veiry-mysterious

[veiry-mysterious]

Para Saan Ang Pinag-aralan Kung Walang Oportunidad?

Tayong lahat ay dadaan sa punto ng ating mga buhay kung saan kinakailangan nating humanap ng trabaho. Bago ito dumating, tayo muna ay dumadaan sa masusing proseso ng pagaaral ng impormasyon at mga bagong kakayahan o kasanayan upang magamit sa ating kukuning trabaho. Sa ate ng pagaaral, tayo ay natututuruan at ginagabayan upang maipakilala sa atin ang iba't ibang mga konsepto at binibigyan kaalaman tayo ng mga kasanayan o skills na magagamit natin sa ating kukuning trabaho. Kapag naghahanap ng propesyon o trabaho, mahalagang isaisip ang mga nakuhang kakayahan o kasanayan na mahalaga at magagamit para sa ating napiling trabaho. Mahalagang itugma sa ating mga kasanayan at kaalaman upang mapataas ang pagiging produktibo at kalidad sa paggawa ng ating mga gawain sa napiling trabaho. Ngunit kahit na meron ka lahat ng kinakailangang kalayahan o kasanayan at kaalaman upang makapag-aplay para sa isang trabaho, paano kung walang sapat na oportunidad para sa hinahanap mong propesyon, trabaho, o posisyon?

Ang kawalan ng trabaho ay isang seryosong isyu sa anumang bansa, ngunit ito ay partikular na nararanasan sa Pilipinas. Mayroong ilang mga kadahilanan na nag-aambag sa mataas na antas ng kawalan ng trabaho sa bansa. Isa sa mga dahilang ito ay ang ay ang kakulangan ng mga trabaho na maaaraing kunin. Hindi pa rin umaayon ang paglago ng trabaho kahit na lumalago ang ekonomiya ng Pilipinas. Nangangahulugan ito na kulang sa mga trabahong mapupuntahan o mapag-a-applyan kaya maraming Pilipino ang walang trabaho. Posible na maging ang mga indibidwal na nagtataglay ng mga kinakailangang kakayahan ay nahihirapan sa paghahanap ng trabaho. Ang ilang mga trabaho na maaari nilang pasukan ay karaniwang maliit na binabayad o kaya ay may hindi magandang mga kondisyon sa pagtatrabaho. Kung ang mga tao ay naghahanap ng mga trabaho upang magkaroon ng pagkukunan ng kita, ang mga trabahong ito ay karaniwang wala sa lugar ng kadalubhasaan o pagsasanay ang kanilang mga inaral, maaari itong maging sanhi ng kahirapan sa paghahanap ng anumang trabaho. Ito ay dahil ang mga employer ay madalas na mapili kung sino ang kanilang kinukuha batay sa mga resume ng mga aplikante at iba pang mga kwalipikasyon, sa halip na tanggapin lamang ang sinumang nag-a-apply para sa isang posisyon.

Ang pananaw ng mga tao sa edukasyon ay direktang naaapektuhan ng kawalan ng trabaho. Halimbawa, marami sa mga nagtapos ng kolehiyo ang nagkakaproblema sa paghahanap ng trabaho sa kanilang propesyon, na nagdudulot ng mga tanong tungkol sa kahalagahan ng kanilang pinag-aralan. Ang mga datos mula sa Philippine Statistics Authority (PSA) ay nagpapahiwatig na marami sa mga Pilipinong walang trabaho ay mga bagong grad na nahihirapang makahanap ng isang trabaho na naaayon sa kanilang pinag-aralan. Dahil dito, may mga mag-aaral na nawawalan ng interes sa pag-aaral dahil naniniwala silang mahirap din silang makahanap ng trabaho. Dahil ang edukasyon ay ang pundasyon ng progreso, kung mangyari ito, maaapektuhan ito ng pangmatagalang pag-unlad ng lipunan.

