، هااادية اعملي حاجة بجد .

[hum-el-num]

صباح الخير وعيد سعيد علينا 🌸

بس ليه يرنوا عليا ٧ الصبح وانزل استقبال والناس كلها جاية مجاريح في ايديها وبطنها من الدبح وقطع اللحمة ... يا ولي الصابرين والله عدي ال١٢ ساعة دول على خير

[hum-el-num]

فاكرين الزميل اللي باعتلي من كام يوم انه معجب ولهان ودقات قلبه تتسارع لما بيشوفني وانه معجب وعايز يتعرف واحتمال إذ لربما يكون في خطوة رسمي..وانا قولت اني مابقتش اصدق ولا يخيل عليا اي حاجة واني ماديتوش عقاد نافع ماصديتوش بحيث ميبقاش في حساسيات في التعامل مابينا..سيبت الأمور تاخد مجراها والتعامل عادي كزملا وهو اكيد هيفهم انه زميل مش أكتر ... قاعدة من شوية مع زميلة في تخصص آخر بالصدفة الب��تة، وبندردش في الشغل والدراسة ،بتقولي فلان دفعتي ..قولتلها يا سلام ..قالت اه محترم بس ياعيني كان عايش قصة حب مع زميلتنا واتجوزوا وخلفوا ولسة مطلقين !! خخخخخخخخخخخخخخخخخخخخخخخخخخخخخخخخخخخححححححخخخخخخخخخخخخخخخخخخخخخخخخخخخخخخخ. لا كمان خخخخخخخخخخخخخخخخخخخخخخخخخخخخخخخخخ

مش قولت ان قلبي دليلي، وعايشلي في دور السنجل اللي قلبه رف لما شاف جمالي ودلالي .. خخخخخخخخخخخخخخخخخخخخخخخخخخخخخخخخخخخخخخ

[hum-el-num]

ممرضة بضان لازم كل لما يجمعنا شيفت الجمعة .. بكل جدية وبصوت حازم، يادكتورة يادكتورة يادكتورة قريتي سورة الكهف ؟؟؟ !!!!

يابضااانك ... ماتقريها وانتي مكتومة لازم دودة نشر الدعوة وتجميع حسنات بضان على قفانا تنخر في "طيييبة" قلبك ! واشمعنى أنا اللي بتسأليه !

المرادي بتنده عليا ماردتش، فضلت تنده تنده وانا باصة ف الموبيل قامت سائلة "قريتي" سورة الكهف؟ قولتلها لأ.. هكون قريتها امتى ١٠ الصبح وسط شيفت شغل!!! قالت ماحنا بين عيان وعيان في اوقات فراغ ومالة نقرا فيها !! قولتلها لأ في شغل وحالات داخلة كل شوية ....

[hum-el-num]

سؤال بجد ... في ناس بتحب الحلاوة الطحينية ؟!! يعني في ناس عاشقة ليها وتروح تشتريها مخصوص كتير عشان بيحبوها، وبيستلذوا بيها ، وبيحبوا ياكلوا ساندوتش فيه حلاوة طحينية ؟!!!! أصل كل معلوماتي انها شئ منفر بيتحط كدا لسد زنقة نادرة، أو مثلا ناس غلابة يتقوتوا بيها في السريع لو مش معاه فلوس مثلا، وهي حاجة بتتحط مع الوجبات الحكومية أو الخاصة الكحيانة اهي تشد جوع مؤقت بدون مصاريف !! بجد حد بيحبها وبيستلذ بيها ؟!!!!!!!!!

[hum-el-num]

بقيت كل يوم اصحى اقول جيب العواقب سليمة يارب! يا ترا أيه خازوق النهاردة ! يا ترا عاركة النهاردة هتبقى إزاي وبخصوص ايه المرادي !! والله كل يوم اتساءل ياترا النهاردة هيحصل فيه ايه. كل يوم لازم يحصل موقف ولا يحصل مهموز ابن لظينة !! انا تعبت وزهقت.. النهاردة التمريض ملموم أصل حد مكلمهم يكلموني على عريس !خخخخخخخ شخي عليا يادنيا شخي

[hum-el-num]

واحد زميلي جاي منتدب فترة في المكان اللي بشتغل فيه، اوقات بناخد شيفتات مع بعض مع ناس تانيين، بندرش شوية اثناء الشغل في كلام عام مع باقي الزملا.. لقيته من كام يوم في لحظة حماسة وهيجان باعتلي رسالة عصماء ١٢ بالليل، إنه معجب وعنده مشاعر قوية من ناحيتي وانه كان نفسه يقولي وجه لوجه بس ماعرفش، ف لو في فرصة نتعرف ومين عااارف يمكن إذ لربما تقلب رسمي !

