lihimlihamtinta

[lihimlihamtinta]

"Mahal pa rin kita"

Natawa nalang din ako sa kung gaano kadali ko itong nasabi. Siguro dahil hindi mo naman narinig at kailan man ay hindi mo ito maririnig.

Mahal pa rin kita

Sa kabila ng mga katagang ito ay hindi ko naman ninais na ang puso mo ay maging tangan. Siguro ay sapat na sa aking naramdaman ang bigat ng mga salitang ito sa iyo. Sa iyo na tangan ang puso ko.

Mahal pa rin kita

Sa loob ng mahabang panahon ay hindi ito ang pinakamadaling bitbiting pakiramdam. Siguro nga'y masarap pero kaakibat nito ang pagtanggap na mula sa malayo lang kita maaring mahalin at masdan.

Mahal pa rin kita

Habang unti unting pumuputi ang ating mga buhok na hindi magkasama. Siguro'y di matatapos ang pagtanging inukit kong mag isa para sa isang taong inalayan ng libo libong pagmamahal.

[lihimlihamtinta]

Ang ibigan ka ay katulad ng pakikinig sa paborito kong kanta

Mahinahon ang bawat tipa humihila sa aking kamalayan

Na ang tibok ng puso ko'y nag iiba sa tuwing ikaw ang kasama

Habang tila ang bawat letra ay sa iyo papunta

Ang ibigin ka ay katulad ng pakikinig sa paborito kong kanta

Dumuduyan ang himig sa tenga na para bang nanunuksong bata

Kinukumbinsi akong sumabay sa indayog ng pagkahalina

Hanggang sa simula kong awiting minamahal kita

[lihimlihamtinta]

Gusto ko ng mahigpit na yakap

Mula sa taong 'di magsasawang

Hagurin ang likod kong pagod na

Bumuhat ng mabibigat ng responsibilidad

Hindi niya kailangang ibigay ang sagot

Sa lahat ng aking munting tanong

Katulad ng bakit nga pumayag akong

Maging alipin ng mabibigat na mga tao

Gusto ko ng mahigpit na yakap

Ngunit sariling bisig ang natanggap

Dinuduyan ng kalungkutan at pag iisa

Hinahabol ang aking sariling hininga

Hindi ko nakita ang mga sagot

Sa aking sariling mga tanong

Katulad noong minsang nalugmok

Naging alipin pa rin ng sariling mundo

[lihimlihamtinta]

Ngumingiti pa rin ako sa ating mga ala ala

Dahil natapos man ang kaligayahang pinangarap

Ikaw ay isang pahingang mananatiling masaya

[lihimlihamtinta]

Matagal nang sinagot ang iyong dasal

Hindi mo lang matanggap ang naging katugunan

Dahil ang kinahinatnan ay 'di ang iyong ipininta

Sadyang kumapit ka lang sa maling paniniwala

Na ang maging sapat ay manatili sa piling nya

Na ang pinakamainam ay sa dulo ng altar

Na ang iyong hangganan ay ang ibigin nya

Na ang kahulugan ng buhay ay ang piliin nya

[lihimlihamtinta]

Sapat na ang minsan mo siyang minahal

Hindi lahat ng dulo ay naduduktungan

Hindi himala kundi paghilom ang kailangan

Hindi magiting na maituturing ang umasa sa wala

[lihimlihamtinta]

Ikaw ang pag ibig na kailan ma'y hindi pagsisisihan

Lahat ng ginugol na luha'y 'di panghihinayangan

Bawat minutong minahal ka'y isang karangalan

Dahil ikaw ang aking palagi kahit hindi makamtan

[lihimlihamtinta]

Kumusta ka?

Payapa na ba ang iyong paghinga?

Nakakatulog ka na ba ng mas aga?

Ang diwa mo ba ay panatag na?

Kumusta ka?

Mga sugat mo ba ay naghilom na?

Nawala na ba ang iyong pangamba?

Napatunayan na ba ang mga hinala?

Kumusta ka?

Natapos na ba ang panghihinayang?

Pagsisisi ba'y naging sapat?

May plano ka na bang muling humakbang?

[lihimlihamtinta]

Mamahalin nalang kita mula sa malayo

Iibigin kahit hindi kinukulit

Iibigin kahit hindi pinipilit

Kahit hindi na pareho ang mga pintig

[lihimlihamtinta]

Masakit ang bawat hakbang

Tila bubog ang nilalakaran

Wala naman akong ibang madaanan

Tanging pasulong nalang ang paraan

[lihimlihamtinta]

May mga tao tayong kailangang palayain para mapalaya rin ang ating mga sarili

May mga hangganan na kailangan natin tanggapin para maipagpatuloy ang ating lakbayin

May mga distansiyang kailangan nating panatiliin para masagip ang natitirang pag ibig

At may mga peklat na hindi kailangang takpan para mabaon ang aral na gustong ipabatid

[lihimlihamtinta]

Life has made me so quiet. I just want to listen, no more talking, no more arguing, no more explaining. Just silence.

[lihimlihamtinta]

Sana'y makita mo ang iyong ligaya

Magiging sapat sa mga gabi ng pag iisa

Magiging lakas sa tuwing walang makapitan

O sa panahon na mga luha'y nag uunahan

Sana'y makita mo ang iyong ligaya

Yayakap sa kabila ng mga bulong nila

Yayakapin maging ang tunay na ikaw

O hihila sa'yo sa kumunoy ng kalungkutan

Sana'y makita mo ang iyong ligaya

Mananatili kahit ang lahat ay lumisan

Mananatiling nakikinig sa hikbi mong mahina

O magbibigay ng mga tamang salita

Sana'y makita mo ang iyong ligaya

Hindi sa pag ibig ng kung sino man

Hindi sa halina ng mundong sira

Kundi sa sarili mong hindi naman kulang

Sana'y makita mo ang iyong ligaya

[lihimlihamtinta]

Ang tanikala'y humihigpit at nagpupumilit

Pinapaalala ang kabiguan sa hatid nitong hapdi

Kailan kaya sisilay ang bukas na may ngiti

Kung ang lumbay ang dumuduyan sa hating gabi

[lihimlihamtinta]

Hinawi ko ang kanyang buhok

Humingi ng dispensa dahil sa idinulot

Sadyang nahirap lang talaga ang kahapon

Sumisinghap habang ako'y nasa kumunoy

Gusto man siyang mahalin ng totoo at buo

Hindi na ito maibigay ng wasak na puso

Ilang taon ang lumipas ngunit nakagapos

Pinupulot ko pa rin pala ang aking mga piraso

[lihimlihamtinta]

Nakarinig ka na ba ng taimtim na dasal

Nanghihina't nakiki usap na saglit man ay ibsan

Ang dulot ng sunod sunod na kamalasan

Tila nagtatampong bata "bakit ako nanaman?"

[lihimlihamtinta]

Sumuko ako nang walang nakakaalam

Habang ang lahat ay tinutulungan

Mag isa akong nahiga sa kalungkutan

Hawak ang pighating hatid nila

Sumuko ako nang walang nakakaalam

Habang nakangiti at nagpapanggap

Kasama nila sa lungkot at ligaya

Ni isang kamay ngayo'y walang hawak

Sumuko ako nang walang nakakaalam

Dahil ito nalang ang natitirang paraan

Yakap ang aking sariling katawan

Sinubukan ko naman, hindi ba?