#malayang taludtudran

[pulpitonglimot]

Handa na ako

Handa na ako Bubuksan ko nang muli ang pinto patungo sa aking puso Ang daan patungo sa munting paraiso Ilalaan ang lugar na nararapat para sa’yo

Unti-unti, hahayaang pag-ibig ay dumaloy sa aking balat Isasantabi ang pag-aalinlangan at lahat-lahat Ipagkakaloob sa’yo ang pagkakataong karapat-dapat Umaasang sa panahon na ito ay masuklian nang sapat Handa na ako Hilom na ako Tatanggapin ang pagmamahal na ibibigay mo sa’kin At ibibigay ang tiwala, at pag-ibig, at oras, at lakas Hindi hahayaang masira ng nakaraan ang kasalukuyan Tapos na ako Handa na ako Hilom na ako Sa aking kakayanan ay gagawin ang lahat para lamang hindi maudlot Ang unti-unti pag-usbong ng ating pag-iibigan Hindi hahayaang mahadlangan ng selos, kababawan, at poot Itong pagkakataong ipinagkaloob sa atin ng kalangitan Dahil nga… Buo na ako Tapos na ako Handa na ako Hilom na ako

Ngunit munting paalala Hindi ko ibababa ang aking pader para sa’yo Mas lalo’t ang aking pagkatao Oo, tatanggapin at hahayaan kitang ipakita sa akin Ang iyong hangganan at mga tunay na layunin Ngunit hindi ibig sabihin nito ay ikaw na agad ang aking pipiliin Patuyan mo sa akin ang iyong sarili Hindi lamang sa umpisa dapat ay hanggang sa huli Hindi hahayaan na muli akong masakal at matali Binabalaan kita ‘Wag mo akong bigyan ng rason para iwan ka Hindi ko kailangan ang kalahati mong puso Sa hati mong oras, hating atensyon, hating pag-intindi At mong hating pang-unawa Madali lang naman sakin na piliin ka Ngunit bigyan mo rin sana ako ng rason para manatili... Para piliin ka Dahil nga… Buo na ako Tapos na ako Handa na ako at hilom na ako Matagal ko nang ipinangako sa aking sarili Na hindi na muling gagawing mundo ang dapat ay tao lang Hindi na muling magpapakabaliw sa mababaw Magbubulag-bulagan sa katotohanang hindi naman talaga ako Papaka-tanga sa mga pangakong pagbabago Papaka-martyr sa taong hindi naman pala para sa akin Hindi mo ako masisira Hindi ko hahayaang sirain mo ako Magmamahal ako ngunit respeto sa aking sarili ay mananatili Hindi magdadalawang isip na ika’y talikuran Walang pag-aalinlangang ako’y lilisan Wag mo akong lapitan kung hindi ka pa handa Hindi kita aantayin Hindi ako papapigil Dahil nga buo na ako, tapos na ako, handa ako, at hilom na ako Kaya’t bigyan mo ako ng dahilan para ako’y manatili Bigyan mo ako ng rason para ika’y piliin Ganon lang kadali At pangako, Araw-araw kitang pipiliin at araw-araw rin akong mananatili Sayo lamang ang aking puso, Sa iyo lamang ako.

[pulpitonglimot]

Pagod

Akala ko tulog ang pinakamabisang paraan upang mapawi ang aking pagod. Ilang gabi na rin akong natutulog sa tamang oras at nang maayos ngunit tila mga mata ko'y nananatili pa ring pagal. Ako'y nananabik na muling maranasan ang panatag na kalooban sa tuwing ipipikit ko ang aking mga mata. Hindi biro ang mapagod, lalo na kung pati ang pahinga ay hindi mo na matapagpuan kahit sa iyong pagtulog.

[pulpitonglimot]

GALIT AKO SA TUGMA

Galit ako sa tugma Sa bilang at mga pare-parehong salita, sa dulo ng bawat taludtod at parirala. Sa tono nitong nililikha Sa bawat sambit na animo’y musika sa tenga ng iba.

Galit ako sa tugma Sa partikular na estilong bihasa ang karamihan sa makata.

Galit ako sa tugma Sinasakal ako nito sa bawat dulong salita.

Galit ako sa tugma At sa mga bagay na kahalintulad nito, ako’y sawa na. Ako’y isang malayang manunulat na galit sa tugma Isang makatang alpas sa nakasanayang tanikala

Ngunit kahit ako pa ma’y pagal na sa pag-gamit ng tugma Sa mga isinulat kong letra at salita upang makabuo ng piyesa, Sa tugmaan pa rin ang uwi ng tulad kong isang makata.