المهم انا ماعرفتش أرد والله أقول ايه بس .. انا كدا كدا عارفة انه كله فاكس 😆 هههه دايما مابصدقش ولو كدبت نفسي وصدقت برجع ألبس في حيطة كالعادة، عيب أنا خبرة مع نفسي بقالي سنين . فأنا عارفة انها لحظة مشاعر فياظة مش أكتر على حبة هيجان لزوم دخلة الصيف والحر معلش. والجدع لسة مفركش خطوبته مابقالوش أسبوع فحاسس بفجوة وعايز حاجة طرية تملاها عالسريع كدا ..

أنا عندي قدرة خارقة بردو إني أبرد أي مشاعر ملتهبة، واخلي الشخص يتوتر وبعدها يصرف نظر ويتجنبني ..اه والله موهبة نادرة

مارستها .. رديت عليه بصباح الخير حد يخض حد كدا هخهوهخو !!.. وماديتوش عقاد نافع لاني فعلا ماعنديش رد واتفاجئت بكلامه. وعارفة هوصله ردي بطريقة طبيعية من غير ماقوله أه أو لأ بشكل مباشر، وبقيت اتعامل معاه عادي زي ماكنا بنتعامل طول الوقت..ومتأكدة ان مشاعره اللي كانت ملتهبة من كام يوم خمدت دلوأتي وعرف إننا هنكمل على نفس المنوال بتاع الزمالة ورفقاء الشيفت وف��ط.

مشاعر ايه ياخوانا هنصيع على بعض

[hum-el-num]

إنما أنا ياولاد خالتي لسة لحد دلوأتي ماجربتش السوشي !! هجربه امتى عالستين ولا السبعين !! الأكلة دي ذاع صيتها وأنا مراهقة فالمفروض انا شاهدة ومعاصرة ظهورها عندنا وانتشارها ليه مادوقتهاش لغاية دلواتي !! يمكن لإني بحس انها مش هتعجبني! أو مش هتشبعني وهي غالية! والأهم ان محافظتي الدلتاوية مفيهاش مكان عدل للسوشي أو مافيهاش أصلا مطاعم له، كلها اجتهادات كدا ومشاريع بيتي لبعض البناويت وربات البيوت وسرعان مابتنتهي وبتغير النشاط! ف أنا عايزة أكون في القاهرة كدا مرة أو اي مدينة تانية ساحلية ويكون معايا فلوس كتير، واجرب السوشي من مكان فخم وبيعمله حلو .. واهي تبقى تجربة وعدت

[hum-el-num]

بسافر يوم في الأسبوع شغل في القاهرة، بجانب شغلي الحكومي بيديني ملاليم بس أهو نواية تسند الزير المايل.. المكان المعيرص دا بيفضلوا يأخروا القبض ومالهمش كلمة! بقالي فيه داخلة على سنة اهه ومفيش شهر واحد قبضته غير لما لازم ابعت وأزن على المعيرص بتاع الحسابات عشان يبعتلي الفلوس!!

أول ماشتغلت كانوا بيحولوا الفلوس آخر اليوم (أتاريه حلاوة بدايات وجر رجل زبون )، معداش اسبوعين قالولي لا القبض هيبقى شهري،قولت وماله، جه الشهر الجديد بدأ سألت عالقبض، قالوا لأ ماهو القبض هيبقى بعد يوم ١٠ ف الشهر ! ودا نظام المكان من زمان..قولت وماله.. استني ليوم ١٣ و١٤ فين القبض ياجماعة؟! لا ماهو القبض بيبقى من يوم ١٠ ليوم ١٥ في الفترة دي!! طيب يا جماعة احنا يوم ١٦ (لاحظوا أنا اللي دايما ابعت اسأل بعد كل شهر والله كلل شهر) يقولوا طيب ماهو ماعندناش فلوس في انستا باي عشان نحولك عندنا محفظة فودافون كاش بس!!! طب ياجماعة وانا مال أمي ماتحطوا فلوس في انستا وتحولولي زي ماحنا متفقين! المهم اني عمري ماقبضت منهم غير يوم ١٩ أو ١٨ بالكتيير ولااازم بعد زن مني وسؤال عن المرتب!! الناس دي زهقت منهم واتقفلت حقيقي، النهاردة ١٦ وسألاه هتقبضني امتى قالي يوم ١٥ !! اضطريت ابعت ليهم !! هو ليه لازم ابعت اطلب منهم يحولولي المرتب ! غير ان شهور كتير بيبعتوا المرتب ناقص ! انا اتبضنت واللي مخليني ابعت اني فعلا بكون مشطبة ومحتاجة الفلوس، وعرفت الموظف البارد الكلام دا اني بكون مشطبة ومحتاجة الفلوس جدا . ولا حياة لمن ينااادي !!!!