Isa sa mga pangunahing dahilan ng kawalan ng trabaho sa Pilipinas ay ang kakulangan ng mga lokal na oportunidad. Sa kabila ng mga kursong tinatapos ng mga Pilipino, madalas ay walang sapat na trabaho na angkop sa kanilang natapos. Halimbawa, maraming nursing graduates ang hindi makahanap ng trabaho sa bansa, kaya napipilitan silang magtrabaho sa ibang bansa. Tinatayang nasa 2.16 milyon ang bilang ng mga Overseas Filipino Workers (OFWs) o manggagawang Pilipino na nagtrabaho sa ibang bansa mula Abril hanggang Setyembre 2023, isang pagtaas ng 9.8% mula sa tinatayang bilang noong nakaraang taon na 1.96 milyon. Karamihan sa kanila ay nagtatrabaho sa healthcare, construction, at domestic services, kung saan mas malaki ang sahod kumpara sa Pilipinas.

Bagamat nagbibigay ito ng oportunidad para kumita, nagdudulot din ito ng problema. Una, nawawalan ang bansa ng mga mahuhusay na propesyonal na makakatulong sa lokal na ekonomiya. Pangalawa, nagkakaroon ng brain drain, kung saan mas pinipili ng mga edukado at may kasanayan na magtrabaho sa ibang bansa kaysa dito sa Pilipinas. Ito ay isang cycle na mahirap putulin hangga't hindi nagkakaroon ng sapat na trabaho na may disenteng sahod sa loob ng bansa.

Ang isang malalim na problema na nangangailangan ng komprehensibong mga solusyon ay ang kawalan ng trabaho dahil sa kakulangan ng mga pagkakataon. Ang mga manggagawang naapektuhan ng mga kalamidad o krisis ay maaaring makakuha ng pansamantalang trabaho mula sa mga programa tulad ng Tulong Panghanapbuhay sa Ating Disadvantaged/Displaced Workers (TUPAD) ng Department of Labor and Employment (DOLE). Gayundin, ang JobStart Philippines Program ay tumutok sa pagbuo ng kasanayan at career pathways para sa mga kabataang hindi nag-aaral at walang trabaho. Bukod pa rito, ang pagpapalawak ng mga pagsasanay na tumutugon sa mga kasanayang in demand sa merkado ay mahalaga para sa paghahanda ng mga empleyado para sa makabagong trabaho. Sa kabilang banda, ang mga micro, small, and medium enterprises (MSMEs) ay dapat lamang suportahan sa pamamagitan ng mga insentibo at serbisyong tulad ng financing at technical assistance dahil malaki ang kanilang kontribusyon sa pagbuo ng mga trabaho. Ang pagpapalawak at pagpapabuti ng imprastruktura tulad ng transportasyon, enerhiya, at komunikasyon ay magpapasigla sa negosyo at magbibigay ng higit pang mga pagkakataon sa trabaho para sa mga manggagawa sa lokal na komunidad. Bukod pa rito, ang pagpapasigla sa sektor ng agrikultura sa pamamagitan ng modernisasyon at pagbibigay ng mga pasilidad sa pagproseso ng mga produkto ay makakatulong sa mga magsasaka at magbibigay ng mga pagkakataon para sa trabaho sa mga rehiyon sa kabuuan ng bansa. Ang mga programa tulad ng Revised National Apprenticeship Program Act ay naglalayong magbigay sa mga kabataan at bagong manggagawa ng higit pang mga pagkakataon upang makakuha ng karanasan at mga kasanayan sa kanilang napiling trabaho. Ang mas maraming trabaho at mas maraming pagkakataon ang magbubukas bilang resulta ng mga aksyon na ito. Ang pakikipagtulungan ng gobyerno, negosyo, at komunidad ay magiging mahalaga para sa pagtaas ng bilang ng mga trabaho at pagtugon sa mga problema sa kawalan ng trabaho sa bansa.

Para saan nga ba ang pinag-aralan kung walang oportunidad? Ang sagot ay nakasalalay sa ating kolektibong aksyon. Ang pinag-aralan ay nananatiling mahalaga dahil ito ang nagbibigay sa atin ng kakayahan upang mag-ambag sa lipunan, ngunit ang kakayahang ito ay dapat suportahan ng sistema na nagbibigay-daan para sa patas na oportunidad para sa lahat. Sa pamamagitan ng pagsasaayos ng sistema, pagkakaroon ng mas inklusibong merkado ng trabaho, at patuloy na pagpapabuti sa ating sarili, ang edukasyon ay magiging mas makabuluhan, hindi lamang para sa personal na tagumpay, kundi para rin sa ikabubuti ng buong lipunan.

Mga Sanggunian:

https://psa.gov.ph/statistics/survey/labor-and-employment/survey-overseas-filipinos